JOB 20 - Boy LonanaSofar Boy ma Sofar dam a mbarana 1 Sofar ma Naamana gijaŋ njaɗta di ana, 2 Saa manda zuɗun a hoŋ dira. Boy ma aŋ dam wanna ka hinin hurun a tin gaɗi. 3 An ka hum ŋgul manda u humunu. May ni yal man ma an a hoŋ dira ka may. 4 Aŋ wi lay hu ura tin ayra day ay hu li ma Lona gi sa warna kay ndaŋgarna day ni, 5 suu cona saɓak masina tuɗ ni na geɗek daŋ. Furira vi sa ma cona ka tuɗ dayɗi. 6 Lini nam wul coco ko do Lona dora na lay, lini yam tuɗ tew ɗugulla lay, 7 ni ko del buɗna ɦawa na nam hin bulum kiyo. Suu li wamma hin joɓ tasi kam ana nammi arage? 8 Nam sii ki ni ko ndal barra na. Sa ka wi li ma nam kal hunaɗi. Nam pii wa ni viɗ ni ko ndal doyra di suuna njeŋgera ɦawa na. 9 Suu li wamma sa ka wam oloɗi. Ziim ma nam cuki huna sa ka wambi lay. 10 Begera nam yowoɗ ay ki ko suu hawrara, goryom hin warakaɗ kiyo. 11 Tliwim ma saɓak cocona fok nde ni nam hin cim ki ni ga duk ndaŋgara. 12 Kay ana dla cora ka ŋgay funum kaŋgaa. Nam baa yam cora ki u boy ma jivina. 13 Nam ŋgayaɗ funum na gak gak ka likiɗ ki zakgi. Vunum ka wi yulum dla ndaɗta gak gak. 14 Dlaamba cora mbuɗ ay hurum a va ma tam hurumma. Ndaɗ mbuɗ ay hurum ko ŋgis guyugina na. 15 Begera nam likiɗ ki hurum cocora. Cemi nam ka viniɗ ay ki kaŋgaa. Lona hoŋ cukuɗ ay ki kaŋgaa. 16 Nam soɓ hurummi ŋgis guyna. Sin makira hin cam kiyo. 17 Nam ka wi mbona u irim oloɗi, mbo lum ŋgolona, mbul yumma u mbul mbiira. 18 Tlesuu nam fasina halaŋ nam hoŋosi kiyo. Mbeleŋ ma nam lam a ti va namma ki kaɗi. 19 Kay nam las suu hawra cocoo. Nam kul ziginina ki ni kuli na ɗow, min ka a minisi kolo minniɗi. 20 Kay hurum haɗ kay tlena cocoo, va ka ndakambi. Tlesuu nam furuyusi asina va ka hin kom na dewɗi. 21 Kurufuk mam ndaɗta ni va ka hin kom dewɗi. Furi mamba ka li ŋgolɗi lay. 22 Duk ɦiz mamba coco ndaɗta lay ni hahawra hin mba kamu. Lassa hin mba kam cocoo. 23 Hu li ma nam ka hoɓ hayam nana, Lona hin gi yaamba ay kamu. Ndaɗ hin si kam ko ndal mbona na. 24 Lini nam suɗ ki ko kawi ma duuna lay ni, Lona hin cokom ki u gu mbuuru mamba ɓalaŋŋa. 25 Nam paɗ mbuurra day ay ki ŋgoromba kiyo. Nam vi kawi ma ay kusi eg duk dukumma komu, ndaa maɗna kali kam cocoo. 26 Va ma hin ŋgay a nam famma ni ndufunda. Ku mayra ca ŋgalaɗ ka ŋgaliɗira hin ŋgalam kiyo. Hin ŋgalam u tlesuu hin varam ndena ki lay. 27 Huulona hin gam u dla coomba ki halaŋ halaŋ. Ndaŋgara mbuɗ duu u nam may. 28 Begera vo varamba halaŋ tuɗ kiyo ko ndal mbo ma ka ɓaɗ hu buu maa yara na. 29 Gola ni dlara Lona hiniɗ ka kay sa ma conara. Ni vaam ma Lona ɦamma a jonana. |
Bible Moussey © Bible Society of Chad, 2002.
Bible Society of Chad