JOB 19 - Boy Lonana

Job Boy ma Job dam a karkiyarana

¹ Job gijaŋ njaɗta di ana,

² Agi hin a hin dlaagira ɓalakan hurunda ni saɓa tuge? Boy magi ma ŋgalan tanna agi a hinimmi saɓage?

³ Gola agi ŋgulun ki yagi ca ni na doogo. Tagi ka lagi zolo ko lassa agi lasan wandaraɗi su?

⁴ Lini gasi an li ni co lay ni, coon ndaɗta ni kan anu.

⁵ Lini agi li tagi ana agi ni suun anu, hoŋ yam manda gara zolo man namma ni duk yanu.

⁶ May wagi ki ana Lona tinin dla ndaɗta kanni namu. Nam van hu bay mamma ni u tamba.

⁷ Lini an yi kolo ko lassa lay ni, sa humun kaɗi. Lini an sek lay, sa ma kaan ɓak manna kaɗi lay.

⁸ Nam dugun voɗta ki fokon ana an kalɗi. Nam kuluɓ ndufunda ki hu voɗ manda.

⁹ Nam tlan bibiŋil manda ki wa. Nam tlan jumba kuluɓi kanda ki lay.

¹⁰ Nam viɗin ki hu dlara halaŋ an tuɗ ni tuɗiya. Nam viɗin saa manda ki ko ndal suuna a paɗ guna ki u sariyamba na.

¹¹ Yaamba vi ki kura kan cocoo. Nam mbuɗun ki ni a saam ma babalira.

¹² Suu mamsina ay u tasi bolow cocoo. Asi paɗ voɗta ay ni kan na gay. Asi vi ziisi ŋguy ki kay ziin na cutl.

¹³ Nam dikin gorsenna ha ki egen na day day. Suu wanna halaŋ viɗ ki irin wa.

¹⁴ Suu egen tok tokŋa u banayanna noyon ki wa. Suu mansina humusi maa ki kan wa.

¹⁵ Suu ti vo varanna u suu man suu sununna mbuɗ golonni ko ndal koyna na. An mbuɗ ki irisi ni ko koy ma col ay ki hu li ma dayna na.

¹⁶ An yi saan ma sununna ni nam ka humunɗi lay. An cenem a nam mbay njun unu ni nam ka minɗi lay.

¹⁷ Caanda dlaanda hisiɗ wa lay. Goryon suu an vuɗusina mayan ka kasi oloɗi lay.

¹⁸ Kem gorira lay mbuɗ pananu. Lini an a di boy lay ni asi san unni saniya.

¹⁹ Banayan suu njenjena mbuɗ ki ni suu babali mansina. Suu an minisi ɦayna lay ɦal ŋgorosi manu.

²⁰ Bakan hin cuki kay sokonni ndaɗ ɦawaa. An suɗ iiri manda ni va hin ka kon dew oloɗi.

²¹ Agi banayanna wangi hahawan na wige. Wangi hahawanu kay ko Lona u tamba vanni namu.

²² Agi lay halan a dikin ko ndal Lona na lay ni kay mege? Tagi ka loɓ ko lassa agi lasanda tuɗi su?

²³ Ҥii, lini boy ma an damma sa a ɓiirim kaŋgaa, dlara an njaɗaɗta lini sa a ɓiiriɗ hu magaari ni,

²⁴ asi ndak a ɓiiriɗ u ponti ma vunum feɗina kay ɦinira ceɗira asi yurumuɗuɗ ki warra, ndaɗ hin ɓiiri kaŋga na gak gak.

²⁵ An u tanda wi ki ana sa ma buɗun kina ka iiriya. Buu maa daɓ daganna nam hin colon ki kolo duk buɗna.

²⁶ Hu li ma bakka egen wanda ɓalak ki lay, an hin gol Lona ni u tliwin ma hin egenna.

²⁷ An hin saaramu, na daŋ may an hin golomu, irin hin wamu. Nam hin ka tuɗ ki egen koyɗi. Hurun ŋgalan ki hurun kurufu cocoo.

²⁸ Lini agi di ana, «Halaygi yal ma lassamma ni ana mege lay, dlaamba aygi hin faɗ uɗ ki ni ana mege?»

²⁹ Lagi ni ndaa ŋgew ma hin hoŋ ay kagina na ɗow. Kay yara ŋgol ndaɗta mba ni u ŋgewna. Ni agi hin wi ki ana kaɓakŋa kaa.