JOB 17 - Boy Lonana

Job tuɗ fok u njaɗta tuwa

¹ Musukun ka musuk saɓak oloɗi. Iiri manda hin daɓ ki ni daɓiya.

² Suu may suu pananna ŋguyun yan ki na cutl, pan masira ka hinin a buu senɗi.

³ An li va ma co kaɗi, Lona humun boy manna haa. Aŋŋi saan ma vovoɗta. Lini aŋgi ni sa ma van gasi man ndaɗta ni gege?

⁴ Aŋ dugusi hurusi kiyo. Asi ka hum gasiraɗi. Aŋ ka min ana asi hin su kanɗi lay.

⁵ Asi ni ko ndal sa ma vun ŋgolna di kamma na. Nam yi banayamma ɓorowosi fuumma kiyo, hin goryom ki u mayra may.

⁶ Suuna mbuɗun ki ni a vaasi ma gi soolla. Anni sa ma asi tofoɗom yoyona irim ki duk suuna halaŋŋa.

⁷ Irin ka wi oloɗi, dug ki ko lassa wa. Tliw tan hinni a ŋgus tamba ɦawaa.

⁸ Suu ɗegeena mbuɗ ki ni suu ka wi dlaɗina. Sa ma wi Lona yoo tam kay suu hurusi mbambana.

⁹ Na may ko sa ma ɗegeena tuɗ fok u ɗegee mamba. Sa ma duk kom ki teteɗna lam ki teteɗ hu olo.

¹⁰ Lini agi banayanna ni hoŋogi aya, hoŋogi ay na ɗow. Kay dukugi halaŋŋi an fi sa ma yal kaɗi.

¹¹ Buu manna daɓ wa. Dlara an hal a laɗ ginda ɓalak ki wa.

¹² Asi mbuɗ njeŋgera ki a faalira. Njeŋgera ɗik wa ni asi ana maɗiira hinni na tok daŋ.

¹³ Va ma an a saaramma ni me ologe? Lina vi suu miɗina hinni ziinna. An vi ziinna ni duk ndufunda.

¹⁴ An di ussa ana, «Ndak hinni bunu.» Maŋ njufulna ana, «Agi hinni sun u wayansina.»

¹⁵ Saa manda jivira ka ni ara ologe? Jivira an hin waɗ ni arage?

¹⁶ Tle asina ndak a cuk ga un hu lina vi suu miɗina su? An ka ga duk buɗna ni duk ndufunda.