JOB 15 - Boy Lonana

Elifaz Boy ma Elifaz dam a mbarana

¹ Elifaz ma Temanna gijaŋ njaɗta di ana,

² Sa ma wi dlara hoŋŋi dira duk semeɗna ɦawa na su? Nam hoŋ dira ni u boy ma buum kolo duk semeɗna ɦawa na su?

³ Boy ma aŋ zulum coco wanna ni um kaɗi. Duk boy ma aŋ damma halaŋŋi ma jivi ka huɗi.

⁴ Aŋ ɓalak ki ni vira vi suuna. Sok vira ŋgolla kay Lona aŋ ɓalakaɗ ki wa.

⁵ Kay cooŋga ay huruŋga kal ay ki funuŋŋi ndaɗu. Aŋ ŋgay cooŋga ki u boy ma aŋ dam jivina.

⁶ Vunuŋ kaaŋ ɓakŋa kaŋŋi namu ni ka anɗi. Boy maŋ ma kal ay ki funuŋŋa di ki kaŋŋi namu.

⁷ Aŋŋi Adam ma vuɗ jewna gaw su? Aŋ vuɗ ni jew ɦinira u lii mbuyna su?

⁸ Lona kak a gi ii dlara na ni aŋ ay egem su? Aŋ hin wi dlara ki su suuna ni aŋ na dew su?

⁹ Va ma aŋ wam suumi ami ka wambina ni mege? Va ma aŋ humum suumina ni mege?

¹⁰ Aŋ golomiya suu ŋgolona u suu maarina lay. Suu vuɗ jew buŋŋa dukumi lay.

¹¹ Ɗil iira vi Lonara iriŋŋi ew su? Boy ma jivi ma ami daŋŋa wanna aŋ min a humumbi ni kay mege?

¹² Huruŋ tuɗuŋ ha ki na day ni kay mege? Aŋ golomi u jeŋ iriŋ na ɗow ni amege?

¹³ Hu li ma huruŋ ɓeŋ eg Lona na ɗow, ta ta boy namma kal ay ki funuŋ lay.

¹⁴ Sa warna a li ki na teteɗ ni arage? Sa ma cara vuɗumma ndak yi tam ana nam ɗegee su?

¹⁵ Suu sunda suu huulonna lay Lona ka golosi teteɗɗi. Huulona lay irimmi ka teteɗɗi lay.

¹⁶ Gol ko sa war ma ki ɓalakina hin li ni ana mege? Sa ma ci dla cora ko suuna a ci yona nana hin li ni nanage?

¹⁷ An min a haɗaŋu humun vunun haa. Dlara an waɗta an min cuɗuŋga haa.

¹⁸ Ni haɗta vi suu wi dlara, haɗta asi humuɗ ka fun somoyosi suu jewnara.

¹⁹ Lona ɦasi ndaŋgara ka ni masi hol. Asi hum ka ni haɗta vi suu daŋgi lay.

²⁰ Suu cona hu buuna tew tew ni asi ni u lassa. Buu maa vi suu li dla cora ki ni ndumiya.

²¹ Asi ka hummi bayra lasi tasi ndaana sak sak. Hu li ma heɓpa ka lay ni suu ɓalak lina tuɗ dukusi gak gak lay.

²² Asi ka saa ana asi hin suɗ ki njeŋge kalagera oloɗi. Asi mbuɗ saa ni ana asi ki ni baaya.

²³ Suu asina poy a nda hal ti ma funusina. Asi tuɗ halammi arage? Asi wi ki ana dlara ka juɓusira ni ndufunda halaŋ.

²⁴ Hu buuna tew tew ni wihawra u lassa ka mbuɗusi ndaana ni ko ndal mul ma ka min tam a nda duuna na.

²⁵ Asi tli kosi kolo a duu u Lona. Asi min duu u ma Saɓakŋa.

²⁶ Nam kuɗuk gi yam ga a tuɗ duu u Lona, nam ŋga tam u saɓak mbari mam ma ka komma.

²⁷ Vogom weleɗ u ɗoo mamma, gilisisi ki viira u mbulna.

²⁸ Nam kakŋi hu ɦoŋzi ma suuna toom ki gana. Asi buu ni hu zigini suu sa ka buu hurusi oloɗina, ni zigini suu asgaa suu duuna toosi kina.

²⁹ Na may nam ka ɦiz oloɗi, bege mamba ka zul kay ndaŋgara tani oloɗi.

³⁰ Ndufunda kuluɓ ki kamu. Nam ka ndak a kal kiɗi. Ŋgusugi mamsina so ki ko kura lay. Musukka cuk ay ki cin Lonara gikim ha ki ni na day.

³¹ Nam tin saa mamba ni kay dlara ka u voɗoɗɗira. Nam hin fi warak mamma ni ɦawara may.

³² Dla ndaɗta hin li ki ni jew miɗ mamma, ni ko ndal gu ma yoom ma dukumma kaɗira na.

³³ Nam yak ki ni ko vuɗ tulumma bay nera na. Ɓoom yak ki ni ko ndal ɓo conora yak kira na.

³⁴ Na daŋ may, suu vo taraŋ vi sa ma ka wi Lonaɗina ni suu gasi vunna kina njafasi kaɗi, kura ŋgal zi ma vi sa ma dlam cona kiyo.

³⁵ Hurusi oyra ni dla cora sak sak, asi vuɗ ni dla cora may. Va ma wul ay hurusina ni ganyamba sak.