JOB 14 - Boy Lonana

Hoŋ dira vi Job ta daganda

¹ Sa warna vuɗummi cara ɦawaa, iiri mamba kay ndaŋgara ni geɗeŋe, u lassa coco lay.

² Ni ko ndal ɓo tlena na, ndaɗ mun kiyo, hin so ki ni ɦawaa. Ni ko ndal ŋgusna pereɗta na ndaɗ hin jak kiyo.

³ Ni ko ndaɗta na aŋ ka wan aya. Aŋ ka kaan ɓakŋa ha kan egeŋ lay.

⁴ Sa ma ndak a paɗ va ma teteɗna ay ki duk va ma njenjena ni gege? Sa maa na dew hu duliyara tani lay ni kaɗi.

⁵ Buu maa vi sa warnana ki ni ŋgaaya. Aŋŋi sa ma ŋgaam buurum kina. Nam ka ndak a calaɗ ki kay li ma aŋ ɓiirimmaɗi.

⁶ Hin dlara golomba, hinim nam koɗ tamu a dan daɓ buu man ma sunda ki u heɓpa.

⁷ Gu maanagelay ni kak mam ma buu njokŋa kaa. Lini kaam ki wa ni nam hoŋ ɗuf aya, u sariyamba ay gara kay ɗuffa gak.

⁸ Sariyamba gaara hin mbuɗ ay ki maara, umba gaara hin miɗ ay kiyo.

⁹ Hu li ma yona hin tok a mbara ni nam gijaŋ ɓora. Nam ɗuf humba ko ndal gu ma goo tuna na.

¹⁰ Na may bigawlana miɗ kiyo, hin daɓ ki lay. Lini sana miɗ wa ni sa namma ni ara ologe?

¹¹ Mbo ma hu lum ŋgolnana ndak so kiyo, mbo lumma ndak a so kiyo, mun ki kok kok lay.

¹² Sana buu ki ga wa ni ka ndak a col kolo oloɗi. Huulona hin ɓeŋ ki ni bay nam col kolo tuwa. Nam ka ndak a dliɗ ki hu sen mammaɗi.

¹³ Lini aŋ golon ha hu lina vi suu miɗina, lini aŋ ŋgayan ki ko yaaŋga, ɗowba lini aŋ ŋga buu maa ki wa a humuŋ hin gaŋ kanu ni.

¹⁴ Kay sana miɗ ki wa ni hin hoŋ iiri olo su? Buu maa an buurum hu sun mandana halaŋ an juɓmi sa ma mbuɗunna.

¹⁵ Aŋ hin yanu. An hin humuŋu. Aŋ min a hoŋ gol sun maŋga aŋ laɗ u bik koŋga.

¹⁶ Cemi wandara aŋ ka ndumun sen ma tuɗ gana. Aŋ ka caa yaŋ kay dla coondaɗi.

¹⁷ Aŋ ceŋen dla coonda ki hu mbumbura. Aŋ baaran yam dla coonda ki wa.

¹⁸ Ҥinira ndak a bow kiyo, to ki lay, gogoyra jok uɗ ki lay,

¹⁹ Mbo ma ɓaɗna guluk gogoyra kiyo, ndaŋgara ɓow ki u semma ɓaɗna lay, aŋ ɓalak saara vi sa warna ki lay.

²⁰ Aŋ gam ki kaŋgaa. Irim jok ki zeɗ hu li ma nam miɗna.

²¹ Lini suuna ŋgaam goryom coco lay ni nam ka wi oloɗi. Lini suuna ka ŋgaasiɗi lay ni nam ka wiɗi lay.

²² Nam wi ni lassa ka lam eg tliw tamba doy hol. Hurum haɗ ni kay tliw tam doy hol.