Boy Ma Ayra Ma JAŊ Ɓiirimma 21 - Boy Lonana

Yesu tak tam ki ii suu haɗi mam suu kiɗisiyana

¹ Kak na njokŋi, Yesu tak tam ki ii suu haɗi mamsina olo fun lumma Tiberiyadna. Gola ni dlara nam tak tam irisi u ndaɗta.

² Simon Piyer, Tomas (ma yam ana Ŋgonina), Natanael (ma li ay Kana u Galilena), goryoŋ Zebedena, u suu haɗi suu vi Yesu suu hiŋŋa mba' ay u tasiya.

³ Simon Piyer dasi ana, «An tuɗ ciwna.» Asi dam ana, «Ami tuɗ uŋ may.» Asi tuɗ ful hu lumba njeŋge ndaɗta ni, asi fi kuluf kaɗi.

⁴ Lina gijaŋ fo aygi wanni, Yesu mba fun lumma. Suu haɗi mamsina ka wi ana ni namuraɗi.

⁵ Yesu dasi ana, «Gorzoŋina agi ci kuluf kaɗi su?» Asi hoŋom dira ana, «Ҥawaa, ami ci kaɗi.»

⁶ Nam dasi ana, «Cuki bayna kay bik njuf tani na, agi hin fiya.» Asi cuk bayna ca ni, yow kulufna coco asi ka tew a taɗam ki ko nekkaɗi kay kulufna oy hu cocoo.

⁷ Sa haɗi ma Yesu minimma di Piyer ana, «Ni Bu Suuna.» Piyer hum boy namma ana ni Bu Suuna ni, nam cuk baraw mamma egemu kayme nam ki siliya. Nam gi tam duk mbona.

⁸ Suu haɗi su hiŋŋa mbay u lumba, taɗ bayna ki oyra u kulufna vun doŋga hin ka egesi dayɗi.

⁹ Asi cuki kaŋga doŋ ca ni, fi murus kura cukiya kulufna cuki kayam may, funa tini kaŋga hu may.

¹⁰ Yesu dasi ana, «Yow ay u kuluf ma agi li vam ay wanna.»

¹¹ Simon Piyer ɗuŋ hu lumba taɗ bayna ay ki kaŋga u kuluf ma ŋgolona kis duk dok vadl yam hindi, kulufna oy hu bayna cocora na ni, bayna haa kaɗi.

¹² Yesu dasi ana, «Mbay tagi funa.» Duk suu haɗi mamsina sa ndak a joɓom ana «Aŋŋi gege?» kaɗi, kay asi wi ana nammi Bu Suuna.

¹³ Yesu ɦuɗ tam egesi tli funa ɦasina, ɦasi kulufna may.

¹⁴ Paɗta nam paɗ ki kolora, tak tam irisi ni a yamba hindira.

Yesu u Piyer

¹⁵ Ŋgoo dagan asi ti funa ki ti ni, Yesu di Simon Piyer ana, «Simon, goŋ Jaŋŋa, aŋ minin su suu wanna su?» Piyer hoŋom dira ana, «Haa, Bu Suuna aŋ wi ana an miniŋu.» Yesu dam ana, «Taaran gor timigii mansina jiviya.»

¹⁶ Nam hin joɓom a mbara olo ana, «Simon, goŋ Jaŋŋa, aŋ minin su?» Piyer hoŋom dira ana, «Aŋ wi ana an miniŋu.» Yesu dam ana «Golon timigii mansina jiviya.»

¹⁷ Nam hin joɓom a yamba hindira ana, «Simon, goŋ Jaŋŋa, aŋ minin su?» Piyer ɗus irim na dum dum kay joɓpa Yesu joɓom a yam hindira ana «Aŋ minin su?» Nam hoŋom dira ana, «Bu Suuna aŋ wi tlen halaŋ, aŋ wi kaŋ ana an miniŋu.» Yesu dam ana, «Golon timigii mansina.

¹⁸ An daŋ ha ni gasira, aŋ ay u goo taŋŋi, njun ɗik maŋŋa ni u taŋga, li aŋ a tuɗ huna aŋ tuɗ lay. Aŋ mbuɗ ki maara wani, ɗik maŋŋa ka njun koŋ oloɗi, sa daŋŋa hin njunuŋŋa ni namu. Nam tiniŋ hu li ma aŋ ka tuɗumbina lay.»

¹⁹ Yesu ɓak na ni, tak ki ni miɗ ma Piyer hin miɗna, hin geleɗ Lona. Yesu dam ana, «Tuɗ ay kay cerenu.»

Yesu u sa haɗi ma nam minimma

²⁰ Piyer pereɗ irim na ni wi sa haɗi ma Yesu minimma tuɗ ay ŋgorosi dagani. Ni sa ma gis tam eg Yesu hu li ma asi ti funa dam ana, «Sa ma hin gusuŋ kina ni gege?»

²¹ Piyer wamu, hin di Yesu ana, «Bu Suuna dlara hin li kay sa namma ni ana mege?»

²² Yesu hoŋom dira ana, «Lini an min ana nam kak iiri na gak gak an holoŋ ay tuwa ni, va ndoloŋŋa ni mege? Aŋu, tuɗ ay kay cerenu.»

²³ Suu haɗina jok boy namma ha ki maŋ gorsesina halaŋ ana sa haɗi namma hin ka miɗɗi. Doli ni, Yesu di Piyer ka ana nam hin ka miɗɗira naɗi. Nam di ni ana, «Lini an min ana nam kak iiri gak gak an holoŋ ay tuwa ni, va ndoloŋŋa ni mege?»

²⁴ Sa haɗi namma di ki kay tle asina, ɓiirisi ni nam lay. Ay wi ana tle asina ni gasi.

Boy ma daɓ daganna

²⁵ Yesu li sunda daŋga cocoo. Lini ay a ɓii boy namma hu magara halaŋŋi, an saa ana ka fi li ma cuk magaa ndaɗta kay yam mbassa halaŋgi lay.