JEREMI 7 - Boy Lonana

Huu ma ɦam u mbambara kay zira vi Lonara

¹ Yawe ɓak boy mamma maŋ Jeremi.

² Aŋ col fun zira vi Yawe a ɓak boy namma kira. Humugi boy ma vi Yawena haa. Agi suu Yuda suu kalagi hu fun zi ndaɗta a goɓogi kaŋga fok Yawena.

³ Na ɗaŋŋi Yawe, ma Saɓakŋa Kom Belna, Lona vi suu Israelna, ɓak ana, mbuɗugi tuɗ magira ki jiviya, dlaagira agi laɗta ki jivi a an hin ndak kak dukugi hu li namma.

⁴ Halagi boy ma mbambara a hoŋogi dira ana, «Ni ziŋ Yawera, ni ziŋ Yawera, ni ziŋ Yawera. Nam ki tani wanna.»

⁵ Na may ni minigi tuɗ magira ki jivi na ɗow. Dlaagira agi laɗta a njun kay sa ɗegeena duk ndaryamma.

⁶ Yowogi tlesuu vi sa mbay mbeera dukuginaɗi, sa kuyuna u cara donoraɗi. Voogi busu suu li va kaɗina ki kaŋga hu li nammaɗi. Kay hahaw magira liŋigi kay cee loogi suu daŋŋaɗi.

⁷ An hin ndak kak u agi hu li namma. Hu mbassa an ɦaɗ ki maŋ somoyogi ay ki jew day a fafaɗtara.

⁸ Na may agi ɓakagi boy ma mbambara bay umma sunum kaɗina ɗi.

⁹ Na ni agi ndak a li dlara kulna su? Dlara ci maɗna, dlara zoŋga, suurugi suura bay uɗta, ɓivun ma ŋgalam ki maŋ Baalna su? Liŋigi kay cee loogi suu daŋ suu ka saa kagiɗina su?

¹⁰ Hin hoŋogi ay mba col fokon hu zira sen ka ki kaɗ a di ki ana, «Ami ki suɗiya,» hin tuɗ fok u lira li dla cora na gak gak su?

¹¹ Hu ziinda ka ɓak ki u senda, agi ndak mbuɗuɗ ki ko zira vi suu kulnara na su? An gasi daŋ may ni ka wi ana dla ndaɗta ka ni ko wanda na. Yawe di na.

¹² Tuɗugi ni hu li ma varanna na ɗow hu Silo, hu li ma an hin sen ay jew hurumma. Agi wi ana lasammi kay dla cora vi suu man suu Israelnara.

¹³ Doliɗi ni cecem wanda ko agi li dla co ndaɗta ki halaŋ lay ni, Yawe di na, an ɓakagi tew tew lay agi hum kaɗi ni, an yagi ni agi hoŋon dira kaɗi lay.

¹⁴ Na ɗaŋŋi zira ka ɓak ki kay senda, ta agi ɦal saaragi kaɗta u li ma an ɦagina ki lay, maŋ somoyogi layna, an hin lasasi ni ko an las Silora na.

¹⁵ An hin dikigi ha ki egen na day, ko ndal an dik gorsegina ki egenda na, njaf suu vi Efrayimma na may.

Bu Suuna ka min a humbi

¹⁶ Aŋ joɓ kay suu asinaɗi, yoo taŋ kay dlasiraɗi lay, cenenɗi lay, vi taŋ funun kay dlasiraɗi, an ka humuŋgi.

¹⁷ Na ni aŋ ka wi dlara asi laɗ ɦoŋzi ma Yudanara, laɗ hu voɗta Yerusalemba.

¹⁸ Gor kemba yow gu ma sooyna, somoyosi suu njufiina ŋgal kura may, boyogina yaras fuɗta a li komnjoɗina maŋ mulla kolo huulonara. Agi lagi ɓivunna maŋ loogi suu daŋŋa ko ndaɗta na ni agi lagi ni cora egenu.

¹⁹ Na ni gasi co ndaɗta asi laɗ ni egen su, Yawe di na. Na ni co ndaɗta ka ni egesi tasiraɗi su? Asi hin mbuɗ ki zolona.

²⁰ Na ɗaŋŋi Bu Suuna Yawe ɓak anaba, yaanda hin li hu li namma kay suu warna u mburina lay, kay ŋgusugi suu duk buburana u vuɗ tlesuu kay ndaŋgarana, ni kura hin ka tew kiɗira.

Suu ka hum vun Loosinaɗina

²¹ Na ɗaŋŋi Yawe, ma Saɓakŋa Kom Belna, Lona vi Israel, ɓak anaba, cukugi ɓivun magi ma ŋgalam kina kay magi ma lam ɦawana, komogi tliw namma.

²² Hu li ma an selegi somoyogi ay ki hu mbassa Egiptera ni an dasi va kaɗi. An joɓosi va ka a lan ɓivun ma ŋgalam kina u ma lam ɦawanaɗi lay.

²³ An joɓosi ni ko wanda na, «Humungi vununu an hin mbuɗ ki a Loogina, agi may ni hin mbuɗ ki ni suu mansina. Tuɗugi jivi hu voɗta an takagirara, agi hin kak u heɓpa.»

²⁴ Na may asi hum kaɗi, na lay asi tin humusi kaɗi. Asi li ni dlara u min masirara kay yasira eŋga. Asi hin dlara ɦan hurusira tani ɦanni ŋgorosi na ɗow.

²⁵ Ay hu li ma somoyosi sel ay ki hu mbassa Egiptera day ta ta hu buu ma karamma an hin ka bay sunusi suu man suu sunda jew jok vun Lona ha tuwa, hu buuna tew tew tan ka loɓbi.

²⁶ Na may asi humun kaɗi. Asi tin humusi kaɗi, asi so yasi kiyo. Asi ki suluk su somoyosiya.

²⁷ Aŋ dasi u boy namma ki na halaŋ halaŋ. Asi ka humuŋgi. Aŋ yasi lay, asi ka hoŋoŋ diraɗi.

²⁸ Aŋ dasi ɗaŋ, gologiya, suu ka hum vun Yawe, Loosinaɗina, ka li u gaɗ mambaɗina, gasira viɗ ki wa, ndaɗ bulum ki funusi wa.

Ҥuɗugumba ci suuna ki hura

²⁹ Ŋgaɗagi tlimiɗ yagira ɓivunna, cukuɗ kiyo, gagi soolla hahawra hu voɗta kay ana Yawe noy njaf suu loɓom tam ki cocona kiyo.

³⁰ Suu Yudana li ni co mayra an ka miniɗɗira, Yawe di na. Asi cuk zozot masira hu zira ka ɓak ki u sen tew tewra a mbuɗuɗ ki njenjera.

³¹ Asi min otel ma li ɓivunna ha hu ɦuɗugumba Ben-Hinnomba kay a ŋgal goryosi suu njufiina u gorɓiina ki u kura. An joɓ dla ndaɗta kaɗi. An saa ka kay dla ndaɗtaɗi lay.

³² Na ɗaŋŋi buuna mba wa, Yawe di na, ma suuna hin ka di olo ana, «Otel ma ɓivunna» ɗi lay, ɗowba «Ҥuɗugumba Ben Hinnomba» ɗi lay, may hin di ana, «Ҥuɗugumba ci suuna ki hura,» ko lina kaɗi ni otel ma ɓivunna hin mbuɗ ki li ma mol maɗ suuna huna.

³³ Duk suu asina suuna hin miɗ ki ŋgolla, layagi suu huulonana, mburi suu kay ndaŋgarana hin komosi kiyo. Sana dew lay hin ka dikisi ki oloɗi.

³⁴ Hu ɦoŋzi ma Yudana, hu voɗta Yerusalemba, an seŋ soolla furira kiyo, luu ma furira ki lay, soolla suu ɗum tasi wilina gaɗta ki lay kay ana mbassa hin mbuɗ ki ni jona.