JEREMI 20 - Boy Lonana

Jeremi njunum ki eg guna

¹ Mul ma li ɓivunna, Pasehur, ma goŋ Immer ma ŋgol sunda hu zira vi Yawera, hum del Jeremi ɓak boy namma ki halaŋ.

² Na ɗaŋŋi Pasehur vi sa jok vun Lona, Jeremi, njunum ki eg guna fun grek ma vi Benjamin ma ŋgolna, ma hu vun Zira vi Yawera.

³ Vin wan ɗaŋŋi hu li ma Pasehur mbay a buɗum kira, Jeremi dam ana, «Yawe ka yaŋ ana Pasehur oloɗi may, hin yaŋ ana Ndaana hu lina bel bel.»

⁴ Ko ndaɗta na Yawe ɓak anaba, «Ŋgoo dagan wanni an hin mbuɗuŋ ki ndaana, banayaŋŋa lay, asi hin puk kaŋga fun ŋgewna vi suu babali masisina aŋ hin wi dla ndaɗta u iriŋ lay. An hin ɦal suu Yudana ki maŋ mul ma Babilonna. Nam hin yowosi tuɗusi ki Babilon, nam hin casi ki u ŋgewna.

⁵ Tlesuu suuna ɗokosi kolo hu ɦoŋzi nammana, vuɗ sun mayra asi laɗta, tlegeyesi suu jivi cocona, begera vi mul ma Yudana an hin ɦasi ki maŋ suu babali masisina. Asi hin ɦurumusi kiyo, asi hin yowosiya, asi hin tuɗ ki u asi Babilon.

⁶ Aŋ taŋga, Pasehur, u suu maŋsina halaŋ, aŋ hin tuɗ ki mbaɓura, aŋ hin tew ki hu Babilon aŋ hin miɗ ki ni huwa. Asi hin tosoŋŋi huwa. Gasi aŋ u banayaŋ suu aŋ ɓakasi boy ma kaboynana halaŋ halaŋ.»

Jeremi di Lona ana nam ka ndakgi

⁷ Yawe, aŋ suun dlara ki kan u nunuh manda wa. Gasi an ay jew nunuh daŋ may. Aŋ ay saɓakŋa suun jew day faɗ ha ki u ndaɗta. Hu buuna tew tew ni asi mbuɗun ki va sanda, asi halaŋ pananu.

⁸ Tew tew hu li ma an min a ɓak boyna wanni, an yi kolo u delen eŋga ana, mbay njununu. «Yara egen lay, lassa kan lay,» Kay boy ma vi Yawena an mbuɗ ki va lassa hu buuna tew tew lay, ŋgulun lay, panan lay.

⁹ Hu li ma an di ana, «An hin ka ɓak boy namma oloɗi, an hin ka ɓak boy u sem oloɗina», nam mbuɗ ki hurun kurufu ko kura ŋgalla na, a tliw tan ki gii daŋgayna an loɓ tan ana an daɓam hurunu may an ka ndakgi.

¹⁰ An hum boy ma tiitara ma suuna ɓakamma. Suuna halaŋ halaŋ ki mbuɗi ndaana. «Gagina um kiyo.» «Gasi daŋ may ami gam um kiyo.» Banayan suu minin ɦayna halan cemmi ni dlaanda cora na ɗow. «Kala nam hin viɗ tam u nuh nuh mamba hin ndi kaŋga ami hin faɗ vun dla ndaɗta kiyo, sa sugulumi ki may.»

Sa jok vun Lona hin tam ko Lona

¹¹ Na may Yawe ka u an ko ndal sa duu ma saɓak cocona na. Suu lasanna hin puk kaŋgaa, hin ka ndak ki fun dlaasiraɗi. Zolona hin casiya. Asi hin ka ndak a li vaɗi. Asi hin mbuɗ ki zolona a fafaɗta, hum sa hin ka maa dla ndaɗta kiɗi.

¹² Yawe ma Saɓakŋa Kom Belna, aŋ sa wi saara vi sa ɗegeena, sa wi dlara huu suunara u saara, an hin waŋ aŋ sa sukuluŋ u asiya, kay ana an hin dlaanda halaŋŋi koŋu.

¹³ Gagi soolla maŋ Yawe. Geleɗegi Yawe. Nam ɓaɗ iirira vi suu hawra ay ki ko suu li dla cora.

Jeremi yoo tam kay vuɗ mamba

¹⁴ Cora ka kay buu ma an vuɗ ki hurumma. Buu ma sun vuɗun ki hurumma, ko paɗvunna li kambi.

¹⁵ Cora ka kay sa ma di bun ana, aŋ hin vuɗ goonana. Nam hin oyom hurum ki u furirana.

¹⁶ Ko sa namma mbuɗ ki ni ko ndal ɦoŋzi ma Yawe toom ki kaŋga, saa ka kambina na. Ko nam hum suuna yi maɗii ana mbay njunusiya, faali njalak njalak asi yi kolo a duunara na.

¹⁷ Na may ni hinin an miɗ ay ki huu sun gawɗi amege? Sun hin mbuɗ gin ki a usunu, wii ma ndaɗ vamma hin ka di ki ginɗi.

¹⁸ An vuɗ ay ki na mbee ni kay mege? A wi tiitara u hahawra, a hu buuna tew tew zolona can na ci ci ni kay mege?