JEREMI 2 - Boy Lonana

Cokira Israel min Bu Suuna ɦayra

¹ Yawe ɓakan boy mamma ana,

² Tuɗ ci luluura hum Yerusalem. Yawe ɓak anaba, an ka njaɗak dlaakka ndak laɗ ay u gorokka, min mayra ndak min njufuk ma vak wilinara. Ndak tuɗ ay kay ceren hu fulla, kay ndaŋga mayra va ka wul huɗira.

³ Israel ni va ɗogom maŋ Yawe na. Vuɗ tlesuu jew suu ɦamsina mamma, gegelay ma tasina dla cora famu, dla cora mbay ŋgafamu. Yawe di na.

Duk mbo ma iiri ma doyom ki tooyna

⁴ Humugi boy ma vi Yawena haa, agi suu vi Yakobma u dee suu Israelna halaŋ.

⁵ Yawe ɓak anaba, dla cora somoyogi fanda egenda ni tarage a asi ɦuɗ tasi ki egen day nige? Asi liŋŋi u dlara uɗ kaɗira. Gola asi bulum ki cemmi ni ko va kaɗira na.

⁶ Asi di ka ana, Yawe ni arage? Ma selemi ay ki hu mbassa Egiptera, ma takami voɗta ay hu fullana, hu mbassa gogoyra u dawna, mbassa faɗta ɦayra, li ma ci suuna kina, mbassa sa ka jak huɗira, sa ka kak huɗi layra?

⁷ An tuɗ tinigi hu mbas mayra mbiira ɦayra kay agi juguɗ voɗuɗ u jivi maɗta. Na may a kal ha huruɗta ni agi mbuɗun mbas manda ki njenjera. Agi mbuɗun liina ki li ma cona.

⁸ Muli suu li ɓivunna ka di ana, Yawe ni arageɗi? Suu ka u saɓak ma vi Lonana kosina ka wanɗi. Suu taa suuna mbuɗ yara u anu. Suu jok vun Lona ɓak ki ni u sem Baal. Asi liŋŋi u suu sunusi kaɗina.

⁹ Na ɗaŋŋi an hin li ɓakŋa u agiya. Yawe di na. Hin li ɓakŋa u goryoŋ goryogina.

¹⁰ Tlagi ha fun lumma Kittimma na, gologiya, sunugi ha hu Kedar humugi dlara ki jiviya. Gologiya dlara ko ndaɗta nara mbaa.

¹¹ Njaf suuna ndak a jok ki u lo ma daŋŋa su? Doli ɗaŋŋi ka ni looginaɗi. Suu mansina may ni mbuɗ jivi masira ki u va sunum kaɗina.

¹² Ko ndaɗta na agi ni giniŋŋi suu huulonana. Agi mbuɗ laɓaa, tuguɗi ŋgolla hin ndi kagiya. Yawe di na.

¹³ Gasi, suu mansina li dla cora yasi ni mba'. Asi noyon an mbo ma iirina kiyo, asi min zul mbona, zul mbo ma ki cooyna, ka vi mbo kolo huruɗɗi.

Suu noy malasina kina

¹⁴ Israel ni mbaɓura su? Ndaɗ vuɗ ni hu mbaɓura su? Ndaɗ mbuɗ ki va komba ni kay mege?

¹⁵ Gor dlona ka ŋgoɓoɗu, asi ka tak delesiya. Asi mbuɗuɗ mbas maɗta ki hahawra, ŋgalaɗ ɦoŋziiɗna kiyo, casi suu hurusina kiyo.

¹⁶ Suu Memfisna u suu Dafnena lay bay welek yak kiyo.

¹⁷ Dla ndaɗta li egek na ni kay mege? Ni kay noyra ndak noy Yawe, Lookŋa, ki hu li ma nam ay a sa takak voɗtana.

¹⁸ Cecem wanda va mbaɗak vunuk hu voɗta Egiptera a ndak tuɗ ci yona hu lum ma Horusna ni mege? Va mbaɗak vunuk hu voɗta Asirira a ndak tuɗ ci yona hu lummana ni mege?

¹⁹ Ko cookka lasaku, ko dla cookka gaɗak vunuku. Ko dla cora lasak na ta ta faɗak ki na toŋ, kay noyra ndak noy Bu Suuna, Lookŋa, kira. Gasi, ndak lay ni ka dlak ndaa fokon oloɗi. Yawe Lona, ma Saɓakŋa Kom Belna, di na.

Suuna mbuɗ ki yara, goɓ fulina, ka saa kay dla oloɗi, ɓeŋ kiyo

²⁰ Ay day day lay ni ndak kus gu ma kelekŋa kiyo, ja duk ɦoŋok ki u an di ana, An ka min a li mbaɓu oloɗi. Kolo kay ɦinira fiyekka, kaŋga u ŋgusu ma ɗufina ndak buu kaŋga li gawlaŋŋa.

²¹ An pakŋi anu. Goo ŋgus gugutlura an manaɗta. Ko gu ma eg liimma na. Ndak hin mbuɗ ki ko gugutlura cora, vuɗuɗ ci suuna. Sa ka waɗɗira na ni nanage?

²² Lini ndak mbus tak ki u tumuɗta lay, lini ɦok tak ki na teteɗ lay, balam dla cookka ka egek fokon gak gak. Bu Suuna Yawe di na.

²³ Ndak hin di ana, «An ka ki mbuɗi njenjeɗi. An ka liŋ kay cee Baalɗi,» ni nanage? Gol tuɗ makka hu ɦuɗugumba, gol dlara ndak laɗta. Jamballa cara taɗ feɗta ŋguy kay balam seɗtana.

²⁴ Ko kor mayra bagira haɗ ki u gogoyra na. Hu til faɗta ndaɗ musuk duk semeɗna. Ndaɗ ya cocoo. Sa ka ndak tew egeɗɗi. Suu halaɗna halaŋ ka min a loɓ tasiɗi. Asi faɗ ni hu tiliɗu.

²⁵ Cola. Li ka naɗi ni ndak hin mbuɗ ki lalasi, fefegek hin co kiyo. Na may ndak di ana, «Ҥawaa va ka lanɗi. An min suu koyogina an hin liŋ usiya.»

²⁶ Ko ndal sa kulna viɗ ki hu li ma vam a li dlarana na, suu Israelna ki viɗiya. Asiya, muli masisina, suu ŋgolo masisina, muli masi suu li ɓivunna u suu masi suu jok vun Lona lay.

²⁷ Asi di guna ana, «Aŋŋi bumiya.» Di gogoyra ana, «Ndakŋi cara vuɗumira.» Gasi daŋ may asi ɦan zagaɗasi wa, ɦan hurusi kaɗi. Na may hu li ma asi mbuɗ hahawrana, asi dan ana, «Col kolo, suɗumi kiyo.»

²⁸ Loogi suu minisi u konana ni arage? Asi col kolo li ni asi ndak a suɗuk hu li ma ndak ki hahawrana, kay ana loogi maksina mbuɗ ki bolow coco ko ɦoŋziikŋa na ndak Yuda.

²⁹ Agi li ɓakŋa u anni kay mege? Agi halaŋ halaŋ mbuɗugi yara u anu, Yawe di na.

Lona yo tam kay suu mam suu cona

³⁰ An poŋogi goryogi ni a wassa. Asi ka humun haɗ mandaɗi. Ŋgew magira cagi suu magi suu jok vun Lona ko ndal dlo ma vi mburina na.

³¹ Agi suu wara, suu cecem wanna, humugi boy ma vi Yawena. An mbuɗ ki ni fulla vi Israella su? Mbas mayra ndufun ilik ilikka su? Ni kay me suu mansina di ana, «Tuɗuygi hu li ma aygi minimma, ami ka hoŋ ay egeŋ oloɗi ni ge»?

³² Go tamara ndak maa tlesuu humuɗna ki su? Goora ki ɗumira ndak maa baraw maɗna ki su? Na may asi suu mansina maaran ki day day buuna bolow cocoo.

³³ Ndak wi yal ma gi ii dlara may, gasi ndak tuɗ taɓ tak ki u suu ci maɗna wa.

³⁴ Busu suu hahawra, suu li va kaɗina ka tini eg vun barawi maksina. Ni gasi eg tle asina an famu, ka ni eg gulumun ma irim ki cooynaɗi.

³⁵ Ndak di ana, «An li va kaɗi, gasi daŋ may yaamba hin jak ki kanu.» Doli may ni an ka ciɗik uk ta ta li ɓakŋa u ndaku, kay ndak di ana, «An li dla co kaɗi.»

³⁶ Ndak tuɗ ni hu li ma cona u zulla zul ii dla cookka. Ndak hin fi dla cora ŋgolla ko ay hu Egipte u Asirira na may.

³⁷ Hu li namma ndak hin kal ay ki ni kok kay yak hewiya. Gasi Yawe ka minik dlaakka a hal heɓparaɗi. A ndak li jivira ni ka naɗi.