JEREMI 12 - Boy Lonana

¹ Aŋ, Yawe, aŋ ɗegeere. Na may an min ɓak u aŋ nde. Gasi, an min ci wayra u aŋ kay dla taa ɦiw. Ni kay me suu dlara vasina dlaasira li eg liiɗ ni ge? Ni kay me suu ci suuna suu dlaasi cona kaki u heɓpa ni ge?

² Aŋ pasi ni aŋu. Asi sii sariyasi kaŋga tuɗ ta ta cuk vuɗta. Aŋ ka eg vunusi na tok may, ki day eg hurusiya.

³ Aŋ, Yawe, aŋ wanu. Aŋ ka wan lay, golon saa manda lay. Ndaɗ halaŋŋi koŋu. Suu dlasi cona cukusi ki keŋ ko ndal timigii suu tuɗusi hu li ma ŋgaɗtana na. Hinisi cukira a juɓ buu ma ŋgaɗta.

⁴ Ndaŋgara hin yoo taɗ ni buuna ta ta gage, usu ma bagina hin so ki ni saɓa mayge? Mburi suu bagina miɗ ki ni kay cora vi suu maɗsinara. Asi suu di ana, «Nam ka wami voɗomiɗi.»

⁵ Lini aŋ liŋ u suu semba asi loɓoŋ kiyo ni, aŋ hin li ni nana a cuk liŋŋa u suu kulumina ni ge? Lini ɦaŋ mbassawa a aŋ kak u heɓpa ni, aŋ hin li ni nana duk usu ma fun lumma ŋgolna Yurdanna ni ge?

⁶ Gorseŋŋa lay, suu varaŋŋa lay, gasi asi lay gaŋ uŋ kiyo. Gasi asi lay sekeŋ suuna kaŋ bolowo, cukusi kay ceereŋu. Ne taŋ u asiya. Hu li ma asi ɓakaŋ jivira nana.

Lona noy mbas mamba u suu mamsina kiyo

⁷ An noy ziinda kiyo. An yow kon ki kay tlesuu varanna wa. Ndaɗ ta an miniɗ ɦayra an ɦaɗ ki maŋ suu babali maɗsina.

⁸ Joona mbuɗ ki kanni ko ndal dlona duk buburara na. Nam ŋgoɓonu, an ka minim oloɗi may.

⁹ Joona ki kan cemi ni ko lay ma suuna ŋgufumma na, ma ndarayam layagi suu ŋgolona ŋgufum zeɗ zeɗta na. Tuɗugi yowogi mburi suu bagina aya, mbaarasi ay a li luuna.

¹⁰ Bolow suu taa suuna ɓeŋen gugutlu manda kiyo, tayan sene manna ki kaŋga u sesiya. Sene man ma jivi namma asi mbuɗum ki fulla, va ka huɗira.

¹¹ Asi mbuɗum ki ni li hahawra. Gola nam fokon wanni, yoo tamu, va ka hurumbi. Mbassa u ŋgoloɗ halaŋ ki hahawi, sa ka saa kaɗɗi.

¹² Hu voɗta hu fullara halaŋ suu ci suuna mbay huruɗu. Ŋgew ma vi Yawena ay ii ko hiŋŋa ta ta tew ko ndaŋgara wanda. Heɓpa ka kay sa dew oloɗi.

¹³ Asi zaa wa blena kaŋgaa, hin feɗ ni wayra. Asi loɓ tasi kiyo, hin ka fi va huɗi. Mbuɗugi ki zolona u tlesuu agi fasi asina, ni kay yara vi Yawera ŋgolla.

Bu Suuna min a haɗ suuna ni ana mege?

¹⁴ Na ɗaŋŋi Yawe ɓak anaba, ndarayam suu zi suu co suu min a yow joon ma an ɦam maŋ suu man suu Israelna, an hin paɗasi ki u sariyasi ma duk ndaŋgarana. An hin paɗ suu Yudana ki dukusi u sariyasi may.

¹⁵ Na may, hu li ma an paɗasi ki u sariyasi wa ni, an hin wasi hahawasi, yowosi hurun olo, an hin hoŋosi gegelay tinda kay joomma, gegelay hu mbas mamba.

¹⁶ Lini asi haɗ tuɗta jivira wa ko suu mansina na, suu tasi u sen ana, «Bu Suuna ka iiriya,» ko asi haɗan suu mansina a suu tasi u Baalla na may ni, asi hin cuk ziisi duk suu mansina.

¹⁷ Na may lini asi ka humbi ni, an hin paɗ suu asina ki u sariyasi, viɗisi ki a fafaɗta. Yawe di na.