Magaara Vi Sa Jok Vun Lona OZE 2 - Boy LonanaLona hin hoŋ suu mamsina kom daganda 1 Ndum goryoŋ Israelna hin li ni ko ŋgetl ma fun lumma ŋgolna na, sa ka tew a ŋgaambi lay, ndumumbi lay. Hu li namma asi dasi ana, «Agi ka suu mansinaɗi», asi hin dasi ana, «Agi ni goryoŋ Lo ma iirina». 2 Goryoŋ Yudana u goryoŋ Israelna hin taɓ ki u tasiya. Asi hin tli mulna fokosi dew, asi hin ti kay mbassa. Kay ana buu ma vi Jizreelna hin li ŋgolla. 3 Dagi gorsegina ana, «Suu hurun minigi ɦayna, suu mansina.» Agi hin di gorsegi suu tamagina ana, «Suu hurun minigi ɦayna suu mansina.» Israel ni ko ndal cara bay humba na 4 Kaagi ɓakŋa kay sugiya. Kaagi ɓakŋa kaɗu, kay ndaɗ ka caanda oloɗi, an may ni ka njufuɗ oloɗi. Ko ndaɗ ɦuɗ dlara gawlaŋŋa ha ki egeɗ na day, ndaɗ paɗ dla zoŋga ki huruɗu. 5 Li ka naɗi ni an hin fokoɗ barawi suu egeɗna ki hin hiniɗ ki siiliya. An hin hiniɗ ki ni ko hu buu ma ndaɗ vuɗ ay ki huu suɗna na. An hin mbuɗuɗ ki ko ndal fulla na. An hin mbuɗuɗ ki ko ndaŋga koɓona na. An hin caɗ ki ni u laa yona. 6 An hin ka miniɗ goryoɗɗi, kay ana ni gor suu mboymona. 7 Gasi, susi gi taɗ ki gawlaŋga ndaɗ mayra vasi wirisira, zolona mba kaɗ hu li ma ndaɗ di ana, «An hin hoŋ liŋŋa u banayanna, suu ɦan funa u yona, suu ɦan baraw ma cili u tlimiɗ timigiinana u baraw dlemba may. ɦan mbulna u summana.» 8 Kay ndaɗta an hin dukuk voɗ makka ki u wayra, hin cakaɗ ki u guna. Ndaɗ hin ka fi voɗ maɗta oloɗi. 9 Ndaɗ hin cuɗ sem banayaɗna ka fasiɗi. Ndaɗ hin halasi ta ta ka fasiɗi. Ndaɗ hin di ana, «An hin hoŋ vo vi njufun ma jewna kay an ay kaki jew u heɓpa suu cemmi wan daŋga.» 10 Ndaɗ wi ka doli ana an li ɦaɗ wana, sum veŋ ma wilina u mbul ma heɓma ay jew ni anuraɗi. An zuluɗ u gursura koɗ lay, may lorra asi ɦaɗ ki maŋ Baal. 11 Kay ndaɗta an hin hoŋ ay yow waanna hu liimu. Sum veŋ man ma wilina hu tilim may, an ɓaɗ baraw ma cili u tlimiɗ timigiina u baraw dlemba man ma ŋgayaɗ gin siili maɗtana kiyo. 12 Cecem wanda an hin ɓakaɗ dlaaɗta zolona ki ii banayaɗna. Sa hin ka ɓaɗaɗ ki kon oloɗi. 13 An hin bulumuɗ furi maɗta kiyo, luu maɗna lay, vun til maɗna lay, buu maɗ ma sabbatna lay, tok maɗta daŋga zeɗ zeɗta lay ki halaŋ halaŋ. 14 An ɓeŋeɗ sene maɗna kiyo. Ŋgus tulum maɗna ki lay, ndaɗ hin di ana, «Gola, ni warak ma banayanna ɦanna na.» An hin mbuɗum ki bubura, mbuuri suu bagina hin ti ni huwa. 15 An hin ɓakaɗ ki kay buu ma vi Baalna, ma ndaɗ lam ɓivun ma ŋgalam ki ŋgalina ma ndaɗ min taɗ u walakka del konara may, ɦeɗewra deleɗ may liŋ kay cee banayaɗna, maaran an tanda ki gaw mayna. Yawe di na. Lona min a hoŋ huu suu mamsina ay egemu 16 Na ɗaŋŋi anni sa hin tukuɗna. An hin tuɗuɗ ha ki hu fulla an hin ɓakaɗ huruɗ kurufuwa. 17 Hu li namma an hin hoŋoɗ sene gugutlu maɗta. An hin mbuɗ ɦuɗugumba Akorra ki a vun grek ma saara, na ɗaŋŋi ndaɗ hin hoŋ dira ko ndal ndaɗ ay u wayaɗta na, hu buu ma ndaɗ kal ay ki hu Egiptena na. 18 Va hin li hu buu nammana ni, Yawe di ana ndak hin yan ana, «Njufunu». Ndak hin ka yan ana, «Baal manna, malanna,» oloɗi. 19 An paɗaɗ sem Baal ki funuɗu. Sa hin ka ɓakasi dlasi oloɗi lay. 20 An hin vi galamba u asi hu buu namma, u mbuuri suu hu senenana lay, u laygi suu huulonana lay, u tlesuu ɦaram u vun dikisi kay ndaŋgarana lay. Gu mbuurura, ŋgewra lay, duuna lay, an hin bulumusi kiyo, tle asina hin ka li hu mbassa oloɗi. An hin ɦal voɗta maŋ suuna asi buu senna u heɓpa. 21 An hin vi banara u ndakŋi a fafaɗta. An hin vak banara ni anu, u jivira, ɗegeera, minda mintara cocora. 22 An hin vi banara u ndakŋi kay ɗegeera ndak hin wi Yawe may. 23 Va hin li hu buu nammana ni an hin hoŋ ɗira ana, Yawe di ana, an hin hoŋ dira u juɓpa kolo huulona may. Asi hin hoŋ dira u juɓpa kay ndaŋgara may. 24 Ndaŋgara hin hoŋ dira u wana u sum veŋ ma wilina u mbul ma heɓma. Asi hin hoŋ dira a juɓ Jizreella na. 25 An hin hiniɗ a njafna man an hu mbassa. An hin min Lo Rouhama ni ana an min suu suuna ka minisiɗina. An hin hoŋ dira maŋ Lo Ami ni ana koyogina ana, «Agi ni suu mansina.» Asi may ni hin hoŋdira ana, «Loomina». |
Bible Moussey © Bible Society of Chad, 2002.
Bible Society of Chad