GA 8ATAMBARA 9 - Boy Lonana

Suu Israelna ka ɗegee su njaf suu hiniŋaɗi

¹ Agi suu Israelna humugi haa. Cemi wanda agi a calaɗ ni mbo lum ma Yurdaŋŋa, agi tuɗ dik ki ni njaf suu may suu ŋgol suugina, ɦoŋzi masina ŋgolo coco lay, saɓak ɦay lay, gulumuna gii kay ziisina fiyekem ha kolo huulona na ɗow.

² Suu asina wuli ŋgolo cocoo, ni suu Anakŋa. Agi wasiya, agi hum dlara asi daɗta lay ana, sa ma ndak a col fok goryoŋ Anakŋa ni gege?

³ Agi hin wi ki karam ana Yawe Loogina calaɗ mbo lum ma Yurdaŋŋa fokogi ni namu. Nammi kura ŋgalla. Nammi sa ma hin casi kina, dikisi ha ki fokogi ni namu. Agi hin dikisi kiyo, casi ki ni cem cem ko Yawe ɦagi voɗta wandara na.

⁴ Lini Yawe Loogina dikigisina ki fokogi wa ni, agi di ana, «Yawe hinimi a cuk hu mbas ndaɗta tlaɗ ki ni kay ami ni suu ɗegeenara dagi naɗi.» Ni kay ana suu asina li coo Yawe dikigisina ki fokogi ni na.

⁵ Ni ka ana agi ni suu ɗegeena, ni suu hurugi jivina agi cuk hu mbas ndaɗta ni na ka naɗi. A gasira ni suu asina li coo, kay ndaɗta Yawe Loogina dikisi ki ni na. Nam li na ni a li ki ni u vi vun ma vi Yawe ma nam vam u somoyogina, u Abraham u Isaak u Yakob.

⁶ Agi wi ki ana Yawe Loogina ɦagi mbassa jivi ndaɗta ki ni ka ana agi ɗegee a su suu hiniŋŋa naɗi. Kay agi lay ni suu yagi eŋ cocona.

Cora vi suu Israelna min goo mbutl lorra

⁷ Humugi maa kiɗi, humugi mba gagi ana, agi ɓeŋ huu Yawe Loogina ay ŋgoo bagi hu fulla, col ay hu buu ma agi cuk ay ki hu mbassa Egiptera day ta ta hu li ma agi mba tanina, agi ay ni suu gonokka u Yawena.

⁸ Ay u ɦinira Horebpa ni agi ɓeŋ huu Yawe. Nam hurum ɓeŋ ki egegiya hin gin na tok a daɓagi kira.

⁹ Hu li ma an ɗiŋ kolo kay ɦinira a vi ɦini mayra gaɗta ɓiiri hura, ɦinira Yawe vi galamba ay u agira, an kak ay kolo kay ɦinira buuna dok-fiɗi ka ti fuɗi lay, ci yoɗi lay.

¹⁰ Yawe ɦan ɦinira ceɗira ay kom mba, ɓii ay huruɗ ni u cifiɗ ko Lona tamba, u boy ma Yawe dagina ay kolo kay ɦinirana halaŋ, ay duk kura ŋgalla, hu li ma agi ka toki halaŋŋa.

¹¹ Yawe ɦan ɦinira ceɗi mba ndaɗta ay ni hu buu ma dok-fiɗina, ni ɦinira Galamb.

¹² Yawe hin dan ana, «Col kolo zak ɗiŋ ha ki gaa, suu maŋsina ɓalak ki wa, suu maŋ suu aŋ cukusi ay ki hu Egiptena. Asi juɓ ka a li u voɗta an takasiraɗi, asi min fulina lorra ma asi yoorom u kurana kay tasiya.»

¹³ Yawe dan ana, «An wi suu asina, asi ni suu yasi eŋ cocona.

¹⁴ Hinin an liya, an min daɓasi kiyo, an min bulumusi sesi ki duk suu kay ndaŋgarna, aŋ may ni an hin zuluŋ njafaŋ suusiya, saɓak suusi lay.»

¹⁵ An mbuɗ irin a ɗiŋ ay ki kaŋga kay ɦinira, ɦinira yaɗ ki halaŋŋi kura may, u ɦinira ceɗi mbara vii kon may, ni ɦinira boy ma Galamba ɓiiri huruɗta.

¹⁶ An wi ana agi li cora eg Yawe Loogina, agi yoo goo mbutl lorna, agi juɓ ka na nde a hin voɗta Yawe takagirara kiraɗi lay.

¹⁷ An vi ɦinira mba ndaɗta u kon jak tooɗ ki ni fokogi halaŋ.

Goo mbutl lorra u cenda vi Moizza

¹⁸ An kulup kaŋga u hurun fok Yawe ko fok jewra na olo, buuna dok-fiɗi, ti fuɗi lay, ci yoɗi lay, ni kay cora agi laɗta, li dlara ka ii Yawe jiviɗira ɓalakam hurumu.

¹⁹ An li ndaana coco kay yara vi Yawera, nam min daɓagi ki hu ndaŋgana. Na may hu li namma ni Yawe hin humun cen manda olo.

²⁰ Eg Aaron lay ni Yawe hurum ɓeŋ ki egem cocoo, min a gam njafam ki lay. An hin cen kay Aaron may.

²¹ Cora agi laɗ min goo mbutlna ndaɗta, an tlam ŋgalam kiyo, gulukum butum ki na gelek gelek, an cukum butum ha ki duk mbo ma ɓaɗ ay kolo kay ɦinira na.

²² Ay hu Tavera, Massa u Kivrot-Taava agi ɓeŋ huu Yawe ay na olo.

²³ Hu li ma Yawe ay hu mbassa Kades Barnea sunugi dagi ana, «Tuɗugiya, tuɗ tlagi mbassa an min a ɦagirara», agi ciwayra u boy ma Yawe Loogina damma, agi tin hurugi ka kambi, agi humum boy mamma kaɗi.

²⁴ Agi ay gonokka u Yawe ni hu li ma an wagi ayna day.

²⁵ Lini an kuluɓ u vun digin ga fok Yawe buuna dok-fiɗi ni kay Yawe di ana nam min daɓagi kiyo.

²⁶ An cen Yawe di ana, «Bu Suuna, Yawe, ɓeŋ suu maŋsina kiɗi, ni jooŋ ma aŋ gusum ay ki u ŋgol maŋgana, aŋ cukusi ay ki hu mbassa Egiptera ni u saɓak maŋŋa.

²⁷ Humuŋ mba gaŋ kay suu sun maŋsina, Abraham, Isaak u Yakob. Caa yaŋ kay bay vira u cora vi suu asinaɗi.

²⁸ Hu mbassa aŋ cukumi ay ki hura a suuna hin di ana, Yawe ndak ka doli a cuk suu mamsina hu mbassa nam vi vunum kaɗ a ɦasiraraɗi, nam ɓeŋ hurum ki egesiya, kay ndaɗta nam cukusi ay ki ni a tuɗ baasi ki ŋgoo bagi hu fullara.

²⁹ Doliɗi ni asi ni suu maŋsina. Ni jooŋ ma kay taŋŋa, aŋ cukusi ay ki ni u bik koŋ ma saɓakŋa.»