GA 8ATAMBARA 8 - Boy Lonana

Yawe haɗ suu Israelna ŋgoo bagi hu fulla

¹ Gaɗta an haɗagirara halaŋ agi li uɗu, goloɗ jiviya, kay a agi mba lak iiriya, zul coco lay. A agi cuk hu mbas mayra Yawe vi vunum suu tam kaɗ a ɦaɗ maŋ somoyogira.

² Humugi gagi kay tuɗta fiyekka agi tuɗuɗ ay ŋgoo bagi hu fulla basara dok-fiɗira, Yawe tuɗugi ay ni namu. A agi mbuɗ ki haw cocoo, nam tukugi na ni a wagi ki ni hurugiya. A wi ki ana agi ndaki gasi a hum u gaɗ mamba sura may.

³ Nam gagi ki hawra, nam ndagi ki mayra, hin ɦagi manna a tira, fu ma agi u somoyogi lay tam ka dewɗina. Ni kay a takagi ki ana sana kak iirira ni ka kay funa dewɗi, may nam kak iirira ni kay boy ma kal ay ki fun Yawena halaŋ.

⁴ Agi li basara ŋgoo bagi hu fulla dok-fiɗi ni baraw ma cuk tagina mbuɗ ka basiɗi lay, segi gi ka gugufuɗi lay.

⁵ Ni agi ndak wi ki ana Yawe Loogina gaɗagi ni ko sana gaɗ goorommara na.

Ndaŋgara Lona vi vunum kaɗta u ndem maɗta

⁶ Agi gol gaɗta vi Yawe Looginara jiviya, tuɗugi ni hu voɗ mamba, lam ndaaram may.

⁷ Yawe Loogina tuɗugi ni hu mbas mayra jivi ɦayra, mbas mayra mbona hura, goloŋi suu jivina, mbo ma law ay ga u ndaŋgarana, kolo kay ɦinirana lay, ga kay ndaŋgarana lay.

⁸ Mbassa wa blena u orgena jif hu ɦayra, gugutluna, gu tulumma, gu ma yam ana grendiyena, mbassa mbul conona u mbul yumma hu ɦayra.

⁹ Ni mbas mayra may ka cagi huɗira, va ma hin bay agi fam hu mbas ndaɗta kaɗi. Ni mbas mayra ɦinira halaŋŋi kawina dukuɗta. Ҥinira ŋgolora halaŋŋi li ma agi fi kawi ma yoo tlena ay huna.

¹⁰ Agi hin tiya hoɓ lay, agi hin gi deɓ Yawe Loogina kay ndaŋgara jivira nam ɦagira wanda.

Humugi maa Lona kiɗi

¹¹ Lagi tagi jiviya, hin a humugi maa Yawe Loogina kiɗi. Hin a maaram gaɗ mamba, nera u yal ma an haɗagina wanna kiɗi.

¹² Lini agi ti hoɓ lay, lini agi minigi zigini suu jivina kagi lakagi hu lay,

¹³ Lini yoori suu ŋgolona u suu gorina kogi coco lay, gursura u lorra kogi lay, tlesuu zina kogi halaŋ lay ni,

¹⁴ ŋgaagi tagi a maaragi ki kay Yawe Looginaɗi. Nammi sa ma cukugi ay ki hu mbassa Egiptera, hu sunda mbaɓurana.

¹⁵ Nam gologi ay ŋgoo bagi hu fulla ŋgolla, tlesuu cona hu coco lay, ni nam gologi ko guyugina u huuɗura, ay hu mbassa sa ka fi yo ma ci huɗira, nam lawagi mbona ay duk ɦinira lay.

¹⁶ Ay ŋgoo bagi hu fulla nam ɦagi manna a tira, ni fu ma somoyogi lay wam kaɗina. Nam li na ni a gagi ki hawra a tukugi ni kay a agi hin fi jivira ha fokka.

¹⁷ Agi mba ŋga tagi ana, «Ami ɦiz ki ni u saɓak tamiya naɗi.»

¹⁸ Humugi mba gagi ana Yawe Loogina ɦagi saɓakŋa a agi mbuɗ begera na ni namu. Ni kay a li ki u galamba nam vaɗ ay u somoyogira ko agi ka cemmi wandara na.

¹⁹ Lini agi maa ka ki kay Yawe Looginaɗi, lini agi goɓogi loogi suu daŋŋa, li usiya ni, an dagi dlara kagira ki cemi wanna, agi hin ba ki ni halaŋ halaŋ.

²⁰ Ni ko ndal njaf suu daŋ suu Yawena baagisina ki fokogi wanna na may, agi hin ba ki ni ko ndaɗta na may. Ni kay agi hum vun Yawe Loogina kaɗira.