GA 8ATAMBARA 7 - Boy Lonana

Suu Israelna ni suu Yawe manasi ki mamma

¹ Hu li ma Yawe Loogina cukugi hu mbassa agi tlaɗ ki wanda, nam dikigi njaf suuna ki zeɗ zeɗ suu zuli coco suugina, suu Hitna, suu Girgasina, suu Amorna, suu Kanaanna, suu Perizna, suu Hivna, u suu Jebusna, njaf suuna zeɗ zeɗ kiɗisiya suu zuli coco suugina, saɓak a suugi lay.

² Hu li ma Yawe Loogina hinigisina ki kogina ni agi casi ki halaŋ. Aŋ ka vi bana u asiɗi, ka aŋ wasi hahawasiɗi lay.

³ Agi ka li dlara ɗumugi goryoŋ taginaɗi lay, agi ɦal gorɓii magisina maŋ goryosiɗi, ɗumusi gorɓii masisina maŋ goryogiɗi lay.

⁴ Kay dla ndaɗta pereɗ huu goryogi ki a sununda, asi hin mbuɗ sunni loogi suu ɦawana. Li wa na ni yara vi Yawera hin mba kagiya. Nam mba daɓagi ki duk suuna hu duliyara tani.

⁵ Gola ni dlara agi hin laɗ eg suu Asenara. givin ma togolla masi agi hawaɗam kiyo. Foto tlesuu asi minisina agi toosi kiyo, tlegeyesi suu teteɗ suu asi pasina agi kususi kiyo, tlesuu asi goɓosina agi ŋgalasi kiyo.

⁶ Kay agi suu hin tagi ki maŋ Yawe Looginana. Yawe, Loogina managi ki ni namu, a mbuɗugi ki suu mam suu kay tamma duk njaf suu kay ndaŋgarna halaŋ.

Ɗegee Yawera kay galam mamba

⁷ Yawe minigiya, managi kiyo, ni ka ana agi zuli a su njaf suu hiniŋŋa naɗi, agi ni kaɗaki suu njaf suu hiniŋŋa na ɗow.

⁸ Lini Yawe u kom ma saɓakŋa cukugi ay ki wa, suɗugi ki ko mbaɓura wa, ko Faraw mul ma Egiptena ni kay Yawe minigiya, vi vunum ay ni u somoyogi day.

⁹ Agi wi ki ana Yawe Loogina ni Lona, ni Lo ma gasina, nam li u galam mamba, ɗegee mamba tuɗ ta ta kay njafna ha fok na gak gak buɓ kay suu may suu minimma suu li u gaɗ mambana.

¹⁰ Na may suu ka minimbina, nam kaasi ɓakŋa kasi ni cem cem gaw, baasi kiyo.

¹¹ Agi gologi gaɗta, nera u yal ma an dagina wannana jiviya, lagi u gaɗ ndaɗta jivi may.

¹² Lini agi hum u gaɗ ndaɗta jiviya, lini agi so tagi a li uɗ may, Yawe Loogina hin li u vivun ma kay galamba nam vaɗ ay u somoyogira ɗegee may.

¹³ Nam hin minigiya, hin paɗ vunum ki kagiya. Nam hin zulugi cocoo. Nam hin paɗ vunum ki kay njafagiya, paɗ vunum ki kay tlesuu agi zaarasi gana lay, wa blena, sum veŋŋa u mbul ma tira. Dogoni mbutlina zul cocoo, timigiina zul coco lay ko nam vi vunum ay u somoyogi a ɦagisinara na.

¹⁴ Agi ni suu paɗvunna li ki kagi a su suuna halaŋŋa, vo varagi ni va ma ba bay vuɗ kaɗi. Suu warna u yoorina lay vuɗ halaŋ halaŋ.

¹⁵ Yawe hin dikigi tuguɗira ha ki egegi na day, ko tuguɗii bora ta ndi ay kay suu Egiptena. Agi waɗ ay u irigi lay, nam ka hinigira mbay kagiɗi. Nam dikiɗ ha ki ni kay suu babali magisina na ɗow.

¹⁶ Agi ci suu may suu Yawe hinigisina ki hu duk kogina ki halaŋ juɓbi, agi ka sunusi loogi masisinaɗi, asina ni daw ma guni fokogina.

Yawe ni sa ma gol suu mamsinana

¹⁷ Saaragi hurugi ana, «Njaf suu asina wanni zuli suumiya, ami hin ndak a dikisi ni nanage naɗi.»

¹⁸ Lagisina ndaarasiɗi, humugi gagi kay dlara Yawe magina laɗ ay eg Faraw u suu Egiptena wandara.

¹⁹ Tukka ŋgol ndaɗta agi waɗ ay ni u ii tagira, dlara mbuɗ mbuɗta u takka daŋga zeɗ zeɗ. Humugi gagi kay ko Yawe ma saɓak cocona, Loogina hu li ma nam cukugi ay ki hu Egiptena. Ko ndaɗta na may Yawe Loogina hin li u suu bolow suu agi lasi ndaarasi wanna ni na may.

²⁰ Suu may suu ŋgay tasi ki kogi agi fasi ka a casiɗina, Yawe hin cukusi caŋga-dluunukŋa kasi daɓasi ki halaŋ halaŋ.

²¹ Dlak tagi ndaa kosiɗi, kay Yawe Loogina nam ka dukugiya, Lo ma ŋgol ma dlam cocona.

²² Yawe Loogina dikigi suuna ha ki fokogi ni na nde nde, agi ka ndak a daɓasi ki na zak gawɗi, li ka naɗi ni vaɓakgi suu ŋgoo bagi asina hin mbuɗ zuli coco a su kagiya.

²³ Doli ɗini Yawe Loogina ɦagi njaf suu asina halaŋ ki ni hu duk kogiya, nam gasi ndaa ma ŋgolna dukusiya, ta ta ba njaf suu asina ki halaŋ halaŋ.

²⁴ Nam ɦagi muli masisina ki hu duk kogi lay. Agi bulumusi sesi ki hu duliyara halaŋ, ma dew ma hin a col fokogi kaɗi, ta ta agi hin daɓasi ki halaŋ.

²⁵ Fuli masi suu li ɓivunna maŋ loogi suu ɦawana agi ŋgalasi kiyo, agi viɗ ii tagi a vagi tagi hu daw masina a ɗokosi barawi masi suu u lorra u tusunaɗi. Dla ndaɗta ni pan ni Yawe Loogina.

²⁶ Tlesuu ay vi suu asinana bel agi kal va ma fuli vo hu ziigiɗi, li wa na ni hin caki ki ni ko casira na may. Agi ŋgalasi ha ki ni u tlegeyesi halaŋ halaŋ. Kay asi ni suu Bu Suuna gasi vunna kina.