GA 8ATAMBARA 6 - Boy Lonana

Aŋ min Yawe Looŋŋa

¹ Gola ni gaɗta, yalna u nera Yawe Loogina takanda ana an haɗagira, agi may ni li uɗu, goloɗ jivi hu mbassa agi hin tok a cuk huruɗ cemi wandara.

² Agi lagi ndaa Yawe Lo maŋŋa, agi tagira u goryogiya u gor ŋgologi magisina lay. Kay ana hu buuna halaŋ agi hum u gaɗta, yalna u nera an haɗagira wanda. Kay a buu magina ɦuɗ fok ŋgol kay ndaŋgara may.

³ Agi suu Israelna humugi haa, lagi uwa, ni agi hin fi saɓakŋa agi hin zul coco ko Yawe vi vunum u tamba dira na, Lona vi somoyogiya, hu mbas mayra law mbiira u mbul yumma.

⁴ Humugi haa agi suu Israelna, Yawe Looygina ni Yawe, nam dew daŋ.

⁵ Aŋ min Yawe Looŋŋa u huruŋ halaŋ, u mbalataŋ halaŋ, u saɓakaŋ halaŋ may.

⁶ Boy ma gaɗ ma an dagina karam wannana ŋgayam hurugi jiviya.

⁷ Agi ɗogom ka maŋ goryogi olo olo, agi dasina hu li ma agi laki gana, hu li ma agi tuɗ hu voɗtana, hu li ma agi buuri gana, hu li ma agi coli kolona lay.

⁸ Aŋ njun gaɗ ndaɗta ki del koŋ a takaɗ kira, ni ɓis mayra aŋ ka waɗ u iriŋ tew tewra.

⁹ Aŋ ɓii gaɗ ndaɗta ki kolo vun goŋ maŋga, ɓiiriɗ ki vun kaa ma kal ha vo hu ɦoŋzinana lay.

Lini nanagelay suu Israelna maa Loosina kiɗi

¹⁰ Hu li ma agi cuk hu mbassa Yawe Lona suu tam a ɦaɗ maŋ somoyogira, Abraham, Isaak, u Yakobpa wa, ni mbassa ɦoŋzina huruɗ cocora, zi ma jivi ɦay ma agi minim kaɗi layna.

¹¹ Zi ma tlesuu jivina oy hu cocona, bege mayra agi taaraɗ ka agiɗi layra, goloŋga coco lay agi vegeɗ ka agiɗi lay, gugutlura u gu conona suu agi pasi ka ni agiɗi layna. Agi hin fi tlesuu tira a ndakagi ki u mayagina ha hu cocoo.

¹² Lagi tagi jiviya, maaragi ki kay Yawe ma cukugi ay ki hu mbassa Egiptera nadi, nammi sa ma buɗugi ay ki hu mbaɓurana.

¹³ Agi li ni ndaa Yawe Loogina dew, agi sunummi nam dew, agi suu tagi ni u sem dew daŋ.

¹⁴ Loogi suu vi suu ɦawana agi tuɗ usiɗi, suu ŋguyugina halaŋ.

¹⁵ Kay Yawe Loogina dukugi ni Lo ma hurum ya cocona, lagi tagi jiviya hin a yara vi Yawe Looginara mbuɗ kagiɗi, ka a nam daɓagi ki hu duliyara taniɗi.

¹⁶ Agi ka tuk Yawe Looginaɗi, ko ndal agi lam ay hu Massara naɗi.

¹⁷ Agi ŋgomogi gaɗta u nera u yal ma vi Yawe Looginana jiviya u dlara nam ɓiiriɗta halaŋ.

¹⁸ Aŋ li ni dlara jivi ɗegeera ii Yawe, a kak u furira kal hu mbas mayra Yawe vi vunum kaɗ u somoyoŋga.

¹⁹ Ҥuɗuŋ suu babali maŋsina ha ki egeŋ day, ko Yawe dira na.

²⁰ Ha fok dayra goryogi li joɓogi ana, «Ni kay mege Yawe Looygina ɦal gaɗta, nera u yalna nanige?»

²¹ Aŋ hin di ka maŋ gooroŋ ana, «Aygi ay ki ni mborɓiina vi Faraw hu mbassa Egiptera, may Yawe cukuygi ay ki ni u bik kom ma saɓakŋa hu mbassa Egiptera.

²² Yawe li dlara mbuɗ mbuɗta ami waɗ ni u irimiya, kay hahawra vi Faraw u suu mamsina u mbassa Egiptera halaŋ.

²³ Ami may ni nam cukumi ay kiyo, a cukumi ki hu mbassa nam vi vunum suu tam ki kaɗ u somoyoygi a ɦaygira ki wandara.

²⁴ Yawe gaɗami ka ana gaɗ ndaɗta halaŋ nera u yalna ami li ka usiya, li ndaa Yawe Looygina, kay a aygi lak furi hu buuna tew tew, a nam goloygi iiri ko aygi ka cemi wanda na.

²⁵ Aygi hin lak ɗegee lini aygi li u gaɗ mamba jiviya, fok Yawe Looygina ko nam dira na.»