GA 8ATAMBARA 5 - Boy Lonana

Gaɗ Lonara doogora

¹ Moiz yi suu Israelna ay halaŋ dasi ana, Agi suu Israelna humugi haa, gaɗta u nera an min haɗagira wanda ni agi humuɗ ki jiviya haɗaɗ lay, saa kaɗu, li uɗ tew tew may.

² Yawe Looygina vi galamba ay u aygi u ɦinira Horebpa.

³ Galam ndaɗta Yawe vaɗ ni ka u somoyoygiɗi, ni u aygiya, aygi suu ka cemi iiri wanna.

⁴ Yawe ɓak ki u agi ni u vun tamba ay kolo kay ɦinira duk kura ŋgalla.

⁵ An may ni ay coli duk ɦoŋ Yawe u agiya, ni a jokogi boy ma vi Yawena kira, kay agi li ndaana coco ko kura. Agi ɗiŋ ay ka kolo kay ɦiniraɗi. Nam di ana,

⁶ «Anni Yawe Lo maŋŋa, ma kalaŋ ay ki hu mbassa Egiptera, ay ki hu mbaɓurana.

⁷ «Aŋ vi lo ma daŋ kaŋgi ni kan anu.

⁸ «Aŋ mba vi u loogi suu ɦawanaɗi u tlesuu kolo huulonnaɗi lay, u tlesuu ga kay ndaŋgaraɗi lay, tlesuu ga duk mbona u ndaŋgara ganaɗi lay.

⁹ «Aŋ mba goɓ ga fok fulinaɗ, sunusiɗi lay, kay Anni Yawe Looŋŋa, Lo ma hurum ya cocona, an tin cora vi somira ha kay goryosiya, ha kay njafasi fokosi hindi lay, fiɗi lay, lini asi ka hum unɗi.

¹⁰ May kay suu li u gaɗ manda an li jivira ha kay njafasi fokosi buɓ buɓ lay suu minin gaɗ manda li uɗ mayna.

¹¹ «Aŋ yi sem Yawe Lo maŋŋa ɦawa na gorɗi, kay Yawe kaɓakŋa kay suu yam sem gor gorna.

¹² «Humuŋ gaŋ kay buu ma koɗ tara, buu namma aŋ golom ki teteɗ ko Yawe Looŋŋa daŋga na.

¹³ «Aŋ li sun maŋga hu buuna karkiya, ni aŋ li sun maŋga halaŋ.

¹⁴ Na may hu buu ma kiɗisiyana ni buu ma vi Yawe Looŋŋana, aŋ ka li sun hu buu nammaɗi, taŋga, goroŋ ma njufna lay, goroŋga tamara lay, saaŋ ma li sunda varaŋŋa lay, gora li sunda varaŋga lay, yoori maŋsina lay u koy ma mbay varaŋŋa lay. Kay ana saaŋ ma sunuŋŋa u goora sunuŋga koɗ tasi ni ko aŋ koɗ taŋga na may.

¹⁵ Humuŋ gaŋ kay mbassa Egiptera hu li ma aŋ ay mbaɓurana, Yawe Looŋŋa kalaŋ ay ki u bik kom ma saɓakŋa, kay ndaɗta Yawe Looŋŋa ɦaŋ voɗta ana aŋ saa kay buu ma vi Lonna.

¹⁶ «Aŋ hum u gi buŋ u suŋ jiviya ko Yawe Looŋŋa gaɗaŋga na, kay a buu maŋ ma Yawe ɦaŋŋana mbuɗ fok ŋgol kay ndaŋgara may, aŋ kak u tara fanira may.

¹⁷ «Aŋ ci maɗɗi.

¹⁸ «Aŋ li zoŋgaɗi.

¹⁹ «Aŋ kulɗi.

²⁰ «Aŋ ka boyna eg ndaraŋgi.

²¹ «Aŋ ŋgiziɗ caŋ ndaraŋŋaraɗi. Aŋ ŋgiziɗ ziŋ ndaraŋŋanaɗi, aŋ ŋgiziɗ sene ma vi ndaraŋŋanaɗi, ŋgiziɗim saam ma sundaɗi lay, goora li sunda varambaɗi lay, mbutl mammaɗi lay, koro mambaɗi lay, tlesuu varamma maa na nde lay aŋ ŋgenembi.»

²² Boy namma Yawe dam ki ni hu li ma agi tokkina halaŋ ay kolo kay ɦinira duk kura ŋgalla, duk ɗugulla, duk ŋgik mayra ŋgolla, ni u della saɓakŋa nam cuk va ma daŋ ka huɗi, ɓii boy namma ay ki kay ɦinira mba' handa ay konu.

Moiz ni sa ma duk ɦoŋ Lona u suunana

²³ Hu li ma agi hum della ɓak ay duk ndufunda ŋgolla ay kolo kay ɦinira duk kura ni, suu magi suu ŋgolo suu fokogina ɦuɗ tasi ay egen halaŋŋi u njafagi dew dew bel.

²⁴ Asi ɓak ay kay segi ana, «Gola Yawe Looygina tak bibiŋil mamba ki wa u ŋgol mamba lay. Aygi humum delem ɓak ay duk kura, cemi ni aygi wi ki wa ana Lona ndak a ɓak u sana, hin sa namma kak iiri lay.

²⁵ Cemi ni ami a ci tami ki u kura ŋgol ndaɗta ni kay mege? Lini ami hum del Yawe Loomina na gak gakgi ni ami hin miɗ kiyo.

²⁶ Sa war ma hoy hum del Lona ko ami humuɗ wanda na, ɓak ay duk kura sa namma hin kak iiri may ni kaɗi.

²⁷ Aŋ Moiz ni sa ma ɦuɗ taŋ ha tok hum boy ma vi Yawena ay halaŋ, aŋ hin mba jokomi boy ma Yawe Looygina damma kiyo, ami hin hum boy namma, li um may.»

²⁸ Boy ma agi danna namma Yawe humum halaŋ. Yawe dan ana, «Boy ma suuna daŋŋa wanna an humum halaŋ. Asi li jiviya kay asi di ko ndal wandara na.

²⁹ Lini asi min gasi a lan ndaaranu, a li u gaɗ manda hu buuna tew tew may ni, kay jivi masira kay goryosi lay ha na gak gak.

³⁰ Tuɗ dasi asi hoŋ vo hu mbutluɓ masina.

³¹ Aŋ may ni hin ka coli egen tani, an min daŋ gaɗta ha ki halaŋ halaŋ. Gaɗta u nera aŋ tuɗ haɗasira asi li uɗu, ha hu mbassa an hin ɦasira a asi lak hura.»

³² Agi may ni lagi tagi jiviya, lagi ko Yawe Loogina haɗagira na, viɗigi tagi a nda bik njuf may gulu mayɗi.

³³ Agi tuɗugi tew tew ni hu voɗta Yawe Loogina haɗagirara, ni kay ana agi hin lak iiriya. Agi lak u furira a buu magina ɦuɗ ha fok hu mbassa agi hin a lak hura may.