GA 8ATAMBARA 4 - Boy Lonana

Lagi u gaɗta vi Lonara

¹ Cemi ni agi suu Israelna humugi haa, humugi gaɗta u nera an min haɗagira karamba haa. Agi li u haɗ ndaɗta kay a agi lak iiriya, a hin cuk hu mbassa Yawe ɦagirara, Lo ma vi somoyogina.

² Gaɗta an ɦaɗagira wanda agi cuk va ma daŋ dukuɗɗi, agi yow va ki uɗɗi lay, ni kay a li u gaɗta vi Yawe, Loogina, ta an ɦaɗagirara.

³ Dlara Yawe laɗ ay hu Baal Peorra agi waɗ u irigiya, suu may suu joɓ Baal ma vi Peorna halaŋ Yawe, Loogina, daɓasi ki dukugi halaŋ.

⁴ Na may agi suu tin hurugi kay Yawe Looginana ka iiri ta ta cemi.

⁵ Gologiya an min haɗagi gaɗta u nera ko ndal Yawe Loonna haɗandara na. Ni kay a agi li u gaɗ ndaɗta hu li ma agi cuk hu mbas mayra agi hin lak huruɗta.

⁶ Agi gol haɗ ndaɗta jiviya li uɗ may. Ni boy ma hin mbuɗugi neey may, mbeleŋ coco ii suuna mayna, asi hin ɓak kagi ana, «Suu bolow coco asina wanni yal ɦay, asi mbeleŋ coco lay.»

⁷ Suu may suu bolow ko aygi na suu loogi masisina hum usi ko ndal Yawe Looygina humuygi hu dlara aygi yamba halaŋga nana ni suu taarage?

⁸ Ni suu bolow suu taara gaɗ masira a li ki ɗegee kora an haɗagira wanda nana ni suu taarage?

Dlara ŋgayra ay kay ɦinira Horebpa

⁹ Na, agi may ni gol tagi jiviya, hin humugi a maa ki kay tlesuu agi wasi ki u irigi wannaɗi, hin tle asina a bulum ki hurugiɗi. Agi haɗasi ka maŋ goryogi lay, maŋ gor ŋgologi magisina lay.

¹⁰ Hu li ma Yawe dan boyna ay u ɦinira Horebpa ni agi ay coli egenu, Yawe dan ana, «Tokon suuna ay egenu, an min ɓakasi boy manna a asi haɗam a lan ndaaran hu li ma asi ka iiri tu kay ndaŋgara tanina. A asi haɗ boy namma ka maŋ goryosi may.»

¹¹ Hu buu namma agi ɦuɗ tagi ay eg ɦinira coli u segiya, yam ɦinira ki u kura halaŋ ta ta i tew ha ki kolo huulona, duk ndufunda ni li kura gak duk njeŋgera.

¹² Yawe ɓak ay u agi ni duk kura, della ɓaka agi hum lay, may wi sa ka u irigiɗi kama, humugi ni della ɓakŋa doy hol.

¹³ Nam dagi ki kay dla galam mamba vaɗ u agira, u boyna zeɗ zeɗ doogo, dagi ana agi mba li u boy namma nam ɓiirigi boy namma kay ɦinira zeɗ zeɗ mba'.

¹⁴ Man an may ni Yawe dan ana an haɗagi gaɗ ndaɗta u nera kay a agi hin li uɗu, ha hu mbas mayra agi tuɗ lak hura.

Gaɗasi kay asi goɓ loogi suu ɦawanaɗi

¹⁵ Gologi tagi jiviya hu li ma Yawe ɓakagi ay kay ɦinira Horebpa duk kura ni agi wi ŋgus va ka u irigiɗi.

¹⁶ Ka agi tuɗ ɓalak tagi ki a min fulinaɗi, minda min ŋgus tlena, min sa war ɗowba min cara a lonara.

¹⁷ Min vabak megelay ma kay ndaŋgara tanina, ɗowba min foto layagi suu pii kolona.

¹⁸ Min tlesuu ɦaram kay ndaŋgara, ɗowba min foto kuluf ma duk mbo lumma ga u ndaŋgarana.

¹⁹ Ka agi gol irigi kolo huulona wi gi faɗta, tilna u ciciwra tlesuu kolo huulonna halaŋ a zuɗugi a goɓ ga fokosiɗi, a sunusiɗi lay, kay asi ni tlesuu Yawe Loogina tunusi kolo huulona ni maŋ suu kay ndaŋgarana halaŋ.

²⁰ Na may agi ni suu Yawe yowogi kiyo, nam cukugi ay ki hu mbassa Egiptera, kura ŋgal ndaɗta ni ko jojokka yoo kawi ma vagi ga namma kira, na ni kay a agi mbuɗ ki suu mamsina, ni a joomma ko agi ki cemi wandara na.

²¹ Yawe hurum ɓeŋ ki egenni kogiya, nam suu tam ki ana an ka calaɗ mbo lum ma Yurdaŋŋa kiɗi, ka an kal hu mbas mayra jivi ta Yawe Loogina ɦagira a jonoraɗi.

²² An hin miɗ ni hu mbassa wandara ka calaɗ lum ma Yurdaŋŋaɗi, agi may ni hin calaɗ lumma tuɗ ki ii hiniŋa, lak hu mbassa jivi ndaɗta.

²³ Gologi tagi jiviya, ka humugi maa ki kay galamba Yawe, Loogina, vaɗ u agi wandaraɗi, goɓogi fulinaɗi, u tlesuu Yawe, Looŋŋa, dooroŋ ki kasina bel aŋ goɓosiɗi.

²⁴ Kay Yawe, Loogina, ni kura ŋgalla, nammi Lo ma hurum ya cocona.

²⁵ Hu li ma agi vuɗ gorra wa, u gor ŋgologi magisina mbuɗ wa, agi basaɗ ki coco hu mbas ndaɗta wa ni, lini agi ɓalak tagi a goɓogi loogi suu ɦawana, minigi fulina tlesuu ɦawana, lini agi li dlara ka ii Yawe, Loŋŋa, jiviɗira a ɓalakam hurumu,

²⁶ Cemi ni huulona u ndaŋgara duguygi a vovoɗta ni asiya, agi hin ba ki ni halaŋ hu li ma agi calaɗ lum ma Yurdaŋŋa hin lak hu mbas ndaɗtana, buu magi ma kay ndaŋgarana ka ɦuɗ fok oloɗi, agi hin daɓ ki miɗna ni halaŋ halaŋ.

²⁷ Yawe hin njayagi ki duk suuna, njafagi hin hin duk njaf suu hu duliyarna ni na ew daŋ. Yawe hin tuɗugi hu li ma nam min tuɗugi huna.

²⁸ Hu li namma agi hin sunni loogi suu sana minisi u komma, gugunina, ɦinira, tlesuu irisi ka wiɗi lay, ka humbi lay, ka ti vaɗi lay, tasi ka tuɗusiɗi lay na.

²⁹ Ha hu li namma ni agi hin hal Yawe, Looŋŋa, agi hin famu lini agi halam u hurugi halaŋ u musukugi halaŋ.

³⁰ Hu li ma agi ka hu yoora, lini dlara yoora fagi wa hu buu ma ha fokŋa, agi hoŋogi ay eg Yawe, Looŋŋa, agi mba humum delemu.

³¹ Kay Yawe Loogina ni Lo ma wi hahaw suuna, nam ka hinigi kiɗi, nam ka ɓalakagi kiɗi, humum ka maa kay Galamba nam vaɗ u somoyogiraɗi.

Manda mbuɗ mbuɗta vi Lona

³² Saaragi kay dlara jak ay ki fok jewra gige, tlesuu li ay ki fok jew bay Lona min sa warna tu layna. Joɓ tagi gige u vun ndaŋgara tun ayra ta ta u daɓ maɗta, dlara mbuɗ mbuɗ ta ŋgol li kaɗi su? Sa hum dlara li ko ndata na ki dew su?

³³ Sa hum dla kay suu daŋ dew ana loosina ɓak ay duk kura, suu asina hin laki iiri may ka su?

³⁴ Ɗowba lo ma ɦawa maa tuk tam dew a mba duk suuna a tlasi ki a suu mamsina u takka ko wanda na ka su? Ma duu kay suu mamsina u bik kom u saɓakŋa li ndaana coco ko ndal Bu Suuna Loogina li ay kagi hu Egiptera na ka su?

³⁵ Yawe takagi dla ndaɗta ki na ni kay agi mba wi ki ana nam dew ni Lona, lo ma daŋ ma ko nam na kaɗi.

³⁶ Ay kolo huulona agi humum delemba ɓakŋa kiyo, ni a haɗagira, kay ndaŋgara tani nam takagi kura ŋgolla, ay duk ku ndaɗta agi humum delemba ɓakŋa.

³⁷ Kay ana nam minigi somoyogiya, nam manasi njafasi ma hin ka daganna, nam cukugi ay ki fokom hu Egipte, ni u saɓak mam ma ŋgolna.

³⁸ Suu bolow suu zuli suugina nam dikigisina ki fokogiya, nam ɦagi mbas masira kiyo, ni dlara li cemi agi waɗ ki u irigi wanda.

³⁹ Wagi dla ndaɗta ki u tagira cemi, haɗagira lay. Yawe nam dew ni Lona kolo huulona lay, kaŋga kay ndaŋgara lay va ma daŋ kaɗi.

⁴⁰ Ŋgomogi gaɗ mamba u yal mamma an haɗagina cemi wanna jiviya, ni a lagi jivira ni magi agi u goryogi suu hin hin ka ŋgoorogi daganna, kay ana buu magi ma kay ndaŋgarana ɦuɗ foko, ko Yawe cukugi buuna ha fun magina na tew tew. Yurdaŋŋa

Ҥoŋzi ma ŋgayra hindi ii u maɗiina vi mbo lum ma

⁴¹ Moiz man ɦoŋzi ŋgolona hindi ii u maɗiina vi mbo lum ma Yurdaŋŋa.

⁴² Ni a li ma ŋgayra kay sa ma kom paɗ ci maɗtna ka u min mambaɗina ci sa ma dukusi ka gonok jewɗi layna kina, nam tuɗ ŋgay tam ki hu zi ma duk zi ma hindi namma wa ni iiri mamba hin suɗa.

⁴³ Ҥoŋzi ma hindi namma ni Beser ŋgoo bagi hu fulla hu ɦuɗugumba ni maŋ njaf suu vi Rubenna. Ramot hu mbassa Galaadta ni maŋ njaf suu vi Gadna u Golan hu mbassa Basanda ni maŋ njaf suu vi Manasena may.

BOLLA MOIZ DA Ɗ A MBARA 4.45—11.32

⁴⁴ Gola ni gaɗta Moiz daɗ maŋ suu Israelnara.

⁴⁵ Gola ni gaɗta u nera Moiz jogoɗ ki maŋ suu Israelna hu li ma asi cuk ay ki hu mbassa Egiptera.

⁴⁶ Ni hu li ma nam ay ŋgoo lum ma Yurdaŋŋa ii u maɗiina nana. Hu ɦuɗugumba vok tam u zi ma Bet Peorna, ni hu mbassa vi Sihon, mul ma vi suu Amorna ziim ay cuki ni hu Hesbon, Moiz u suu mamsina cam ki hu li ma asi cuk ay ki hu mbassa Egiptena.

⁴⁷ Asi cuk ki hu mbas mamba u mbassa vi Og, mul ma Basanna may. Suu asina mba ni muli suu vi suu Amorna, ay keŋ lum ma Yurdaŋŋa ii u maɗiina na.

⁴⁸ Col ay hu Aroer fun lum ma Arnonna na tuɗ ta ta u ɦinira Siryonni ana ɦinira Hermonda,

⁴⁹ U mbassa Arabara fun lum ma Yurdaŋŋa ii u maɗiina na ta ta tew ga u ɦinira Pisgara may.