GA 8ATAMBARA 32 - Boy Lonana

¹ Huulona tin humuŋ humun boy ma an damma haa. Ndaŋgara hum dlara an daɗta haa.

² Ko haɗ manda si ha ki ko yo lona na. Ko boy manna soo ga ko mbaɗagira na. Ko yo lona ɓaɗ kay usu ma ŋgolomma na.

³ An yi sem Yawe. Agi may ni wagi ŋgolla vi Looyginara.

⁴ Nammi Ҥinina, sun mamba halaŋ u voɗoɗu, Voɗ mamba tuɗta halaŋŋi ɗegee. Ni Lo ma ɗegeena, dlara guni ka hurumbi. Nammi gasi u ɗegee.

⁵ Agi irimmi suu cona, agi ka li ko ndal goryom gasi naɗi. Ni njaf suu li dla cora suu ki ɓalakina.

⁶ Dlara a ŋga Yawera li ni na su? Agi suu laɓana, suu yal masi kaɗina. Nammi ka bugi ma laginaɗi su? Nam lagiya mbuɗugi ki a njaf suuna kay tagiya.

⁷ Humugi gagi kay buu ma ay ki fok jewna, joɓogi suu maarina kay dlara jak ay ki fokka, kay njafna tin ayna tuwa. Joɓogi somoyogiya, asi hin dagiya. Joɓ suu ŋgolo magisina asi hin dagiya.

⁸ Hu li ma Lona ma kolo dayna ɓorow mbassa maŋ suunana, nam ka ii hakara ki ko njaf suuna zeɗ zeɗ u ndum goryoŋ Israelna halaŋ.

⁹ Yawe man suu Israelna ki ni a suu mamsina nam ka golosiya, Yakob ki ni a joomma.

¹⁰ Nam ŋgaf suu mamsina ki ŋgoo bagi hu fulla, hu li ma ki ŋgoo bagi duk gura wasna, nam ŋguyusi yasiya, ka haɗasi lay. Nam ka saa kasi ni ko ndal zo zoy irim na.

¹¹ Nammi ko bak ma haɗ yal piira maŋ goyomma na, nam ŋguy kolo kasiya, daɓ saɓakam bel ni kasiya, nam yowosi koloo, lakasi kay garaŋamu.

¹² Yawe dew ni sa ma ka gol suu mamsinana, loogi suu daŋ suu koyogi ka egembi lay.

¹³ Nam yowosi ki kolo kay yam ɦinira, asi ti ni tlesuu jivi hu senena, asi paɗ yum ma hu ŋgil ɦinirana, asi yoo mbul conona kolo kay ɦinira.

¹⁴ Mbul mbiira u mbii timigiina, mbul gor timigiina, gamlagi suu hu Basanna u ŋgegina, ti wa ble ma jivina, ci sum veŋ ma tlaw ma ndi ki cocona.

¹⁵ Suu mamsina ɦis ki wa, mbuɗ ki suu gonokka, asi ɗoo ki wa, ndi ki mbala cocoo, noy Lona ma lasina kiyo, mbuɗ sa ma njun kasi ma suɗusi kina ki zolona.

¹⁶ Asi ɓeŋ huu Lona u goɓpa asi goɓ loogi suu ɦawana, asi mbuɗum yara u dlasira asi laɗta.

¹⁷ Asi li ɓivunna maŋ fuli suu ka Lonɗina, asi cen loogi suu asi ka wasiɗina, asi goɓ tlesuu cuk ay ki wilina, suu somoyosi wasi ay kaɗi layna.

¹⁸ Ҥini may ma vuɗugina agi ka golom jiviɗi. Agi maa ki kay Lona ma cukugi ga kay ndaŋgarana.

¹⁹ Yawe wi dla ndaɗta na ni irim co ɦay. Nam noy goryom suu njufiina u suu tamagina kiyo.

²⁰ Nam di ana, «An min ŋgay tan ki irisiya, an hin golosi dlara hin fasi ha fokka tuwa. Kay asi ni njaf suu dlasi cona, ni ka gor suu aŋ sa caa yaŋ kay dlasiraɗi.

²¹ Asi ɓalakan hurun ki u fuli masisina wa, asi mbuɗun ki yara u goɓ masira goɓ fulinara. An may ni hin ɓalakasi hurusi ni u suu ɦawana suu ka suu mansinaɗina may, suu asina hin ɓeŋesi hursi ki may.

²² «Yaanda col ay hurun ko ndal kura na, ŋgal ta ta tuɗ tew ay ki eg lina vi suu miɗina, ndaɗ ŋgal ndaŋgara ki u tlege suu kaɗna halaŋ. Ta ta kura tuɗ tew ay ki eg u ɦinira ay ŋgaari kaŋgara.

²³ An hin tokosi dlara hahawra ha ni kasi halaŋ halaŋ. An hin munusi mbuuru manda ha ni kasi na dew dew.

²⁴ Hu li ma asi maŋ ki ko mayra casira wa ni tuguɗira cora ndi kasira, ni hin sunusi vabakgi suu cona ay kasi olo, cukusi guyugi suu ci suuna ay kasi lay.

²⁵ Ha ki keŋŋi ŋgew valaŋga ka casi goryosi ay gak may, vo usi ni dlara lasi ndaana ka coco may. Goozoŋŋa u gootamara jeŋira ni na lay. Su gorra u sa ŋgol ma yam ɦussa miɗ ni na lay.

²⁶ «An di ki u vun tanda ana an hin toosi ki ni na gelek gelek. An hin bulumusi sesi ki duk suu warna.

²⁷ Va ma an li ndaana dew ni kay suu babali mansina hin ŋga tasi ana, ami su kasi ni u saɓak tamira, ka hin a di ana Yawe li dla ndaɗta ni namuraɗi.

²⁸ Suu Israelna ka saa vaɗi, yasi ka li sunda jiviɗi.

²⁹ Lini asi ni suu wi dlaa ni asi ii a hum gini, asi hin saa gin kay iiri masira ha fokka may.

³⁰ Sa ma dewna hin su kay suu buɓma ni nanage? Suu mba' daŋŋa hin su kay suu buɓ buɓ doogona ni ana mege? Ni tak ki ana Ҥini masina gususi ki ni namu, ɦasi ki ni Yawe u tamba naɗi su?

³¹ Suu duu asina lay wi ki ana fuli masina ka saɓakgi. Asi ka ko ndal Lo ma vi suu Israelna naɗi.

³² «Suu duu masisina lay ni ka su kay suu Sodomma u Gomorraɗi, asi ni ko ndal gugutlu ma vuɗ vuɗta cora, mboom ci suuna kina na.

³³ Sum veŋ masina ni ko ndal ŋgis guyugina na.

³⁴ Gola ni dlara an miniɗ ay ki kon ŋgay gumunda. Ni dlara an ŋgayaɗ ki kon kasira.

³⁵ Sa sukulna u warak ma warak sana ni kon anu, cemi ni li ma col sesi huna ka tuwa, buu masi ma yoora hinni na tok daŋ. Dlara miniɗ ka ki kasira ka a juɓ ta ta oloɗi.»

³⁶ Yawe hin kaɓakŋa kay suu mamsina, humum hin gam kay suu mam suu sunda, hu li ma nam wasi asi mbuɗ ki maŋi cocona, sa ma njun kasi ka oloɗi layna.

³⁷ Nam hin dasi ɗaŋŋi ana, «Looki masisina ni arage? Ҥini magi ma agi ŋgay tagi umma ni arage?

³⁸ Suu may suu kom mbul tlegeyesi suu ɓivunna u ci sum veŋ masi ma ɓivun ma his jivina ni arage? Asi yow ay kolo mbay njun kogi ɗaŋgi su? Halagi li ma agi a ŋgay tagi huna ɗaŋgi su?

³⁹ Na daŋ may gologiya ni anu, sa ma daŋ ay ka egenɗi, lo ma daŋ ka egenɗi. Anni sa ma ci sana kina, ni sa ma hin sana iirina lay. Lini an dag sana wa ni hin cilim mbilimmi an lay. Sa ma suɗ ki hu duk kon kaɗi.

⁴⁰ Na daŋ may an tli kon kolo huulona an di ana, Anni ma ka iiri tew tewna.

⁴¹ Lini an guu sii ŋgew manna wa, kon tli ki kolo wa a kaɓakŋa ni, an hin sa sukulun u suu babali mansina, an hin warak suu may suu li gonokka u anna.

⁴² Ŋgew manna hin tini tliw suuna. An hin guruɗ mbuuru manda ki u busu suuna, busu suu casina u busu suu vasi daŋgaynana. Ŋgew manna hin kaasi yam muli masisina kiyo.»

⁴³ Agi njaf suu halaŋŋa ŋgaagi suu mamsina, kay nam hin sa sukul busu suu sun mamsina, nam hin tin dlara sa sukul ndaɗta ni kel suu babali masisina, nam hin col mbas mamba u suu mamsina ki koloo.

⁴⁴ Moiz u Josuwe ma goŋ Nunna hoŋ ay eg suuna mba ndum boy ma hu sool ndaɗtana ki kolo fok suuna u delesira eŋga.

⁴⁵ Hu li ma Moiz daɓ boyna ki dira maŋ suu Israelna halaŋŋa.

⁴⁶ Nam dasi ana, «Boy ma an dagina kagi halaŋ wanna, vagina ki kagi jiviya, dagi maŋ goryogi a asi li u boy ma ɓiiri hu gaɗ ndaɗtana.

⁴⁷ Kay boy namma ni ka boy ma luu ɦawaɗi, boy namma ni iiri magira gaw. U boy namma ni agi hin ɦuɗ iiri magira fok hu ndaŋgara agi calaɗ mbo lum ma Yurdanna a hin nda lak hura.»

Di ki kay miɗ ma Moiz miɗna

⁴⁸ Hu buu namma gaw ni, Yawe di Moiz ana,

⁴⁹ «Ɗiŋ kolo kay ɦinira Abiramba kay ɦinira Nebo ta ka hu mbassa Moabpa vok taɗ u zi ma Yerikona gol ndaŋga mayra Kanaan ta an ɦaɗ maŋ suu Israelnara.

⁵⁰ Ŋgoo dagan aŋ miɗ ha kolo kay ɦinira aŋ ɗiŋ ha kaɗ ndaɗta tuɗ eg somoyoŋ suu ŋgolona ko ndal wayaŋŋa Aaron, miɗ ha kay ɦinira Horra na may, tuɗ eg somoyom suu jewna.

⁵¹ Kay ana agi lagi dlara ka u voɗtaɗɗira egen fok suu Israelna ay fun mbo ma Meribana u Kades ŋgoo bagi hu fulla Sinda, hu li ma agi wan teteɗ manda ka fok suu Israel naɗina.

⁵² Vok li namma tani aŋ hin wi mbas ndaɗta ha u iriŋu, na may aŋ ka kal huruɗɗi kama, ni mbassa an ɦaɗ maŋ goryogi suu Israelnara.»