GA 8ATAMBARA 30 - Boy Lonana

Suu Israelna hoŋ irisi eg Yawe

¹ Lini tlesuu an dagisina wanna mba kagi wa halaŋ, paɗ vunna u gi vunna ni, agi saa dla ndaɗta hurugi duk njaf suu ɦawana halaŋ suu Yawe Loogina tuɗugi ha ki dukusina.

² Agi hoŋ ay gak gak eg Yawe Loogina, humum vunumu, agi u goryogi halaŋ u hurugi dew, u saa magira halaŋ, lagi u dlara an dagira cemi wanda.

³ Yawe Loogina hin mbuɗugi dlaagira ha fokka nam hin takagi ɗili mamba nam hin hoŋ tokogi yagi ay ki duk suuna halaŋ hu li ma Yawe njayagi ha ki huna.

⁴ Lini agi ay ki ni hu vun ndaŋgara do dora lay, Yawe Loogina hin yagi ay ki hu li namma u tamba.

⁵ Yawe Loogina hin mbaaragi ki hu mbassa vi somoyogira, agi hin mba lak ki huwa. Nam hin mbuɗugi furiya, zuli coco a su somoyogi lay.

⁶ Yawe Loogina hin cawagi ni caw ɗiwra hurugi kurufura, magi agi may, maŋ njafagi ma ka daganna lay, kay a agi min Yawe Loogina u hurugi halaŋ, u saa magira halaŋ, kay a agi lak iiriya.

⁷ Yawe Loogina hin li dlara ɓiiri hu gaɗta wanda ki eg suu lagi dla ndaɗta egegi wanna may.

⁸ Agi may ni hoŋ humugi vun Yawe Loogina, lagi u gaɗ mamba an dagira cemi wanda halaŋ.

⁹ Yawe Loogina hin ɦagi furira hu dlara agi laɗta halaŋ. Nam hin zulugi gorra kogi cocoo, zulugi yoorina, jifigi wana coco lay, kay Yawe furi coco kay ɦis magira ko nam li ay u somoyogira na may.

¹⁰ Kay ana agi hum vun Yawe Loogina, li u gaɗ mamba u nera nam dagirara ta ka ɓiiri hu magaara gaɗta wandara. Agi hoŋ ay eg Yawe Loogina u hurugi halaŋ u saa magira halaŋ.

Boy Lonana ni egegi tok daŋ

¹¹ Na daŋ may gaɗta an dagira cemi wandara ka loɓ cocoɗi, ndaɗ ka su kagiɗi lay.

¹² Ndaɗ ha ka kolo huulonaɗi, a sa di ana, «Sa ma hin tlami ha kolo a halaɗna ni gege? Sa ma hin a ndumumira ki a ami li uɗna ni gege?»

¹³ Ndaɗ ha ka ŋgoo mbo lum ŋgolna ii hiŋŋaɗi lay, a sa di ana, «Sa ma hin lusumi lumma ha ki a halaɗna ni gege, hin a ndumumira a ami li uɗna ni gege?»

¹⁴ Na daŋ may boy namma egegi ni na tok daŋ, gaɗ ndaɗta ni hu vunugi gaw, hurugi kurufu may, a agi mba li uɗta.

Boy ma daɓ daganna, managi ni iirira

¹⁵ Gola ni tlesuu an cukugisina cemi fokogina, iirira u furira, miɗna u hahawra may.

¹⁶ Anni sa ma gaɗagi cemi ana minigi Yawe Looginana, tuɗugi hu voɗ mamba, lagi u gaɗ mamba u nera u dlara nam miniɗta halaŋ. Ni agi hin lak iiriya, agi hin zul cocoo, Yawe Loogina hin paɗ vunum ki kagi hu mbassa agi hin tuɗ lak huruɗ wandara.

¹⁷ Na may lini hurugi mbuɗ wa lini agi ka humbi, lini agi hin tagi a goɓ loogi suu ɦawana sunusi may,

¹⁸ an dagi ki cemi wanna, agi hin ba ki ni halaŋ halaŋ. Buurugi ka li kay ndaŋgara agi tuɗ lak huruɗ wanda a calaɗ mbo lum ma Yurdanna ŋgolɗi.

¹⁹ Huulona u ndaŋgara dukuygi ni a suu vovoɗta, iirira u miɗna an tinigisina fokogi wa paɗvunna u givunna, agi man iirira kay agi hin lak iiri u goryogiya.

²⁰ Ni u minda min Yawe Looginara, humum vunumu, njun tagi ni egemu. Ni agi hin lak iiriya, buu magina ɦuɗ foko, hu li ma agi hin cuk hu mbassa Yawe vi vunum u somoyogi Abraham, Isaak u Yakob kaɗta.