GA 8ATAMBARA 3 - Boy Lonana

Suu Israelna tli mbassa vi Mulna Ogga kiyo

¹ Ami hoŋ irimi ay hu mbassa Basanda na, may Og, mul ma Basanna, ŋgafami ay u duuna, nam tamba u suu mamsina halaŋ.

² Yawe dan ana, «Liŋ ndaa kombi, kay an hiniŋŋa ki ni hu duk koŋ u suu mamsina halaŋ u mbas mamba lay. Aŋ hin lammi ko aŋ li Sihon, mul ma Amor ma ay cuki hu zi ma Hesbonna, na may.»

³ Yawe, Looygina, ɦaygi Og, mul ma Basanna, ki hu duk koygi wa olo, suu mamsina aygi casi ki halaŋ halaŋ hin sa ka iiri dewɗi.

⁴ Aygi tlasi ɦoŋziisina cuk ki hu halaŋ halaŋ. Zi ma hin ki bay aygi cuk ki hu kaɗi. Ҥoŋzi ma ŋgolona hu halaŋŋi dok-karkiya, u mbas mayra Argobpa lay, hu mbassa Basanda halaŋ li ma Og ti mulla kamma bel.

⁵ Ndummi ɦoŋzi ŋgolo ma gulumunna gii kam vun grekŋa duki mayna doy hol, ɦoŋzi ma gorina ka huɗi.

⁶ Zi namma halaŋ aygi dikim kiyo, ni ko aygi li u Sihon mul ma Hesbonna na may. Hu ɦoŋzina halaŋ, suu ŋgolona boyogina u kemba halaŋ, ami casi kiyo.

⁷ Va ma ami hinim komi a jona ni yoorina u tlesuu ɦurumusi vo hu zinna doy hol.

Ɓorow mbassa Galaadta kiyo

⁸ Ami tlasi mbas masira ki ni asi muli suu mba suu hu mbassa Amorra, cuki u maɗiina doŋ lum ma Yurdanna. Col ha fun lum ma Arnon ta ta tuɗ u ɦinira Hermonda.

⁹ Suu Sidoŋŋa yi ɦini ndaɗta ana Siryon, suu Amorna yaɗ ana Senir may.

¹⁰ Ami tli mbassa ndaɗta ki halaŋ halaŋ. Col ha Galaad u mbassa Basanda halaŋ ta ta tew Salka u Edri. Ҥoŋzi ŋgolo ma Basan ma Og ti mulla kamma.

¹¹ Og mul ma Basanna ni mul ma kak dagan iiri ta ta duk suu Refayimma. Lay mamma ni lay kawina ka cemi hu Rabpa hu ɦoŋzi ma ŋgol ma vi suu Amonna tu layɗi su? Fiyek lay namma meter fiɗi, hayam meter mba may.

Ɓorow mbassa fun mbo lum ma Yurdaŋŋa ii u maɗiira kiyo

¹² Mbas ndaɗta halaŋ ami cuk zina ki huwa, nus li ma u ɦinira Galaadta u ɦoŋzi ma huna halaŋ, col ha Aroer fun lumma Arnon li namma halaŋ an ɦam maŋ njaf suu vi Rubenna u suu vi Gadna.

¹³ U li ma hin hu Galaadna u mbassa Basanda halaŋ an ɦasi maŋ, nus njaf goryoŋ Manasena, mbassa Argobpa ay eg mbassa Basanda hu may. Asi yaɗ jew ni ana mbassa vi suu vi Refamma.

¹⁴ Yair ma goŋ Manasena tli mbassa Argobpa tuɗ ta ta fun ndaŋgara Gesurra ura Maakatta, li ma Basan namma nam tin sem mbas ndaɗta ki u semu, suuna yi mbas ndaɗta ta ta cemi ni ana, «Zi ma vi Yairna.»

¹⁵ Mbassa Galaadta an ɦaɗ ni maŋ Makir may.

¹⁶ Suu vi Rubenna u suu vi Gadna an ɦasi ni li ma col ha Galaad na tuɗ ta ta fun lum ma Arnonna na, mbo lumma dukusi ni a ii hakara, tuɗ ta ta Yabok ii hakara u goryoŋ Amonna.

¹⁷ Suu hu Araba ii u fiɗigina nana, mbo lum ma Yurdaŋŋa ni ii haka masira may. Ha fun lumma Kineretna fun mbo ma Arabana ta ta tew mbo lum ŋgol ma galakŋa tuɗ ha hu Po lum ma Pisgana u maɗiina na.

¹⁸ Hu li namma ni an gaɗagi ana, «Yawe, Loogina, ɦagi mbas ndaɗta ni namu. Agi suu gaaraŋ suu duuna halaŋ, calaɗagi lum ma Yurdaŋŋa u baraw ma duuna fok gorsegi suu Israelna.

¹⁹ Hin ka vo ni boyogogi u goryogi u yoori magisina doy hol, an wi ki ana agi u yoorina kogi cocoo, agi hin cukŋi hu ɦoŋzi ma an ɦaginana.

²⁰ Ta ta hu li ma Yawe ɦal koɗ tara maŋ gorsegina ko nam ɦagi koɗ tara wandara na may. Ko asi fi mbassa nam ɦasirara ki kosi may, li ma nam hin a ɦasina ha ki ŋgoo lumma Yurdaŋŋa ii hiŋŋana. Ni agi gegelay hin hoŋ ay hu liim ma nam a kak huna, ma an ɦaginana.»

²¹ «Maŋ Josuwe may ni an ɦam gaɗta ana, Aŋ tlara Yawe Loogina lad eg muli suu mba' wanna ki ni u ii taŋga. Yawe hin nda laɗ u muli suu agi tuɗ fasi fokogi ii hiŋŋana ni na may.

²² Lagi ndaa kosiɗi kay Yawe, Loogina, duu kagi ni nam u tamba.»

Moiz ka kal hu mbassa Kanaandaɗi

²³ Hu li namma an joɓ Yawe di ana,

²⁴ «Bu Suuna Yawe cemi ni aŋ gijaŋŋa a tak ŋgol maŋga ki ii saaŋ ma sunda u saɓak ma col ay koŋŋa, na ni lo ma daŋ ma ka kolo huulona ɗowba kay ndaŋgara ma ŋga tam u sun maŋga aŋ laɗta u gi saɓak maŋŋa ka su?

²⁵ Aŋ hinin an calaɗ lum ma Yurdaŋŋa ko an wi mbassa jivi ndaɗta ha ii hiŋŋara na wige? Ҥini mayra jivira u ɦinira Libanda jimi na wige?»

²⁶ «Na may Yawe hurum ɓeŋ ki egenu, ni kay dlaagira, nam humun cen manda kaɗi, Yawe dan ana, Ndak wa na ga seŋ taŋu, ɓakan kay boy namma oloɗi.

²⁷ Ɗiŋ kolo kay ɦinira Pisgara gol iriŋ u fiɗigina, gol mbayawi, gol daliya, gol u maɗiina may. Gol lina ha ki u iriŋ halaŋ halaŋ, mbo lum ma Yurdaŋŋa fokoŋ wanni aŋ ka a calaɗambi.

²⁸ Gaɗ Josuwe, ɦam voɗta, soom hurumu, ɦam saɓakŋa kay nammi sa ma hin calaɗ lumma Yurdaŋŋa fok suunana, nammi sa ma hin ɓorowosi mbassa aŋ waɗ wandara.»

²⁹ Kay ndaɗta ami lak coco hu ɦuɗugum ndaɗta vok zi ma Bet Peorna na gay.