GA 8ATAMBARA 23 - Boy Lonana

¹ Sana ka kak cara vi bumbaɗi, nam ka ndak a vi va ma vi bumma kiɗi.

Suu may suu dikisi ki hu tokkana

² Sa ma huɗum ki paɗina u sa ma ɗiwim ki kaayna ka kal hu tokka vi Yaweraɗi.

³ Goo ma vuɗum a mboymora ka kal hu tokka vi Yaweɗi, lini gor ŋgologi mam suu doogona lay ka kal hu tokka vi Yaweɗi.

⁴ Suu Amonna u suu Moabma li ni nanagelay asina ka kal hu tokka vi Yaweɗi, li ni gor ŋgologi masi suu doogona lay ni ka kal hu tokka vi Yaweɗi.

⁵ Kay ana hu li ma agi cuk ay ki hu mbassa Egiptera ni asi ŋgafagi vogogi ka u yo ma ciraɗi, ka u va ma tiɗi lay. Suu Moabma yi Baalam ma goŋ Peorna ay ana nam yagi tlena ki kagi baagi kiyo, ay ni hu Petor duk ɦoŋ mbo lumma mbana.

⁶ May ni Yawe Loogina min ka a hum vun Balaambi. Yawe Loogina mbuɗugi givunna ki kagi a paɗvunna. Kay ana Yawe Loogina minigi cocoo.

⁷ Hu li ma agi ka iiriya, lak ki kay tagi wa ni, agi halagi begera vi njaf suu mba asina u jivi masiraɗi lay.

⁸ Agi gologi suu Edomma ko suu ki baayna naɗi, kay asi ni gorsegina. Agi gol suu Egiptena ko suu ki baayna naɗi, kay agi ay ki ŋgayra ni vo varsiya.

⁹ Gor ŋgologi masi suu hindina ndak a cuk hu tokka vi Yawera.

Lira li kaŋ ma vi suu duuna ki teteɗta

¹⁰ Hu li ma agi vi ziigi ma duuna wa fun suu babali magisina ni, agi gologi tagi jivi ko dla cora.

¹¹ Lini sa ma ka dukugiya, sa namma ka ki teteɗɗi, kay doyra dam njeŋge, tam mba ki wa ni, sa namma kal kiyo, hin kaŋŋakiyo, ka kal ay vo hu kaŋŋa oloɗi.

¹² Tew fiɗigi wa ni nam mbus tam kiyo, faɗta a ndi gara ni nam hin kal ha hu kaŋŋa ni na tuwa.

¹³ Agi min li maa ha ki keŋŋa nde a suu asina hin tuɗ ha ki hura may.

¹⁴ Sa ma asgaana gegelay ni li va ma vek zulla komu, hu li ma nam kal ki doŋ kaana wa ni nam vek zulla hin tos soɗom ki ga huwa.

¹⁵ Kay Yawe Loogina u tamba mbay hin hoŋ dukugi hu kaŋŋa a suɗugi kira, ɦagi suu babali magisina ki hu duk kogi lay. Na ni huu kaŋ magina ki jivi teteɗ su, ka a Yawe Loogina, wi va ma njenje ma zolo u irimbi, li wa na ni nam ka mba dukugi oloɗi.

Mbaɓu ma pii ay kina

¹⁶ Li ni mbaɓu ma vi sanna pii ay ki vo varaŋ wa ni aŋ ka hoŋomma ha gawɗi.

¹⁷ Aŋ hinim nam kakŋi u aŋu, hu li ma nam manam ana irim jiviyana hu ɦoŋzi ma nam minna. Na may aŋ ka lam dlara a mbuɗ taŋ ki va u nambi kamma.

Gawlaŋga li ki teteɗta

¹⁸ Ka a gawlaŋ mayra teteɗ ɗowba sa njuf ma teteɗ ma hin tam ki kay dlara zoŋga li duk suu Israelnaɗi.

¹⁹ Begera cara gawlaŋga faɗ ayra u begera sana gus dina ha kira ca ni, mbaa bege ndaɗta ay hu zira vi Yawe, Looginaraɗi. Begera faɗ ay u dlara ko ndaɗta nara ka ii Yawe jiviɗi.

Gursura ndaɗ ki a mbona

²⁰ Aŋ ka ɦal gursura kay wayaŋŋa a vi mbona uɗtaɗi, lini gursu wa, lini va ma tiya, lini megelay ma aŋ min a ɦam kay ndaraŋŋa ni aŋ joɓ mbona huɗi.

²¹ Lini aŋ ɦal va namma ni maŋ ŋgayna ni aŋ joɓ mbona huwa, may wayaŋŋa ni aŋ joɓ mbo huɗi, ni kay a Yawe Looŋŋa paɗ vunum ki kay dlaaŋga aŋ laɗta halaŋ, hu mbassa aŋ tuɗ kak hura.

Li dlara aŋ suu taŋ kaɗta kiyo

²² Lini aŋ suu taŋ fok Yawe Looŋŋa wa a li vaa ni va namma aŋ hin bay lam kiɗi, kay Yawe Looŋŋa ka hin bay joɓoŋ va ma aŋ di ki kamma kiɗi, aŋ lam kaɗi ni mbuɗi kaŋŋi sulukŋa.

²³ Lini aŋ ka min a li dlara suu taŋgi, ni boykaɗi, ndaɗta ni aŋ li suluk kaɗi.

²⁴ Va ma kal ay ki funuŋŋa li ni nanagelay ni aŋ mba li ki u vunuŋ ma aŋ damma, ko dlara aŋ daɗ ki u vunuŋ fok Bu Suuna Looŋŋa ana aŋ min a laɗura laɗ kiyo.

Gaɗta kay tlesu hu sene ma vi ndaraŋŋana

²⁵ Lini aŋ kal hu sene gugutlu ma vi ndaraŋŋana wa ni aŋ ndak ti ko huruŋ minda na, hoɓ hayaŋ ki lay, na may aŋ ka yow ma koŋgi kama.

²⁶ Lini aŋ kal duk sene ma vi ndaraŋ ma vun grekŋa nam a feɗ wana aŋ ndak a kus yam wana u koŋu, may ni aŋ ka ndak a kal markamba duk sene ma vi ndaraŋŋanaɗi.