GA 8ATAMBARA 22 - Boy Lonana

Gol yoo ma vi ndaraŋŋana jiviya

¹ Lini aŋ wi yoo ma vi ndaraŋŋana, mbutl kala, timii kala, viɗ kiyo ni aŋ hoŋomma irim ay voo.

² Lini wayaŋ namma ka egeŋ tokgi, ɗowba lini aŋ ka wi malaŋ yoo nammaɗi, ni aŋ vi yoo namma ha vo varaŋu, nam hin varaŋ gak gak hu li ma malamma hin mba a famma. Nam fam wa ni aŋ hin ɦamma may.

³ Aŋ li korra vi ndaraŋŋara ni na lay, u baraw ma vi ndaraŋŋana ni na lay, tlesuu vi wayaŋŋana megelay ma viɗ kina aŋ li u asi ni ko ndaɗta na, va ma aŋ fam ki viɗna, lini vi wayaŋŋa ni, aŋ ka hinim ba kiɗi.

⁴ Lini mbutl kala, koro kala, vi wayaŋŋa puk ga voɗ wa ni aŋ njun um a col va namma kolora.

Tlumba tlum ii dlara kira

⁵ Cara ka cuk baraw ma vi njufiinanaɗi, sa njufna ka cuk baraw ma vi boyoginanaɗi may. Sa ma li ko ndaɗta nana ka ii Yawe Loogina jiviɗi.

Gaɗta kay layagi suu buuri hu ziisina

⁶ Hu li ma aŋ tuɗ hu voɗta, aŋ fi zi layna kolo hum ŋgus ɗowba ga duk ndaŋgara, nam buuri kay gorra ɗowba kay sena tuwa, sura li ka buuri kayami ni, aŋ ka vi dora u goryoɗ halaŋgi.

⁷ Aŋ hin sura piira, taŋga yow ay koŋŋi gorra doy hol. Ni aŋ hin kak jiviya, buu maŋŋa hu duliyara hin ɦuɗ fok lay.

Heɓpa kay zira miniɗ wilira

⁸ Lini aŋ min zi sor ta wilira wa ni, ŋguy gulumunna ki kay zi ndaɗta, ka a sa ɗiŋ ay kolo kay yam ziiŋga gi tam ay ga a mbuɗuŋ ziiŋga ki zira busunaɗi.

Gaɗta kay tlumba tlum tlena dadamba

⁹ Aŋ li sene gugutluna wa ni zaa va ma daŋ duk hu oloɗi, li ka naɗi ni tlesuu hu senena mba asina mbuɗ ki ni teteɗ jak, vuɗ gugutluna u va ma aŋ zaaram duk namma halaŋ.

¹⁰ Aŋ ka tlum yoori suu zumma mbutl dew may kor dew may tlumusi naɗi.

¹¹ Aŋ ka cuk baraw ma cili u tlimiɗ timigiina ko tam dew u baraw ma cili ɦawanaɗi.

¹² Baraw maŋ ma aŋ boɗom kaŋŋa, keŋem fiɗi halaŋŋi aŋ ɦosom ki na luy luy.

Gaɗta kay taɓpa vi sa njufna u caamba

¹³ Lini sana vi cara aya, tap ki u ndaɗ wa, ŋgoo dagan nam ka miniɗ oloɗi,

¹⁴ Lini nam ka furi kay poy maɗtaɗi, gijaŋ ɓaaraɗ seɗ ha ki ana, «Ca ndaɗta an vaɗ may hu li ma an tap u ndaɗna ni an faɗ ki ni balakiya.»

¹⁵ Na ni somi goora buɗ u suɗ tuɗ tak dlara ndaɗ ay u way taɗta kiyo, tuɗ takaɗ ki fok suu ŋgolo suu hu ɦoŋzinana vun kaana hu ɦoŋzina.

¹⁶ Bu goo ca ndaɗta di suu ŋgolo suu hu zinna ana, «Gola ni goonda, an ɦaɗ maŋ sana wanni a caamba, cemi ni nam ka miniɗ oloɗi.

¹⁷ Nam gijaŋ ɓaaraɗ dlaɗ ki dan ana, Gooŋga an faɗ ay ki ni ɓalakiya, gola va ma tak ki ana goonda ay ka ki ɓalaki ɗina wanni.» nam tak baraw haɓ ma njufuɗ buu u ndaɗ kam jewna ki fok suu ŋgolona, suu ka hu ɦoŋzi nammana.

¹⁸ Suu ŋgolo suu hu zi nammana vi sa namma gam daŋgayna.

¹⁹ Asi ŋgaam warakka kamu, nam warak bu goora silira kis kay nam ɓaa dla goora Israella ki ɦawaa, go ndaɗta hinni caamba gak gak hu li ma nam ka iiri kay ndaŋgara tuna.

²⁰ Lini dlara li wa gasi ko nam dira na, fi goora ay ki ɓalaki wa ni,

²¹ Asi tuɗ goora ha vun grekŋa vi buɗu, suu hu ɦoŋzi nammana gikiɗ ki u gogoyra caɗ kiyo, kay ndaɗ li ni dla cora duk suu Israelna, mbuɗ taɗ ki gawlaŋga, vo vi buɗu, agi bulumugi dlara co ndaɗta ki dukugiya.

²² Lini agi hum kay sana ana nam buu u cara ki ɗumira ni, suu asina miɗ ki ni jak. Sa ma buu u ca ndaɗtana may, ca ndaɗta lay, agi bulum dla cora ki duk suu Israelna.

²³ Lini goo tamara sana gaɗ tlekŋa ki uɗu, sa ma daŋŋa ŋgafaɗ hu ɦoŋzina buu u ndaɗu,

²⁴ agi tuɗusi ha ki vun grekŋa vi ɦoŋzina u dlasira jakka, agi gikisi ki u gogoyra casi kiyo. Goora ka hu ɦoŋzina min ka a sawalla koloɗi, sa namma buu ni u caŋ ndarammara may. Agi bulum dla co ndaɗta ki dukugiya.

²⁵ Lini sana ŋgaf goora tlekŋa ki gii uɗ ndaɗta buuruɗ ay ki ni ŋgoo bagi hu senena, sa ma buu ay u ndaɗna cam ki ni nam hol.

²⁶ Goo tamara agi ka laɗ va egeɗɗi, kay ndaɗ li ni ka cora a caɗ ki ciiraɗi. Dlaaɗta ni ko ndal sana nduk saam ma vok zina cam kira na may.

²⁷ Kay nam ŋgafaɗ ay ki ni ŋgoo bagi hu senena, goora tii lay, ni sa ma mba a njunuɗ kaɗi.

²⁸ Lini sana ŋgaf goora, njuf ka kaɗɗira, buu u ndaɗ wa ni, suuna fasi ay hu dla ndaɗta wa ni,

²⁹ sa ma buu u goo ndaɗtara ɦal gursura maŋ buɗ dok-vadl, kay ana nam vaɗ wa ndaɗ mbuɗ ki ni cora, nam ka ndak a dikiɗ ki oloɗi, hu li ma nam ka iiri hu duliyara tuna.