GA 8ATAMBARA 2 - Boy Lonana

¹ Olo ni aygi hin hoŋoygi iriygi ŋgoo bagi hu fulla, hu voɗta tuɗ fun Lum ma Cerewna. Ko Yawe danda na, aygi ŋguyuygi yam ɦinira Seira seygi bolowo.

Suu Israelna gun ay ki hu mbassa Edom, Moab u Amonda

² Olo Yawe hin dan ana,

³ «Segi bolowo agi ka ŋguy kay ɦini ndaɗta, tuɗugi cemi ii ma mbayawna na.

⁴ Gaɗ suu Israelna dasi ana, agi hin jakŋi kay mbassa vi gorseginara ni goryoŋ Ezawna, asi cuki hu Seir ni asiya. Asi wagi na ni hin li ndaana kogiya may lagi jiviya.

⁵ Lagi dlara li ya u asiɗi, an hin ka ɦagi va hu mbas masiraɗi, yam ndaŋgara agi a tin segi na hol lay ka huɗi kay an ɦal li ma ɦinira Seir ndaɗta ni maŋ Ezaw.

⁶ Ti ma agi hin tam huna agi gususina kosi ni u gursuna. Yo ma agi camma lay agi gususina kosi ni u gursura lay.

⁷ Kay Yawe Loogina paɗ vunum ki kagi hu dlara agi laɗta halaŋ. Nam gologi ay ŋgoo bagi hu fulla ŋgolla, basara ca ni dok-fiɗi. Yawe Loogina ka u agiya va ma kaɗak kagi kaɗi.»

⁸ Olo ami jakami voɗta vi gorsemi suu goryoŋ Ezawna na, asi cuki ni hu mbassa Seirra. Ami hin jakŋi hu voɗta ɦuɗugumba Elatta u Esiyon-Geber. Ami es ki mbay hu fulla Moabpa na.

⁹ Yawe dan ana, «Hal honi u suu Moabmaɗi, duu u asiɗi. An ka a ɦaŋ va hu mbas masira na ndeɗi kay an ɦal mbassa Ara ni maŋ goryoŋ Lotna.

¹⁰ Mbas ndaɗta suu li ay cuki huruɗ jewna ni suu Emina. Suu asina saɓak cocoo, wuli fiyeki coco lay, asi zuli bolow ɦay lay. Ŋgolo a su njaf suu Anakŋa.

¹¹ Asi ndumusi ni a suu Refana, may suu Moabma yasi ana suu Emina.

¹² Mbassa Seirra suu cuki jew huruɗna ni suu Horna goryoŋ Ezawna dikisi ni dikiya. Asi varak cuk ki balamasi ko suu Israelna dik suuna ki hu mbassa Yawe ɦasirara hin cuk ki balamasira ni na may.

¹³ Cecem wanda cugugi tagi hu voɗta a ɗiŋ lum ma Zeredna.» Ami hin taɓa lum ma Zeredna.

¹⁴ Hu li ma ami yow ay hu Kades-Barniya mba taɓa lum ma Zeredna ni li basara u tuɗta ni dok-hindi yam kalavandi, ni ta ta suu may suu ay ki ndaki a duunana daɓ ay ki miɗna tuwa, ko Yawe suu tam ay ki fok jewra na.

¹⁵ Ko Yawe ay kasi ni u tamba a dikisi ki hu kaŋŋa ta ta hu li ma suu basi asina daɓ ki halaŋŋa tuwa.

¹⁶ Hu li ma suu duu suu jewna daɓ ki miɗnana ni.

¹⁷ Yawe dan ana,

¹⁸ «Cemi ni aŋ hin jak hu mbassa Moabpa u Ar.

¹⁹ Aŋ hin tuɗ tew vok goryoŋ Amonna na, li dlara duu u asiɗi, halasi a yaɗi, an ɦaŋ li maa ka na nde hu mbassa vi goryoŋ Amonnaɗi. Kay mbas ndaɗta an ɦaɗ ki ni maŋ goryoŋ Lotna.»

²⁰ Mbas ndaɗta ay ki ndumi ni ko mbassa vi suu Refana na, kay asi ay jew cuki hu mbas ndaɗta ni asiya. Suu Amonna yasi ana Zamzumma.

²¹ Suu asina ay zuli cocoo, asi wuli fiyekira ko suu Anakŋa na may, may ni Yawe daɓasi ki fok suu Amonna, asi dikisi kiyo, hin cuk ki hu balamasiya.

²² Yawe li u goryoŋ Ezawna ni na lay. Asi mba cuk ki hu Seir ni, nam dikisi suu Horna kiyo, asi varak cuk ki ni hu joosiya, ta ta cemi.

²³ Suu Avina cuki hu mbassa Gazara, suu daŋŋa yow ay hu Kaftor mbay dikisi ki hin cuk ki hu balamasiya.

Suu Israelna cuk hu mulla Sihonda

²⁴ Yawe ana, «Yowogiya, tudugiya, jakagi lum ma Arnonna, an ɦagi Sihon ma Amorna mul ma Hesbonna u mbas mamba halaŋŋi hu duk kogiya. Tuɗ duurugi u namma, gagi jaŋŋa a tam mbas mamba.

²⁵ Cemi ni an min a kalagi ndaaragi ha ki kay suu cuki kay yam mbassana halaŋ halaŋ. Hu li ma asi humugi dlagi wa ni asi dlak ndaana coco kogiya.»

²⁶ Ay ŋgoo bagi hu fulla Kedemotta an sun suuna ay eg Sihon mul ma Hesbonna u boy ma heɓpa ko wanni na ana,

²⁷ «Hinin an jak hu mbas maŋga, an tli konni voɗ manda na ɗegee, ka tuɗ bik njufɗi lay, bik guluɗi lay.

²⁸ Ti ma an hin tam varaŋŋa an hin gusummi gusiya, yo ma an hin camma an gusummi gusi lay. May hinin an jak tuɗta ni u sen ɦawaa.

²⁹ Ni ko ndal goryoŋ Ezawna hinin jak ay hu mbassa Seirra wanda na may, u suu Moab suu cuki hu mbassa Arra na, ta ta an calaɗ mbo lum ma Yurdaŋŋa ay kiyo, a tuɗ tew hu mbassa Yawe, Loomina, ɦamirara.»

³⁰ Na may Sihon mul ma Hesbonna ka min a hinimi a jak varambi. Kay Yawe, Loomina, soom hurum ka min a hum boy ma jivinaɗi, kay a ɦamina ki hu duk komira.

³¹ Yawe dan ana, «Gola an hinigi Sihon u mbas mamba halaŋŋi hu duk kogiya, tuɗ tagi mbas mamba lakagi kaɗu.»

³² Sihon kal ay ki u suu mam suu duuna ŋgafami a duu u ami hu ɦoŋzi ma Yahasna.

³³ Yawe, Loomina, ɦamina kiyo, ami cam ki u goryom halaŋ u suu mamsina lay.

³⁴ Ami tli ɦoŋzi ma ŋgolona ki halaŋ halaŋ, dik suu huna ki halaŋ, njufiina, boyogina u kemba ami casi ki bel bel hin sa ka iiri dewɗi.

³⁵ Ami hin komi a va jona ni yoorina doy hol u tlesuu ami ɦurumusi hu ɦoŋzinana doy hol may.

³⁶ Col ha hu Aroer fun mbo ma Arnonna day ta ta hu ɦoŋzi ŋgol ma daɓ ha ki fun mbo lummana tew ay ki Galaad, zi maa dooromi bay ami tlam ki kaɗi, Yawe Loomina ɦamina ki halaŋ halaŋ.

³⁷ Ami tun tami kaɗi ni eg mbassa vi goryoŋ Amonna doy hol. Vun lumma Yabokŋa ɦoŋzi ma kolo kay ɦinirana, li ma Yawe, Loomina, dooromi ki kamma halaŋ ami ŋgenem kaɗi.