GA 8ATAMBARA 18 - Boy Lonana

Ii ɓorow ma vi suu vi Levina

¹ Muli suu li ɓivunna suu vi Levina u njaf suu vi Levina halaŋ joosi maa kaɗi, ɓorow masi maa ka duk suu Israelnaɗi lay. Tiisi ma asi tamma ni ti ma vi Yawena ni joosina gaw.

² Suu Levina joosi maa ka duk gorsesinaɗi, joosina ni Yawe tamba gaw. Ko nam u tamba dasira na may.

³ Gola ni warak ma vi muli suu li ɓivunna ma kay suuna halaŋŋa kay suu may suu mbay a li ɓivunna u mbutl ɗowba u timiina, dok masira hura ni bikka, kiriŋŋa, u bir birna.

⁴ Agi ɦasi yam wa ma ne ki fok jewna u sum veŋ ma wilina u mbulna u tlimiɗ timigiina suu agi cawasi kina may.

⁵ Kay asi ni suu Yawe Loogina ŋgaɓasi ki u goryosi halaŋ duk njaf suu Israelna a li sunda hu buuna halaŋ fok Yawena.

⁶ Lini sa ma hu njaf Levina min cuk zina dukugiya, aragelay hu ɦoŋzi ma Yawe ɦaginana ni nam cuk ko hurum minda na.

⁷ Nam li sunda vi Yawe ha hu ɦoŋzi namma ni ko gorsem suu ka li sunda fok Yawe wanna na may.

⁸ Nam ti tiimma ni u tlesuu asi taarasi ayna, nam ndak a gus ki ti vunum u bege ndaɗta.

Suu jok vun Lona suu ka boyna u suu jivina

⁹ Hu li ma agi cuk hu mbassa Yawe Loogina vi vunum kaɗ a ɦagirara wa ni, agi lagi u dla cora njaf suu daŋŋa laɗ ha hu wandaraɗi.

¹⁰ Ka sa maa dukugi ɦal gorom ma njuf ɗowba ta tamara ŋgalaɗ ki a li ɓivunɗi, ka sa maa ɦal tam kay dlara kumuna, joɓ loogi suu ɦawana li dlara dawra li dukugiɗi.

¹¹ Sa ma tin garira, sa ma joɓ ŋgussa cora vi suu miɗina,

¹² Suu li dla ndaɗta halaŋ ii Yawe Loogina ni asi ki ni baaya. Kay dlara co ndaɗta Yawe Loogina dikigi njaf suu daŋŋa ha ki fokogi ni na.

¹³ Kagi agiya, poyogi jivi pasiak fok Yawe, Loogina.

¹⁴ Suu agi hin dikisi ki asina hum vun suu joɓ suu ka boyna. Agi may ni Yawe Loogina ka min dlara ko ndaɗta naraɗi.

¹⁵ Yawe Loogina hin sunugi sa ma jok vun Lona ko an nana ay dukugiya, ni duk gorsegina tok, sa namma agi hin humummi vunumu.

¹⁶ Ni boy ma agi joɓ Yawe Loogina kamma, hu li ma agi ay toki kay ɦinira Horebpa, agi di ana, «Ami ka min a hum del Yawe Loomina oloɗi, ami ka min a gol kura ŋgal coco ndaɗta oloɗi, kay ami ka min a ci tami kiɗi.»

¹⁷ Yawe dan ana, «Asi di boy namma ni u voɗomu,

¹⁸ An hin ɦasi sa ma jok fun Lona ko aŋ nana aya, ni duk gorsesina tok. An hin kalam boy manna ay funumu, nam hin dasi ki ni dlara an damba ana nam dasira kiyora.

¹⁹ Lini sana ka min a hum u boy man ma sa jok vun Lona dam kinaɗi, an u tanda hin joɓom vunummi an gaw.

²⁰ Na may lini sa ma jok vun Lona ŋga tam u senu, gijaŋ di boy ma an dam ka ana nam damuɗina, ɗowba nam gijaŋ ɓak u sem loogi suu daŋŋa ni, sa ma jok vun Lona namma hin miɗa.»

²¹ Kala agi hin joɓ tagi ana, «Ami hin wi ni u me ana boy namma Yawe dam ay ka nambi nige?»

²² Lini dlara sa ma jok vun Lona daɗ kay sem Yawera ka liɗi, va namma li ka mbaɗi ni ka boy ma Yawe damma aynaɗi, sa ma jok vun Lona di boy namma ni u ŋga tara ɦawaa, ni agi ka li ndaa kay boy nammaɗi.