GA 8ATAMBARA 16 - Boy Lonana

Luu ma vun til Paskana

¹ Humugi maa ki kay til ma yam ana Abibmaɗi, hu til namma ni lagi luu ma Pakŋa, maŋ Yawe Loogina. Nam, Yawe, cukugi ay ki hu Egipte ni hu njeŋge ndaɗta.

² Agi li ɓivun ma vun til Pakŋa maŋ Yawe Loogina, u yoori suu gorina lay, suu ŋgolona lay, ha hu li ma Yawe Loogina manam ki tin sem huna.

³ Agi ka ti fu ma kuffa dukummaɗi ta ta buuna kiɗisiya ni agi ti ni fu ma bay kuffa dukumma sak sakŋi fu ma hahawra, kay agi cuk ay ki hu Egipte ni na zak gaw, a humugi gagi kay buu ma agi cuk ay ki hu mbassa Egiptera hu buuna tew tew hu li ma agi ka iiri tuna.

⁴ Hu mbas magira halaŋŋi ka wi kuf vi saɗi ta ta buuna kiɗisiya. Tliw ma agi ŋgaɗam fiɗigi hu buu ma jewna halaŋ hinim a fo lina koloɗi.

⁵ Agi ka ndak a li ɓivun ma vun til Pakŋa ha ki hu ɦoŋzi ma Yawe ɦagina a agi cuk hunaɗi.

⁶ Agi li ɓivun ma Pakŋa ni hu li ma Yawe Loogina manam tin sem huna doy hol, lammi fiɗi hu lerr mayra ŋgaaɗta, vok li ma agi cuk ay ki hu Egiptena na tew.

⁷ Agi ndak zal tliw namma komom mi hu li ma Yawe Loogina manamma, maɗii ni agi hoŋ ay ki vo hu mbutluɓ magina.

⁸ Hu buuna karkiya ni agi ti ni fu ma bay kuffa dukumma. Buu ma kiɗisiyana ni buu ma luu ma vi Yawe Looginana a daɓ ki huna buu namma ni agi ka li sunɗi.

Luu ma buu ma dok-vadlna

⁹ Agi ndum semenna na kiɗisiya, ha ŋgoo bu namma ni agi gijaŋŋa a feɗ wana kira.

¹⁰ Ŋgoo dagan agi hin li luu ma buu ma kiɗisiyana maŋ Yawe Loogina, ɦagi ɦal mayra ɦawa u min magirara ko ndal Yawe Loogina paɗ vunum ki kagi agi fira na may.

¹¹ Ni hu li ma Yawe Loogina manam tin sem huna, agi hin laɗ u furira fok Yawe Loogina u goryogi suu njufiina u gorɓiina u suu sun magi suu njufiina u boyogina u njaf suu vi Levi suu cuki dukugina, koyogina gor suu kuyuna u boyogi suu dono suu dukugina halaŋ.

¹² Humugi mba gagi ana agi ay hu mbassa Egiptera ni mborɓiina may. Agi gol gaɗ ndaɗta jiviya, lagi uɗ may.

Luu ma vun mbutluɓma

¹³ Luu ma vun til mbutluɓmana agi lammi ndum buuna kiɗisiya dagan buu ma agi daɓ tlena ki feɗta vona.

¹⁴ Agi li furira u goryogi suu njufiina u suu tamagina suu sun magi suu njufiina u boyogina, koyogi suu mba varagina u njaf suu vi Levi suu cuki dukugina, kemba kuyura u boyogi suu donona halaŋ, suu ka hu ɦoŋzi maginana.

¹⁵ Luu ma agi luum a ŋga Yawe namma li buuna ni kiɗisiya, lammi hu li ma Yawe Loogina manam tin sem huna kay Yawe Loogina paɗ vunum ki kagi hu dlara agi laɗta halaŋ, ndaŋgara jivigi tlena coco lay, magira ni agi li furira.

¹⁶ Hu basara dew ni suu magi suu njufiina hu njafagi halaŋ tuɗ fok Yawe Loogina hu li ma nam manamma sesi hindi hindi, hu luu ma fu ma bay kuffa dukumma, hu luu ma buu ma kiɗisiyana, hu luu ma vun mbutluɓma may. Sa ndak a tuɗ wi vok Yawe u komma vadlnaɗi.

¹⁷ Gegelay ɦal yam vaam ma nam fam u paɗvunna ko Yawena, ko va ma Looŋŋa ɦaŋŋana na.

Gaɗta kay kaɓakŋa

¹⁸ Hu ɦoŋzi ma Yawe ɦagina a agi lak huna halaŋŋi aŋ man suu ŋgolo suu kaɓakŋa u suu gi ii dlara ki hu halaŋ halaŋ. Asi kaɓakŋa ni u ɗegeera ka ɓorow ii saɗi.

¹⁹ Aŋ baa yam gasira ki gaɗi, aŋ ka ɓorow ii suunaɗi, aŋ ka vi ŋgomba suuna ŋgomoŋgaɗi, kay ŋgomba duk ii sa ma wi gasira kiyo, ɓalak boy ma vi sa ma mamma ɗegeena ki lay.

²⁰ Aŋ hal ni ɗegeera, ni ɗegeera na hol, kay a kak iirira a kak hu mbas mayra Yawe Looŋŋa ɦaŋgara.

Gaɗta kay goɓpa goɓ fulinana

²¹ Keŋ givin ma togolla vi Yawe, Looginana, wanni agi fulina ma vi Aserna huɗi.

²² Ҥinira ceɗi ta suuna goɓoɗta agi sa col taa fokom voɗi lay. Yawe Loogina ka minɗi.