GA 8ATAMBARA 14 - Boy Lonana

Hahaw maɗna ta ki doori kay suu teteɗnara

¹ Agi ni goryoŋ Yawe Looginana, hu li ma agi a tii maɗna ni jii tagiɗi, kaa yagi kiɗi lay.

² Kay agi ni suu may suu ki tini zeɗ maŋ Yawe Looginana. Agi ni suu Yawe managi ki mam a suu mamsina kay tamma, duk njaf suu kay ndaŋgarana halaŋ halaŋ.

Tliw ma jivi ma komba u ma ka kombina

³ Agi ti va ma Bu Suuna doo ki kam ana tambinaɗi.

⁴ Gola ni yoori suu agi komosina, mbutlina, timigiina u ɦugunina.

⁵ Mbuu ma mekem bolowna, dukka, lilira, ɦuraboyna, boɗoŋoona, baryamma.

⁶ Yoori suu garak sesi wakina suu hoŋ haɗna halaŋ agi komosiya.

⁷ Na may duk yoori suu hoŋ haɗna u suu sesi garaki suu ɦiw ni agi komosiɗi, jamballa, vetta, koyɗomma, kay asi hoŋ haɗna may garak sesi kaɗi, agi golosi ni a tlesuu njenjena.

⁸ U kozoŋŋa lay, nam sem garaki may ni nam ka hoŋ haɗɗi, nam ki ni njenjee, agi komombi lay, ŋgen kogi eg maɗambi lay.

⁹ Tlesuu duk mbonana halaŋ gola ni suu agi komosina, kuluf ma jiirim huna ma u ɓolokŋa egemma ni agi komomu.

¹⁰ Na may kuluf ma jiirim kaɗi lay, ɓolok ka egembi layna ni agi ka komombi. Namma irigi ni ma ki njenjena.

¹¹ Layagi suu teteɗna halaŋ agi ndak komosiya.

¹² Gola ni layagi suu agi ka komosiɗina, bakŋa, hikŋa, lay ma ciw goloŋina.

¹³ Lay jomma, njaf kokolora zeɗ zeɗ, u njaf layagi suu vi kulufna,

¹⁴ u gawgawna

¹⁵ ergetta, baybayna, dlemerekka, njaf gi yarakka u gi mbaŋana.

¹⁶ Hikŋa, layagi suu ti njeŋgena, u hik cerewra.

¹⁷ Zalyamba, zilimma u ɓarawna.

¹⁸ Balagamma, garamma u gagarra, njeɗ ma gorɓiina u jujugumma,

¹⁹ U gor tlesuu piira halaŋ agi komosiɗi.

²⁰ Layagi suu pii kolo suu ki teteɗna halaŋ agi komosiya.

²¹ Va ma miɗ ki miɗina ni agi komombi, ɦagi va namma ki ni maŋ koyogi suu dukugina, ɗowba gususi va namma ki kosiya, kay agi ni suu ki ŋgaɓi maŋ Yawe Looginana. Agi ka zal goona duk mbii sum tokgi.

Gaɗta kay ɦalla ɦal maŋ Lonara

²² Hu basara halaŋŋi agi ɦal yam tlesuu agi zaarasi gana kiyo.

²³ Ha ki ni fok Yawe Looŋŋa hu li ma nam manam a yam sem huna. Agi ti yam wa magi ma agi ɦamma, sum veŋŋa, mbulna u gor suu vuɗ jewna vi yoori magisina, mbutlina, timigiina u ɦugunina. Ni agi haɗ tagi a li ndaa Yawe hu buuna halaŋ.

²⁴ Lini li ma agi tuɗ yam tlegeyegi suu agi taarasina huna ha ki day cocoo, li ma Yawe Loogina manam a tin sem huna li daya ni, lini Yawe Loogina jivigi tlena paɗ vunum ki kagi coco ni.

²⁵ Agi gus tlesuu agi taarasi asina ki gursura, tuɗ gursu ndaɗta hu li ma Yawe Loogina manamma.

²⁶ U gursu ndaɗta agi ndak gus tlesuu agi minisina halaŋ, mbultina, timigiina, ɦugunina sum veŋŋa u sum ma daŋ ma yara agi tuɗ ti tle asina fok Yawe, aŋ hin kak u suu magisina u furira.

²⁷ Suu Levi suu sene masi kaɗi suu ka dukugina agi maa ki kasiɗi, kay asi dukugi ni ziisi kaɗi lay, sene masi kaɗi lay.

²⁸ Hu daɓpa vi basara hindira ni agi taa yam tlegeyegi suu agi horokosina halaŋ, may ni agi tokosi ni hu ɦoŋzi magina voo.

²⁹ Na ni suu Levi suu mbas masi kaɗina mbaya, koyogi suu cuki dukugina u gor suu kuyuna mba tiya hoɓ hayasi ki u min masira, u boyogi suu donona may, ni kay a Yawe Loogina paɗ vunum ki kagi hu sunda agi laɗta halaŋ.