GA 8ATAMBARA 13 - Boy Lonana

Kaɓakŋa kay suu goɓ fulina

¹ Gaɗta an dagira cara halaŋŋi agi li uɗu, agi cuk va kaɗɗi lay, yow va ki uɗɗi lay.

² Lini sa ma jok vun Lona ɗowba sa ma wi dlara li ha fokka col wa kolo dukugiya, lini nam ka dagi kay dlara hin a tak ki kala, kay dlara mbuɗ mbuɗta kala ni,

³ Takka u dlara mbuɗ mbuɗ ndaɗta li may, lini nam di ana, «Tuɗuygiya sunuygi loogi suu daŋŋa» ni lo ma agi ka wambina,

⁴ Agi hum boy ma vi sa ma jok vun Lona nammaɗi. Kay ni Yawe Loogina hal a tukugi ni tuki ɦawaa, kay a wi ki ana agi gasi ni suu min Yawe Loogina gasi u hurugi halaŋ u mbalatagi halaŋ may sura.

⁵ Agi tuɗ ni u Yawe Loogina nam dew, agi lammi ndaaram na dew, agi li ni u gaɗ mamba na hol, agi humummi delem na dew, sunummi nam dew may, agi njun tagi ni egem na dew.

⁶ Sa ma jok vun Lona ɗowba sa ma wi ha fokom namma cam kiyo, kay nam li dla cora ni eg Yawe Loogina, ma cukugi ay ki hu mbassa Egiptera hu mbaɓura, sa namma hal a tuɗugi ki ni day eg voɗta Yawe Loogina takagirara. Agi tli co ndaɗta ki dukugiya.

⁷ Lini wayaŋŋa, goŋ suŋŋa, ɗowba gooŋŋa, gooŋga tamara, ɗowba cara aŋ ka miniɗira, ɗowba saaŋ ma vok zina ko aŋ na mayna, mbay egeŋ ki ŋgayra daŋ ana, «Tuɗuy sunuy loogi suu daŋŋa», lo namma aŋ lay buŋ lay ka wambi.

⁸ Ni duk loogi suu vi suu ŋguy egeŋ tokŋa u suu ay ki day dayna, hu mbassa agi hu wanda.

⁹ Aŋ vi boy nammaɗi, humumbi lay, aŋ ka juɓ a di ki kambaɗi. Aŋ ka wam hahawambi, njun kambi lay.

¹⁰ Aŋ ndak a cam ki ni ci na ɗow, a cam kira ni aŋŋi sa ma a koŋ tin egem jewna, suu hiŋŋa hin dokoŋŋi dokiya.

¹¹ Aŋ gikim ki u ɦinira nam miɗ kiyo, kay nam hal a tuɗuŋ ki day eg Yawe Looŋŋa, ma kalaŋ ay ki hu mbassa Egiptera hu li ma mbaɓurana.

¹² Suu Israelna halaŋ hum boy namma na ni mbuɗ ndaana, ni asi ka hin li co ndaɗta dukugi oloɗi a fafaɗta.

¹³ Lini hu ɦoŋzi ma Yawe ɦagina ana agi cuk huwana, agi hum dlara di ana,

¹⁴ Suu may suu sunusi kaɗina cuk ay ki hu zi namma, asi ganyam suu hu ɦoŋzi nammana di ana, «Tuɗuygi sunuygi loogi suu daŋŋa», loogi suu agi ka wasiɗina.

¹⁵ Ni agi hal u boy namma humum ki jiviya, hal u dlara ki zu zulu, hu li ma agi hum ki wa ana dlara co ndaɗta li gasi dukugiya ni,

¹⁶ agi ci suu hu zi nammana halaŋ ki u ŋgewna, agi ŋgal zi namma ki u suu hurumma halaŋ, ci yoorina ki u ŋgewna lay.

¹⁷ Tlegeyesi suu hu zinna halaŋ agi tokosi ay duk gayra hu ɦoŋzi namma, agi ŋgal zi namma ki u tlege suu hurumma halaŋ maŋ Yawe Loogina, zi namma fi ni ɓalakka ŋgolla a fafaɗta, sa ka min ɦoŋzi namma kolo oloɗi.

¹⁸ Tlesuu doo ki kasina halaŋ agi tli maa kogiɗi, li wa na ni yara vi Yawera ka hoŋ ay kagiɗi, nam hin wagi hahawagiya, hin zulugi cocoo, ko nam di ay ki jew maŋ somoyogira na.

¹⁹ Kay agi hum vun Yawe li u gaɗ mamba, an ɦagira cemi wanda, li dla mayra jivi ɗegee ii Yawe Looginara.