GA 8ATAMBARA 12 - Boy Lonana

GA ƊTA VI YAWERA 12.1—26.19 Li ma manam ki dew a goɓ Lona huna

¹ Gola ni gaɗta u nera agi saa kasi jiviya, a tuɗ li uɗ hu mbassa agi hin lak huruɗ wandara, ni mbassa Yawe Lona vi somoyogi ɦagira magi hu buu ma agi ka iiri kay ndaŋgara tuna halaŋ.

² Agi bulum li ma suu agi dikisi ki wanna minim a goɓ loogi suu ɦawana kolo kay yam ɦinira zeɗ zeɗna ki halaŋ halaŋ, u ma keŋ voɗtana, ma mini u ŋgusugi suu ŋgolona lay.

³ Agi toosi givin ma togolla masi kiyo, hawaɗas ɦini masira teteɗta ceɗira ki lay, gu masi teteɗ ceɗina ma piina suu vi Aserna agi ŋgalasi kiyo, fulina masisina agi toosi kiyo, agi bulumusi sesi ma ɓiiri hu liisi nammana kiyo.

⁴ Kay Yawe Loogina ni agi li ko asi naɗi.

⁵ Agi hin halammi hu li ma Yawe Loogina hin manam duk njafagi halaŋ a tin sem huna, a kakŋi hu lay, ni agi hin tuɗ ni hu li namma.

⁶ Hu li namma agi hin li ɓivun ma ŋgalam ki ŋgalina, li ɓivun ma min duk ɦoŋga, ɦal yam tlegeyegi suu agi feɗesina ki maŋ Lona, li ɦal mayra aŋ ɦal u min maŋgara, ɗowba li dlara aŋ suu taŋ kaɗ a laɗta kiyo, ɦal gor yoori suu vuɗ fok jewna ki maŋ Lona, mbutlina, timigiina u ɦugunina lay.

⁷ Agi u suu magisina halaŋ tagi ti nam ma teteɗna ay fok Yawe u furira ko tagi dew. Agi hin furi kay sun magira li jivi ɦayra kay Yawe Loogina ka njunugiya, nam paɗ vunum ki kagiya.

⁸ Agi ka li ko aygi li cemmi wanda gegelay lini dlara u min mamba ta hurum vaɗta naɗi.

⁹ Kay agi ka bay cuk hu li ma koɗ tara tuwa, hu jo ma Yawe Loogina ɦaginana.

¹⁰ Na may agi hin calaɗ lum ma Yurdanna, agi hin nda cuk hu mbassa Yawe Loogina ɦagira a jonara, nam hin dikigi suu babali magisina ki halaŋ halaŋ. Agi hin lakŋi u heɓpa.

¹¹ Ni hu li ma Yawe Loogina manam u tamba a sem tii ki huna. Agi tuɗ u tlesuu an dagi ana agi tuɗ u asiyana halaŋ, ɓivun ma ŋgalam ki ŋgalina, ɓivun magi ma kay tagina, ɦal magira ɦawara, megelay ma agi manam u min magira a ɦam ki maŋ Yawe Looginana.

¹² Agi hin lak u furira fok Yawe Loogina, agi tagira, goryogi suu njufiina u gorɓiina, suu magi suu sunugina, njufiina u boyogina, u njaf suu vi Levi suu ka dukugina halaŋ, kay asi dukugi ni joosi maa kaɗi.

¹³ Gologi tagi jiviya ka lagi ɓivun magina ha ki hu li ma nagelay ma agi wam jivina naɗi.

¹⁴ Lagina ni hu li ma Yawe manamma doy hol, ni hu ɦoŋzi ma duk njafagi maa dew agi hin tok li ɓivun ma ŋgalam ki ŋgalina ni huwa, ni agi hin li dlara an dagirara halaŋŋi huwa.

¹⁵ Na may agi ndak a ŋgaɗ yoo megelay hu ɦoŋzi magina ko agi minda na, u va ma Yawe Loogina ɦagina u paɗvunnana, yoori suu teteɗna u suu ka teteɗɗina halaŋ agi mba kommi ko ndal dukka u zaana na.

¹⁶ Na may ni agi ka ti busunaɗi, voom ki kaŋga ko ndal yona na.

¹⁷ Tlesuu agi ka tasi ha ki hu ɦoŋziiginaɗina ni, yam waagi ma agi ɦamma, yam sum veŋŋa, yam mbulna, gor yoori magi suu vuɗ fok jewna, mbutlina, timigiina u ɦugunina halaŋ, ɦalla aŋ ɦaɗ maŋ Lona u min maŋgara, va ma aŋ ɦam u min maŋga a njundana, tle asina halaŋ ka tasi ha ki voɗi.

¹⁸ Tle asina agi mba tasi ni fok Yawe Loogina hu li ma Yawe manamma agi tasi ni u goryogi suu njufiina, gorɓiina u suu magi suu sunugina, njufiina u boyogina halaŋ, u njaf suu vi Levi suu ka hu ɦoŋzi maginana bel lay. Agi hin lak u furira fok Yawe Loogina hu dlara agi laɗta halaŋ.

¹⁹ Gologi tagi jiviya, lagi njaf suu vi Levina lalasɗi, hu li ma agi ka tu iirina halaŋ lasi jiviya.

²⁰ Hu li ma Yawe Loogina mbuɗugi mbas magira ki ŋgol wa ni agi di wa ana may tliwna karam kamiya ni agi fammi na gaw.

²¹ Lini li ma Yawe Loogina manam a tii sem hurumma ha ki eg ɦoŋziigina day ni, agi ndak ŋgaɗ mbutlina u timigiina u ɦugunina hu ɦoŋziigina tlesuu Yawe Loogina ɦagisinana, li ko ndal an dagira na may. Agi ndak komosi ha hu ɦoŋzi magina ko agi minda na.

²² Na daŋ may agi ndak a komosi ko ndal kom dukka u zaanara na may. Sa ma ki teteɗna u sa ma ka teteɗɗina ndak ti ko tasi dew.

²³ Va ma ŋgolna ni cologi eŋ coco tagi busunaɗi, kay busuna ni iirira, agi ka kom tliwna u iiri mamba halaŋgi.

²⁴ Agi ti busunaɗi, voogina ki ga ko ndal yona na.

²⁵ Lini agi ka tambi ni agi hin lak u furira, agi tagira u goryogi suu hin ka ŋgoorogi daganna, ni kay ana agi li dlara ɗegeera ii Yawe.

²⁶ Va maa dew ma agi a mbaaram hu li ma Yawe manamma ni tlesuu agi ɦasi kina, u ɓivun ma agi lam u min magirana.

²⁷ Agi li ɓivun ma ŋgalam ki ŋgalina, tliwna u busuna, kay givin ma togolla vi Yawe Looŋŋa. Agi vo busuna vi ɓivunna kay givin ma togolla, na may tliw ma hinna aŋ komomu.

²⁸ Gologiya, humugi boy ma an dagina wanna jiviya, ni agi hin lak u furira agi u goryogi halaŋ hin ka ŋgorogi dagan gak gak, kay ana agi li dlara jivi ɗegeera ii Yawe Loogina.

Neegi tagi ko loogi suu Kanaanina

²⁹ Hu li ma Yawe Loogina dikigi njaf suu agi cuk ha hu mbas masira wanna ki fokogi wa ni, agi hin dikisiya, hin cukugi ziigi ki hu mbas masira.

³⁰ Lagi tagi jiviya, hin tagi a vi hu dawna a li ko ndal asi lira na mayɗi, hu li ma agi dikisi kina ni, li tagi jiviya, halasi loogi masisinaɗi. Dagi ana suu asina li sun Lona ni ana mege, ami min li ko ndal asi lira na may, dagi naɗi.

³¹ Kay Yawe Loogina ni agi ka ndak a li ko asi naɗi, kay tlesuu ka ii Yawe jiviɗina, tlesuu nam ka minisiɗina halaŋ asi lasi maŋ loogi masisina. Goryosi suu njufiina u gorɓiina lay asi ŋgalasi ki maŋ loogi masisina.