GA 8ATAMBARA 11 - Boy Lonana

Hum u sunda Lona laɗta kiyo

¹ Agi min Yawe Loogina u hurugi halaŋ, agi hum u dlara nam dagirara li uɗ may. Gaɗ mamba nera u yalna halaŋ, hu buuna tew tew.

Humugi sunda Lona laɗta

² An di cemi ni ka maŋ goryogi suu hum dlara saɓakŋa ta li wanda kaɗi, waɗ ka u irisiɗi laynaɗi. Agi wi dlara Yawe ɦaɗagira wanda, ŋgol mamba u bik kom ma saɓakŋa maaki gii kagina.

³ Takka u sunda ŋgolora nam laɗ ay hu mbassa Egiptera, eg Faraw mul ma Egiptena u suu mamsina halaŋ.

⁴ Dlara nam laɗ eg asgaari suu Egiptena, kulumi masisina u puspus masina halaŋ, nam kuluɓusi ki duk mbo Lum ma Cerewna, hu li ma asi a dikigi ugi ayna. Yawe bulumusi ki a fafaɗta ta ta cemi.

⁵ Dlara nam lagira ay egegi ŋgoo bagi hu fulla ta ta agi lagi cemi wandara.

⁶ Dlara nam laɗ eg Datan u Abiram goryoŋ Eliyab ma goŋ Rubenna, ndaŋgara mal vunuɗ likisi ki ni dukugi agi suu Israelna na halaŋ u suu masisina halaŋ u mbutluɓ masina halaŋ u suu tuɗ kay ceeresina halaŋ lay.

⁷ Agi wi sunda ŋgolora vi Yawera ki ni u ii tagira.

⁸ Agi gologi gaɗta an dagira cemi wandara jiviya, kay ana agi lakagi u ɦiŋga a agi cuk hu mbas mayra agi hin tlaɗ ki lak hu wandara.

⁹ Kay a buu magina ɦuɗ fok fiyek kay ndaŋgara Yawe vi vunum kaɗ a ɦaɗ maŋ somoyogi u gor ŋgologi masi suu hin ka ŋgorosi daganna lay. Mbas mayra law ki mbiira u mbul yumma.

Mbassa Yawe goloɗ cocora

¹⁰ Mbassa agi cuk huruɗ wandara ka ko mbassa Egiptera agi li ay hu wandara naɗi, ay hu ni agi zaa tlena hin yorokosi yona kasi ni yorokiya.

¹¹ Mbassa agi hin cuk huruɗ wanda ni mbassa ɦinira huruɗ cocora, li ma ɦuɗugumma hu ɦay lay, ni li yo lona si hu tew tewna.

¹² Ni mbassa Yawe Loogina goloɗ cocora, ii Yawe Loogina ka cuki kaɗu, ha hu gijaŋ basara ta ta daɓ maɗta.

¹³ Lini agi humugi gasi u gaɗ manda an dagira cemi wandara, a minigi Yawe Loogina, sunum u hurugi halaŋ u mbalatagi halaŋ lay ni.

¹⁴ An hin sagi yona hu mbas magira u tilim tew tew may, yo ma benewna u ma vun semeɗnana lay. Agi hin feɗ wa ble magina u sum veŋ ma wilina u mbulna may.

¹⁵ An hin ɗufugi haɗna maŋ yoori magisina, agi hin ti tina ki jivi u mayagi may.

¹⁶ Gologi tagi jiviya hin hurugi a mbuɗ a viɗigi ii tagiɗi, a mbuɗ hurugi a sunugi loogi suu ɦawanaɗi a goɓ ga fokosiɗi lay.

¹⁷ Li wa na ni huu Yawe hin ɓeŋ ki egegiya, nam hin dug huulona kiyo, yona ka si oloɗi, ndaŋgara ka hin jiv va oloɗi lay. Agi hin njay ki hu mbassa jivira Yawe ɦagira wanda.

¹⁸ Boy ma an dagina wanna vagina hurugi jiviya, ŋgayam hurugiya, agi takam ki u njunda njunum ki del kogira, ɓiirigina ki vogogi a va ma gi humba.

¹⁹ Agi haɗam maŋ goryogi dasi ana, lini agi vo varagiya, lini agi tuɗ hu voɗta, lini agi buuri gaa, lini agi coli kolo lay.

²⁰ Aŋ ɓii boy namma ki kolo vun goŋ maŋga, ki kolo vun kaa ma kal ha hu ɦoŋzinana lay.

²¹ Kay a buu magina u buu ma vi goryogina, ma Yawe suu tam ay ki u somoyogi a ɦasinana ɦuɗ ha fok ŋgol kay ndaŋgara ko ndal huulona kolo kay ndaŋgara gak gak wandara na.

²² Lini agi gol gaɗ ndaɗta gasi jiviya, ta an ɦagira a agi li uɗ wanda ni, a min Yawe Loogina may tuɗ hu voɗ mamba ɗegee may, njun tagi ni egem may ni,

²³ Yawe hin dikigi suu ha fokogi wanna ki halaŋ, ko ndaɗta na agi hin dik suu may suu bolow suu saɓak suugi layna.

²⁴ Li ma agi tuɗ hurum cana bel hin mbuɗ ki ni magina, col ay ŋgoo bagi hu fulla Libanda day, col ay fun mbo lum ma Efratna ta ta fun mbo lum ŋgol ma u fiɗiginana, hin ki halaŋŋi mbas magira.

²⁵ Sa ma ndak a col ay fokogi kaɗi, Yawe cukugi ndaaragi ha ki kay suu hu mbassa agi tuɗ huruɗ wandara halaŋ halaŋ, ko nam vi vunum ki jewra na.

Paɗvunna u givunna

²⁶ Gola an tinigi karam fokogi ni paɗvunna u givunna may.

²⁷ Paɗvunna ni lini agi hum u gaɗta vi Yawe Looginara, ta an ɦagira cemi wandara.

²⁸ Givunna ni lini agi ka hum u gaɗta vi Yawe Looginaraɗi, lini agi hin voɗta an haɗagira cemi wandara kiyo, tuɗugi u loogi suu agi ka wasiɗina.

²⁹ Hu li ma Yawe Loogina cukugi wa hu mbassa agi hin a tlaɗ ki lak huruɗta ni agi li paɗvunna ay kolo kay ɦinira Garizimba, li givunna ni kay ɦinira Eballa may.

³⁰ Ha ni ii hiŋŋa ŋgoo lum ma Yurdaŋŋa ha vun voɗta ii ma u fiɗiginana na. Ni hu mbassa vi suu Kanaanina, hu Araba, vok tasi u Gilgal na, tok eg ɦinira Morera.

³¹ Kay agi hin taɓa lum ma Yurdaŋŋa a tuɗ lak hu mbassa Yawe Loogina ɦagirara. Agi hin tlaɗ kiyo, hin cuk ziigi ki huwa.

³² Agi gi humugi tew tew a li u gaɗta, nera u yal ma an haɗagina wanna jiviya.