GA 8ATAMBARA 10 - Boy Lonana

Bu Suuna bulum cora vi suu Israelnara kiyo

¹ Yawe hin dan ana, «Ceɗ ɦinira daŋga koŋ mba' ko ndal mayra fok jewra na, ɗiŋ ay kolo egen kay ɦinira, aŋ hin ceɗ Zanduk guna may.

² Kay ɦinira ceɗira an hin ɓiiriŋ boy ma ay ɓiiri kay ɦini mayra jewrana ay huwa, ɦinira aŋ tooɗ kira. Ŋgoo dagan aŋ hin cuk ɦinira ceɗi mba ndaɗta hu Zandukka.»

³ An ceɗ Zandukka ni gu akasiyana, ceɗ ɦinira beɗira mba' ko ta jewra na may. An ɗiŋ kolo kay ɦinira u ɦini mayra ceɗi mba' ndaɗta kon may.

⁴ Nam ɓii kay ɦinira ceɗi mba' ndaɗta ni boy ma ay ɓiiri hura jewrana olo, ni gaɗta doogo ta Yawe dagira ay kolo kay ɦinira duk kura ŋgalla, hu li ma agi tokina. Yawe hin hoŋon ɦini ndaɗta aya.

⁵ An hin hoŋ irin ɗiŋ ay ki ga kay ɦinira, mba cuk ɦinira ceɗi ndaɗta hu Zandukka an ceɗeɗta, ndaɗ hin cuki hu ko Yawe danda na may.

⁶ Suu Israelna yow ha fun goloŋga Bene Yakanda tuɗ irisi ha Mosera na. Li namma Aaron miɗ ni huwa asi tosommi hu lay. Gooromma Eleazar mbuɗ a mul ŋgol ma li ɓivunna balamamu.

⁷ Ha hu li namma ni asi jok usi tuɗ ki hu Gudegoda, hu Gudegoda asi tuɗ Yotvata, li namma ni mbona hu cocoo.

⁸ Yawe yow njaf suu vi Levina ki vay dasi zeɗ a zii Zandukka Galamba vi Yawera. Asi ni suu sun Yawena, suu vunna ki paɗi kasina, ni ko ndal asi ka li cemi wandara na may.

⁹ Kay ndaɗta suu vi Levina joosi maa kaɗi, ɓorow ma asi fam ko gorsesina fi nana kaɗi lay. Yawe ni a vaasi ma jona gaw ko ndal Yawe Loogina vi vunum di u tambara na.

¹⁰ Kay ndaɗta an hoŋ ay kolo kay ɦinira ko jewra na buuna dok-fiɗi. Yawe humun cen manda wa olo. Yawe ka min a baagi kiɗi.

¹¹ Yawe dan ana, «Col koloo, tuɗ fok suuna gasi ii voɗta, asi tuɗ lak hu ndaŋgara an vi vunun kaɗ u somoyosi day a ɦasirara.»

Gaɗta minda u hum vunna

¹² Cemi ni agi suu Israelna va Yawe Loogina ka juɓum kogina ni mege? Va ma nam juɓumma ni ana agi li ndaa Yawe Loogina, tuɗugi hu voɗ mamba na ɗegee. Min a sun Yawe Loogina u hurugi halaŋ, u mbalatagi halaŋ lay.

¹³ Hu li ma agi hum u gaɗta vi Yawera, u gaɗta an ɦagira cemi wanda, agi li na ni kay jivi magira na ɗow.

¹⁴ Na daŋ may Yawe Loogina huulona u huulona ma kolo dayna u ndaŋgara ni mamsina halaŋ, u tlesuu huruɗna halaŋ lay.

¹⁵ Kay Yawe njun tammi eg somoyogi doy hol minisiya, ŋgoorosi daganni nam minisi goryosiya, ni ana agi ni suu nam managi ki duk njaf suuna halaŋŋa, ko agi wi cemi wanda na.

¹⁶ Agi cawagi ki ni ɗiwra hurugi kurufura, agi mba lagi yagi eŋ oloɗi.

¹⁷ Kay Yawe Loogina ni Lo ma kolo kay loogi suu daŋŋa belna. Nammi Bu Suuna vi somi suuna halaŋ. Lo ma ŋgolna, ma Saɓakŋa Kom Belna, ma dlam cona, ma ka keŋ li ma dew ɦawaɗina, ma ka mbuɗɗina. Gal. 2.6; Efes. 6.9

¹⁸ Ma li ɗegeera kay gor suu kuyuna u boyogi suu donora, ma min suu poy kolona ɦasi tina u baraw ma cuk tasina.

¹⁹ Agi may ni minigi ŋgayagina kay agi ay hu Egipte ni ŋgayra may.

²⁰ Agi li ni ndaa Yawe Loogina, sunummi nam dew, agi njun tagi ni egem dew, agi li suu tagi kay dlaa ni u sem dew daŋ.

²¹ Agi ŋgaagina kay nammi Loogina, nam lagi dlara ŋgolora mbuɗ mbuɗta cocoo, agi wi u irigi lay.

²² Somoyogi tuɗ ha hu Egipte ni, asi ni dok-kiɗisiya ɦawaa, cemmi ni Yawe Loogina mbuɗugi zulira ko ciciwra kolo huulonara na.