GA 8ATAMBARA 1 - Boy Lonana

BOLLA MOIZ DA Ɗ JEWRA 1.1—4.44

¹ Gola ni boy ma Moiz dam maŋ suu Israelna halaŋ hu li ma asi ay ŋgoo bagi hu fulla keŋ lum ma Yurdanna ii hiŋŋa, hu li ma ir irna vok tasi u zi ma Sufna duk ɦoŋ gi Paran, Tofel, Laban, Haserot u Dizahabma.

² Duk ɦoŋga col ay u ɦinira Horebba a mbay u ɦinira Seirra a tli voɗta ay Kades Bernia ni li buuna u tuɗta ni doogo yam dew.

³ Doli ni hu basara dok-fiɗira, ŋgoo cukka asi cuk ay ki hu Egiptera ni Moiz ɓak suu Israelna, vasi u dla mayra Bu Suuna damba ay masira ki halaŋ halaŋ.

⁴ Hu li ma Bu Suuna ci mul ma vi suu Amorna, Sihon, ki na ni, nam ay cuki ni hu Hasbon. Hin ci Og, mul ma Basanna, nam cuki ni hu Astarot may.

⁵ Ay kolo keŋ lum ma Yurdanna ii hiŋŋa na hu mbassa Moabba ni Moiz gijaŋ vasi u gaɗta ki ko wandara na.

Gaɗta kay a cuk tasi tuɗta

⁶ Ay hu Horeb ni Yawe Looygina ɓakaygi ana, «Basara ki ni bolowo agi ka laki kay ɦinira tani.

⁷ Cemi ni pereɗ irigi tuɗugiya, tuɗugi u ɦinira vi suu Amorna, vi suu ŋguy egesina halaŋ, ŋgoo bagi hu fulla, hu mbassa gara hu Negeb, kolo kay doŋga hu mbassa vi suu Kanaanna hu Liban ta ta tew fun mbo lum ma Efratna.

⁸ Gola an ɦagi mbas ndaɗta wa, cukugi huwa, tuɗ lakagi hu mbassa Yawe vi vunum a haɗ maŋ somoyogira, maŋ Abraham, maŋ Isaak, maŋ Yakob u njafasi halaŋ ka ŋgorosi daganda.»

Moiz yow suu kaɓakŋa

⁹ Kay ndaɗta an dagi ki fok jew ana, «An ka ndak a hinigi man an na holɗi.

¹⁰ Yawe Loogina zulugi ki cocoo, gola cemi ni agi zuli coco su ciciwra kolo huulonara.

¹¹ Ko Yawe Lo ma vi somoyogina zulugi ha fok na bup bup. Ko nam paɗ vunum ki kagi ko nam vi vunum ay ki fok jewra na may.

¹² An na dew ni ndak a ziirigi gonok magira, sek magira u hurugi ma ɓalakina ni nanage?

¹³ Ay u deeregi halaŋ halaŋ, mbaarangi suu yalna suu neey suu agi tukusi kina aya, an min tinigisina fokogi a ŋgolora.»

¹⁴ Agi hin hoŋon dira ana, «Dlara aŋ daɗta halaŋŋi jiviya.»

¹⁵ An hin managi suuna ki u deeregi halaŋ, suu neeyna suu agi tukusi kina. Tinisi a ŋgolora fok suu buɓma, fok suu dog vadlna u fok suu doogona lay. Yow suu ŋgolona ki u deeregi halaŋ lay.

¹⁶ An ɦal voɗta maŋ suu muli magi suu kaɓakŋa ana, «Agi humugi dlara vi gorseginara, agi hin kaasi ii dlaasira ni u ɗegeera, dlara vi sana duk tam u wayammara, ɗowba sana u ŋgay mamma ka vo varamma.

¹⁷ Hu kaɓak magina agi ka sek ii saɗi. Humugi dlaŋ gogonara kora vi sa ŋgolnara na lay. Lagi ndaa saɗi kay kaɓakŋa ni vi Lona, lini dla ndaɗta gol irigi loɓ wa ni agi tuɗunda ay fokonu, an hin gol u dla ndaɗta.»

¹⁸ Na daŋ may an ɦagi voɗta ki kay dlara agi a laɗta halaŋ.

Moiz cuk suuna ŋgay gumun a tuɗ gol mbassa Kanaanda aya

¹⁹ Aygi yow ay u ɦinira Sinayra, jakaygi ay ŋgoo bagi hu fulla ŋgol coco ta dlaɗ co ɦayra, tlaygi voɗta ay hu ɦinira Amorra na, ko ndal Bu Suuna Looygina ɦaygi voɗtara na. Aygi mba tew hu Kades Bernia.

²⁰ An dagi ana, «Agi tew ki u ɦinira Amor ta Yawe di kaɗ a ɦaygirara waɗi su.

²¹ Gola Yawe Loogina ɦagi mbas ndaɗta wa, tuɗugi kolo ii lakagi huwa, ko Yawe Lo ma vi somoyogina dagira na, lagi ndaaɗi, hin tagi a asi su kagiɗi.»

²² Agi halaŋ hin mbay egen dan ana, «Sunuygi suuna ha fokoygi asi tuɗ goloygi mbas ndaɗta ay kiyo, asi hin mba cuɗuygi dlara aygi humuɗta, takaygi voɗta aygi a tlaɗ hara may, zi ma aygi tuɗ cuk hurum jewna may.»

²³ Boy namma irin jivi may. An hin yow suuna dukugi doogo yam mba', tli ki u deeregi dew dew halaŋ.

²⁴ Asi hoŋ hu mbassa ɦinira cocora ta ta mba ki hu ɦuɗugumba Eskolla gol yam mbassa ay ki halaŋ.

²⁵ Asi nduɗuygi vuɗ tlesuu hu mbas ndaɗtana ay kosi lay. Asi mba cuɗuygi dlara asi waɗ ay u irisira di ana, «Mbassa Yawe Looygina ɦaygira wanda ni mbassa jivi cocora.»

²⁶ Na may ni, agi min ka a tuɗ kolo hu mbas ndaɗtaɗi. Agi hum ka u boy ma Yawe Loogina dammaɗi.

²⁷ Agi yow gurnira vo hu mbutluɓ magina di ana, «Yawe cukuygi ay ki hu mbassa Egiptera ni ko hurum ka egeygi jiviɗira, nam min a ɦaygi ki ni ko suu Amorna ɦawaa. Ni a daɓaygi kira.

²⁸ Aygi hin tuɗuygi kolo ni ara na ɗowge? Gorseygina mba mbuɗuygi ki ndaana ana suu asina wuli ŋgolo cocoo, asi saɓak coco lay. Ҥoŋziisina ŋgolo coco lay, mini ha kaŋ kolo huulona na ɗow. Aygi wi suu Anakŋa ni u ii taygira lay.»

²⁹ An dagi anaba, «Dlak tagiɗi, lagi ndaana kosiɗi lay.

³⁰ Yawe Loogi ma tuɗ fokogina hin duu u asi kagi ni u tamba. Ni ko ndal nam li ay hu Egiptera na may, agi wi ay ni u ii tagira lay.

³¹ Ay ŋgoo bagi hu fulla Yawe ŋgomogi ko sana tli gorom kom kolo a tuɗ voɗta na, ta ta mba tewegi ki hu li ma agi cemi ka hurum wanna.»

³² Hu dla ndaɗta halaŋ lay ni agi tin hurugi ka kay Yawe Looginaɗi lay.

³³ Nam ma ka tuɗ fokogi a halagi li ma kakŋa, njeŋge ni nam tuɗ fokogi u kura a takagi voɗta, faali ni nam li ɗugulla kagi a ŋgusna.

Lona kaɓakŋa kay suu Israelna

³⁴ Yawe hum boy ma agi damma, hurum ɓeŋ ki cocoo, nam suu tam ki ana,

³⁵ «Duk suu co agina halaŋŋi sa ma hin a wi mbassa an vi vunun a ɦaɗ maŋ somoyogi ndaɗta kaɗi.

³⁶ Sa ma hin wi mbas ndaɗta ni Kaleb ma goŋ Yefunena doy hol, an ɦam mbas ndaɗta ni mam nam u goryomu, ndaŋgara sem tuɗ kaɗ wanda halaŋ, kay ana nam hum vun Yawe jok hurum kaɗi.»

³⁷ An tanda lay Yawe hurum ɓeŋ egenni kay dlaagira nam di ana, «Aŋ taŋga lay ni ka kal hu mbas ndaɗtaɗi.

³⁸ Josuwe ma goŋ Nunna ma ka li sunda fokoŋ wanna hin kal hu ni namu, Nammi sa ma vi hurum cocoo, nammi sa ma hin ɓorow jo ma vi suu Israelnana.

³⁹ Goryogi suu agi di kasi ana suuna hin yowosi kiyona, suu may suu ka wi vun tuɗina, ka ɓorow ii jivira ki u coraɗina, asina hin cuk hu ni asiya, an ɦasi mbas ndaɗta ni masiya, asi hin lak hu ni asiya.

⁴⁰ Na may agi tagira, hoŋogi ŋgoo bagi hu fulla, tuɗugi irigi fun Lum ma Cerewna.»

⁴¹ Agi hoŋon dira ana, «Ami li cora eg Yawe wa, ami hin tuɗ kolo duu ko ndal Yawe Loomina damira na.» Dukugi ni gegelay col u suu mam suu duuna. Agi hin vi a taɓa kay ɦinira ni na zak gaw.

⁴² Yawe hin dan ana, «Aŋ dasiya asi ka ndak a tuɗ kolo a duunaɗi. Agi ka ndak a duuɗi kay an ka dukugiɗi, lagi dlara suu babali magisina a su kagiraɗi.»

⁴³ An dagi boyna, agi humun vunun kaɗi, agi ci wayra u boy ma vi Yawena, u coogi ndaɗta gak agi ɗiŋ kolo kay ɦinira.

⁴⁴ Suu Amor suu cuki kolo kay ɦini ndaɗtana hin cuk ay ki egegiya, ko ndal yumma gi deera ɦawa na, asi dikigi aya, asi caki cocoo, col ha hu Seir day ta ta tewegi ki hu Horma.

⁴⁵ Hu li ma agi hoŋ ayna agi mba tii fok Yawe, Yawe humugi tii magina kaɗi, nam tin yam ka kay tii maginaɗi.

⁴⁶ Agi hin lagira na gak gak hu Kades ni kay ndaɗta.