GALATENA 5 - Boy Lonana

Hoŋ viɗ tagi ki oloɗi

¹ Kristu buɗuygi ki ni buɗta gasira kakaygi ɗigili hu buɗ ndaɗta, hoŋogi tagi hu mbaɓura oloɗi.

² Humugiya dagi ha ni an Pol lini agi caw ɗiwigi kiyo ni Kristu ka li va ma jivi kagi oloɗi.

³ An di ni maŋ suuna halaŋ olo, gegelay ma caw ɗiwimma lini nanagelay nam hum u gaɗta halaŋ.

⁴ Agi suu hal a mbuɗ tagi ɗegee fok Lona u gaɗta agi ɓorow duk ɦoŋogi ki u Kristu wa, agi mbuɗ ki eg oora vi Lona wa day.

⁵ Lini amiya ni ami wi ana Lona hin mbuɗuygi ɗegee fokommi namu ni va aygi ka juɓumma, u saɓakŋa vi Musuk Lonara ka njun uygi hu vira.

⁶ Lini aygi taɓi u Yesu Kristu ni caw ɗiwra lay caw kaɗi lay ka li vaɗi, va ma ŋgolna ni vira u minda na hol.

⁷ Agi gagijaŋŋa ay jiviya, sa ma hin doorogi kay a hum u gasira ni gege?

⁸ Sa ma ganagi yagina ni ka Lona ma yagi aynaɗi.

⁹ Suuna di ana kuffa ewra bu va ma ŋgolna kiyo.

¹⁰ Kay ndaɗta Bu Suuna ɦan eŋga hurun kay boy magina nam takan ki gasi, kay saa magira hin ka ɓorow zeɗ u anɗi, sa ma ganagi yagina lini nam gegelay ni Lona hin kaam ɓakŋa kamu.

¹¹ Gorsenna lini an ka di boyna kay caw ɗiwra jivi tuwa ni an hin tan asi lasan ni kay mege? Lini gasi ni boy ma an dam ana Kristu ɓali kolo hu gu garakŋa ka jivi oloɗi.

¹² Suu ganagi yagina garak u va ma asi ka lamma wa, mariyaɗ ni asi caw kini masira.

¹³ Gorsenna yagi ay ki ni ana agi li ki buɗiya hin buɗ magira a mbuɗ ki va ma co u min magira ɦawaɗi, ni na ɗow ana lagi u minda kay sun tagiya tagiya.

¹⁴ Gaɗta halaŋ taɓi hu gaɗta dewra ana min ndaraŋŋa ko taŋga na.

¹⁵ Lini agi lagi tagi ko mburi suu bagina na ni, ɗaŋi tagira li cora eg tagira togo, gol tagi jiviya, li ka naɗi ni agi ba tagi ki ni ɦawaa.

Li u minda vi Musuk Lonara ka u minda vi sa warna ɦawaɗi

¹⁶ Humugiya, ni boy ma an min daginana, Hin Musuk Lonara takagi voɗta ndaɗu, humugi u dlara vi sa warnaɗi.

¹⁷ Kay mege minda vi sa warna duu ko taɗ u minda vi Musukka, Musukka duu taɗ u minda vi sa warna may. Asi duu duk tasi ni duuriya agi ndak ka a li va ma agi minna oloɗi.

¹⁸ Lini Musukka taɗagiya ni agi ka njuni gaa u gaɗta oloɗi.

¹⁹ Aygi wi sunda vi sa warna tak ki ni, boy zoŋga, bay ɗegeera, u dla cora.

²⁰ Li ɓivunna lo ma ɦawana, u kumuna, suuna mbuɗ gonokka duk tasiya, asi yal tasiya tasiya, li honira duk tasiya, irsi ki ɓorowi cub cub.

²¹ Asi ŋgiziɗ tlena vi tasiya, guruɗ tasi ki u summa, kurufukka vi tlena, tlesuu co ko asina nana. An min dagi ki cecemi ko an di ay ki jewra na olo, suu li ko asina nana ka fi Mul Lonaraɗi.

²² Tlesuu Musuk Lonara lasina ni, minda, furira, heɓpa, lalamba, li dlara jivi eg saa, jivira, ɗegeera,

²³ ɗilira, u doo tara. Gaɗta ka co kay tlesuu asinaɗi.

²⁴ Suu vi Yesu Kristuna ci minda vi mbalatara ki u minda vi sa warna halaŋ.

²⁵ Musuk Lonara ɦaygi iirira ni aygi hiniygi taygi koɗ ndaɗ goloygiya.

²⁶ Ŋgaaygi taygiɗi, halaygi boyna duk taygi a ɓeŋ taygi ki ɦawaɗi, ŋgiziɗ tlena vi taygiɗi lay.