EZEKIYEL 9 - Boy Lonana

Gaɗta kay ɦoŋzi ma Yerusalemma u Ziŋ Lonara

¹ Nam sawalla kolo humun eŋga ana, «Agi suu a kaɓakŋa kay ɦoŋzi ma ŋgolna ɦuɗugi tagi ay tok. Gegelay ni mbay u vaam ma ɓalak lina ki u namma komu.»

² Gola ni suuna cuk ay ki u tasi na karkiya, ay fun vun ma ŋgolna ii mbayaw na ɗow, gegelay ni u vaam ma ci suuna kina komu. Sa maa dukusi dew ni u baraw dlemba cili cuki tamu. Va ma ɓii u namma kali eg gandi ma njuni hurumma. Asi mbay mba col eg givin ma togolla ma yoori u kawi ma tlawnana.

³ Bibiŋilla vi Lo ma vi suu Israelna col kolo kay Serubim hu li ma nam ka huna. Hin tuɗ irim ha eg vun Ziŋ Lonara na. Bu Suuna yi sa ma baraw dlemba cuki egemma u vaam ma ɓiira kali eg gandi ma hurumma mayna.

⁴ Yawe dam ana, «Tuɗ ha duk hu ɦoŋzina hu ɦoŋzi ma Yerusalemma, ɓii lomorora ki vok suu may suu ka yoo tasi ko dla cora li dukusi wanda halaŋ halaŋ.»

⁵ An hin huma ni nam di suu hiŋŋa ana, «Tuɗugi ha um hu ɦoŋzina may, cagi suuna. Agi tuɗ wanni wagi hahaw saɗi, gol sa irigi hahawɗi lay.

⁶ Suu maana, gorozoŋina, njufiina u gorɓiina, gorkemba u boyogina, agi casiya ta ta daɓasi kiyo, na may suu lomorora ki tini vogosina agi ŋgenesiɗi. Agi gijaŋŋa ha ni hu Ziŋ ma Teteɗna.» Asi gijaŋŋa ha ni u suu ŋgolo suu laki fun zirana.

⁷ Nam dasi ana, «Mbuɗugi Ziŋ Lonara ki njenjera, cuk suu miɗina oyosi ki vo kurufu hu kaana. Tuɗugiya.» Asi cuk ay ki ci suuna hu ɦoŋzina.

⁸ Hu li ma asi ka ci suuna na ni, an hin iirira ni an na dew. An girif kaŋga u vun gifinu sawalla kolo ana, «Yakkay, Bu Suuna, Yawe u huruŋ ma ɓeŋŋa, aŋ min daɓ u suu Israelna suu hin ndena ki ni bel gaw su?»

⁹ Nam dan ana, «Suluk ma vi suu Israelna u suu Yudana kal ki saɓakiya, mbassa ki oy u busuna cocoo, ɦoŋzi ma ŋgolona halaŋ ki hoɓi u dla cora. Kay asi ka di ana, Yawe noy mbas ndaɗta ki wa, nam ka ndak a waɗ oloɗi.

¹⁰ Kay ndaɗta irin ka a wi hahaw sa oloɗi. An ka saa kay sa oloɗi. An tinisi kasi ni nek poy masira cora.»

¹¹ Gola ni sa ma baraw dlemba cuki tamma u va ma ɓiira kali eg gandi ma hurumma mayna ka cuɗ vun dlara di ana, «An li ha ni ko ndal aŋ dan hara na may.»