EZEKIYEL 8 - Boy Lonana

Suun goɓ fulina kalafi hu Ziŋ Lonara

¹ Hu basara karkiyara, hu til ma karkiyana hu buu ma vadlna hu til namma, ni an ay kaki kalafi hu ziinda. Suu ŋgolo suu Yudana laki fokon may. Na gaw ni, saɓak ma vi Yawe Lonana mbay kanu.

² An gola ni vana fokon ko ndal sa warna na, ka ay u furum hoŋ ga na ni ko ndal kura na, ka ay u furum hoŋ ay kolo na ni weleɗ ko ndal kawi ma tlawna na.

³ Vana maɗ ay ki ko ndal ko sa warna na, mboɗon tlimiɗ yan u dewna. Ŋgoo dagan Musukka tlan ki kolo duk ɦoŋ huulona u ndaŋgara. Hu wiinda ni ndaɗ tuɗun hu Yerusalem, colon fun vun ma kal ha kalafi dukŋa hu Ziŋ Lonara hu keŋ ma ii mbayawna na, ni hu li ma fuli ma dlam cona ka tini huna, fuli ma zuɗ suuna mbuɗusi hurusi ki cona.

⁴ Hu li namma ni bibiŋilla vi Lo ma vi suu Israelna ka hu may. Tli tam ko va ma an wam ay hu ɦuɗugumba jewna na may.

⁵ Nam dan ana, «Goŋ sanna, gol iriŋ ha ii mbayaw na gige.» An gol irin ha ii ma mbayawna na ni, gola ni keŋ vunna mbayaw na ni, givin ma togolla maŋ fulina kaa. Fuli ma hurum co namma coli keŋ hu zow.

⁶ Nam dan ana, «Goŋ sanna, aŋ wi dlara asi laɗta wa su? Aŋ wi dlara ɓalakka vi suu Israelna tani wa ɗaŋ su? Ni ana an ɦuɗ tan ha ki day eg ziinda naɗi su? Aŋ hin nda wi dlara ki saɓaki co suu ndaɗtara olo.»

⁷ Nam tuɗun ha vun kaa ma kay zirna. An gola ni pay gulumunna ha ki cooyra ŋgolla na ɦuh.

⁸ Nam dan ana, «Goŋ sanna, co ii gulumunna kiyo.» An hin coom irim ki may, li namma mal ha ki gaw.

⁹ Nam dan ana, «Kal haa gol tlesuu co may suu asi a lasi cemi wanna.»

¹⁰ An kal ha kalafiya. An gola ni foto tlesuu ɦaram kaŋgana tinira na zeɗ zeɗ u foto tle bagina lay. Fuli suu vi suu Israelna halaŋ ki ɓiiri eg gulumunna lay, ki ŋguy kasi na halaŋ halaŋ.

¹¹ Suu ŋgolo suu Israelna suu dok-kiɗisiyana u Yazaniya ma goŋ Kafanna may coli fok fuli masi asina, u ganunna kosi halaŋ halaŋ, ndoosna col kasi kolo ko ɗugulla na.

¹² Nam dan ana, «Goŋ sanna, aŋ wi wa su? Gola ni dlara suu ŋgolo suu Israelna ka laɗ ki ŋgay gumunda, gegelay ka hu zira fuli mamma ka hura. Asi di ana, Yawe ka ndak a wamiɗi, Yawe noyomi mbas mamira ki wa.»

¹³ Nam dan ana, «Aŋ hin wi dlara saɓaki cora asi ka laɗta olo.»

¹⁴ Nam tuɗun ay ki fun Ziŋ Yawera, mayra ii mbayaw nara. Hu li namma ni boyogina ka laki ka tii fuli ma yam ana Tamuzna.

¹⁵ Nam dan ana, «Goŋ sanna aŋ wi wa su? Aŋ hin nda wi dla mayra co sura wandara olo.»

¹⁶ Nam tuɗun ha hu gulumunna kurufu eg Ziŋ Yawera. Gola kurufu hu Ziŋ Yawera ni duk ɦoŋ vunna u givin ma togolla ni suuna ka hu va ma dok-mba' yam vadl. Ŋgorosi mbuɗi maŋ li ma vi Yawena na, irisi mbuɗi u maɗiina na may. Asi ka goɓ vogosi ga fok faɗta.

¹⁷ Nam dan ana, «Goŋ sanna, aŋ wi wa su? Dlara co ndaɗta wanni ndak suu Yudana ka tuɗi su? Asi ɓeŋ mbassa ki u dlaasira cora, cemi asi gijaŋ lan cora ni egen anu. Gola cemi asi ka ɦuɗ hum bawra ay cinisiya.

¹⁸ An may ni hin li dlara ni u hurun ma ki ɓeŋina. An ka wi hahaw saɗi. An hinni hahaw sa ka irin oloɗi. Asi hin tiira, may ni an ka humusi tii masi nammaɗi.»