EZEKIYEL 7 - Boy Lonana

Buu ma kaɓakŋa kay suu Israelna hin tok

¹ Boy Yawena mba egen dan ana,

² «Aŋ goŋ sanna hum haa, Bu Sunna, Yawe, ɓak ndaŋgara Israella ana, Ni daɓpa, buu ma daɓpa ndak ha ki ni keŋ ndaŋgara fiɗi halaŋ.

³ Cemi ni daɓ makka, an hin sun yaanda ay kaku. An kaak ɓakŋa kakŋi u dla cookka may. An tokok dla cora yow yowna ay ni kak halaŋ.

⁴ Irin ka a golok jivi oloɗi. An ka wak hahawakgi, kay an tokok dla cookka ni kak halaŋ. Dlaakka cora yow yowna hinni kelek halaŋ. Ni agi hin wi ki ana anni Yawe.»

⁵ Bu Suuna, Yawe, di ana, «Hahawra sa waɗ ka ɦoyɗira, hahawra ŋgola ka mbaya.

⁶ Daɓ nduŋga mba wa. Ndaɗ ni mbaay gaw. Ndaɗ dliɗ ay ki kolo ni kaku. Gola ndaɗ ka day aya.

⁷ Suu cuki hu mbas ndaɗtana may ŋgolla ka day ay kagiya. Lina ndak wa. Buuna hin tok. Kolo kay ɦinira ni furira ka oloɗi, mbuɗ ni ndaana sak sak.

⁸ Cecem gaw ni an min voogi yaanda kagiya. An daɓ yaanda ki egegi ni na ndeŋ ndeŋ. An kaagi ɓakŋa kagi ni u poy magira. An tokogi dlaagira cora ni kagi halaŋ.

⁹ Irin ka a gologi jivi oloɗi. An ka wagi hahawagiɗi. An warakagi ni u poy magira. Dla cora hin dukugi ni na gak gak. Agi hin wi ki ana li dla ndaɗta ni an Yawe daŋ may.

¹⁰ «Gola, ni buu ma kaɓakŋa, ɓalakka ka min taɗ aya. Honira zul cocoo. Ŋga tara tuɗ ni fok na ɗow ɗow.

¹¹ Lassa col kolo wa, hinni tokolora li dla cora sak sak, hummi ɗetna hol gaw. Sa ma wasi hahawasi ka oloɗi lay.

¹² Lina ndak wa. Buuna hin tok. Sa ma gus tlena kina furi oloɗi. Sa ma gus ayna yoo tam ki may, kay ana yara vi Lonara ɓeŋ begera hu mbassara ki ni halaŋ.

¹³ Sa ma paara ka hoŋ a hal tlesuu gussa oloɗi. Lini nam ka mam iiri tu lay, kay ana dira di ki ana a ɓalak suu Israelna kiyora ki ni dii da. Gegelay ni kakŋi hu dla coomba. Sa ma fi saɓak mamma jewna ka oloɗi.

¹⁴ Asi hin bu tokolomma. Suuna hin min tasiya. Na may sa ma tuɗ ki a duu kaɗi lay. Kay ana yaanda ɓalak begera hu mbassara ki ni halaŋ.

Sa ma suɗ ki ko gaɗ ndaɗta kaɗi

¹⁵ «Ha ki kiɗikŋi ŋgewna kaa. Vo hu zina ni tuguɗira u mayra ka may. Sa ma tuɗ ha ki ŋgoo fun duunana ŋgewna camu. Sa ma ka vo hu zinana mayra u tuguɗira cam ki may.

¹⁶ U suu hin dew dewna pii ki may. Asi tuɗ kolo kay yam ɦinira ko ndal gugukka na. Suu daŋŋa tuɗ ga hu ɦuɗugumba may, ko suluk masina.

¹⁷ Kosi hin maŋ ki cocoo. Vun givisi ka ki yona lay.

¹⁸ Asi njun hurusi ki u baraw bolna. Tasi mbuɗ ki ndaa cocoo. Yasi ka tli ki kolo ko zolonaɗi lay. Asi kaa yasi ki godlokka halaŋ halaŋ.

¹⁹ Asi cuk gursu masira ki hu voɗta cuk lor masira ki lay. Ndaɗ mbuɗ ki njenjee. Gursu masira u lor masira ka ndak a suɗusi ki ko yara vi Yaweraɗi lay. Hayasi ka hoɓ oloɗi lay. Hurusi ki ni hamaliya kay lorra u gursura ni tlesuu mbaarasi cora kasina.

²⁰ Asi ŋga bege masira kosi ndaɗta cocoo. Asi yoo fuli u bege masi ndaɗta cocoo. Asi yoo fulina u bege masi ndaɗta. Kay ndaɗta an mbuɗusi tle asina a asi mbuɗ ki ndaa kosi cocoo.

²¹ An hinisi ki hu duk ko suu daŋŋa, asi ɦurumusi kiyo. An hinisi ki maŋ suu co suu hu mbas ndaɗtana a joosina, asi mbuɗusi ki njenjera.

²² An ɦasi ŋgoronu, ka min a golosi oloɗi. Suu cona hin ɓalakan mbas manda kiyo. Suu ɦulla hin mba ki huwa asi hin mbuɗuɗ ki njenjera.

²³ Dli galina, kay mbassa ki oy u busuna cocoo, ɦoŋzina ki oy u dla cora ɦay lay.

²⁴ An hin mbaa suu dlasi co ɦay su suuna halaŋŋa kay suu Israelna. Asi hin kal hu ziisiya. An hin bulum ŋga tara vi suu saɓakŋa kiyo, tlesuu mbususi ki teteɗna hin mbuɗ ki njenjera.

²⁵ Yoora mba wa, asi hal heɓpa lay ni ɦawaa.

²⁶ Dlara hahawra u yoora zul ha kay taɗ ni zuli na ɗow ɗow. Boy ma wanna mba na ni, ma hiniŋŋa ay dagan gaw. Asi hin joɓ dlara ha fokka ko sa ma jok vun Lona. Muli suu li ɓivunna gaɗta vi Lonara viɗ ki irisi lay. Sa ŋgol ma gaɗ kemba ka oloɗi lay.

²⁷ Mulna cukŋi baraw ma hahawra, goŋ mulnana njun ki hurummi doo ma li hahawra, ko suuna mbuɗ dlak cocoo. An hin lasi dlara egesi ni ko poy masira cora na may, a kaasi ɓakŋa kasi ni u ɓak masina may. Asi hin wi ki ana anni Yawe.»