EZEKIYEL 6 - Boy Lonana

Dlara jok fun Lona kay suu Israel suu goɓ fulina

¹ Boy Yawena mba tew egen dan ana,

² «Goŋ sanna gol iriŋ ha eg ɦinira vi suu Israelna, dasi dla cora an daɗta ha kasiya.

³ Aŋ tuɗ di ana, Ҥinira vi suu Israelnara, humugi boy ma vi Bu Suuna, Yawena, haa. Bu Suuna, Yawe, di ɦinira u li ma mbuy kolo dayna, di li ma boroŋ toŋŋa u li ma ɦuɗugumma ana, gologiya an hin mbaaragi ŋgew ma siina ay kagiya. An hin ɓalakagi liigi ma mbuy kolo namma kiyo.

⁴ givin ma togolla magisina hin hawaɗ kiyo. Givin ma togolla magisina suu ŋgal mbul ma his jivina hin toosi kiyo. An hin gagi maɗagi ni fun liigi ma togol fulina na tok tok.

⁵ An hin cuk ɦaa suu Israelna ni fun fuli masisina, an njayasi sokosi ha ki kay givin ma togolla masisina, ŋguyum yam ki u sokŋa na cutl.

⁶ Li ma agi cuki huna halaŋ ɦoŋzi namma hin hawaɗ kiyo. Li ma mbuy kolona hin ɓalak ki lay. Givin ma togolla magisina lay hin ɓeŋ kiyo. Fuli suu agi goɓosina hin toosi ki lay. Givin ma togolla magi suu ŋgal mbul ma his jivina hin toosi ki lay. Tlesuu agi lasi u bik kogina halaŋ hin ɓalakasi kiyo.

⁷ Maɗna hin ci dukugiya. Agi hin wi ki ana anni Yawe.

⁸ «Na may u suu hin dew dewna tuɗ ki duk njaf suu daŋŋa wa, hu li ma agi njay ki wa hu mbassa daŋga ni, an hin gol u suu hin ndena.

⁹ U suu maa nde asina humusi hin gasi kanu. Ay duk njaf suu ɦawana an hin kususi hursi ma li dla cora kiyo. Asi hin hoŋ irisi ay egenu. May fuli masi suu asi goɓosina ka li kasi oloɗi. Ni ko dla coosira asi laɗta, ko suluk masi ma asi lam namma halaŋ.

¹⁰ Ni asi hin wi ki ana anni Yawe. Boy ma an dam ana an hin lasi dla cora egesiyana ni ka kaboyɗi.»

¹¹ Gola, ni dlara Bu Suuna, Yawe, daɗta, «Koogi kogiya, cagi segi kaŋgaa di ana ndak wa na ga, dla cora, givun ma kay suu Israelna, ana ŋgewna hin casi kiyona, mayra hin ndi kasiya u tuguɗira zeɗ zeɗta lay ndak wa.

¹² Sa ma ha ki dayna tuguɗira cam kiyo. Sa ma tokŋa suu duuna camu u suu hinina yasi ki ŋguy u suu duuna gaw may. Asina hin laɓmi ko mayra may ta ta an daɓ yaanda ki egesi halaŋ halaŋ.

¹³ Ni agi hin wi ki ana, anni Yawe. Hu li ma maɗasi ka gira fun fuli masisina na sisi, ki ŋguy kay givin ma togolla masi na cutl. Kolo kay lii mbuyna, kolo kay yam ɦinira halaŋ, gii u ŋgusugi suu kutluɓ kutluɓma, gii hu liisi ma mini jivi ɦayna, ki hu li ma asi ŋgal mbul ma his jivina maŋ fuli masisinana lay.

¹⁴ An hin tak saɓakan ki egesiya. Mbassa asi cuki kaɗta halaŋ an hin ɓalakaɗ kiyo, col ha ŋgoo bagi hu fulla ndalira day, tuɗ tew ay ki hu Ribla, hu mbayawi. Asi hin wi ki ana anni Yawe.»