EZEKIYEL 5 - Boy Lonana

Lona hin gi suu Israelna daŋgayna

¹ Lona dan ana, «Goŋ sanna, tli ŋgew ma siim cocona. Aŋ mbuɗum ko vella wel yamba na. Aŋ kaa yaŋ kiyo, wel njeɓereŋ ki may. Ŋgoo dagan an tli va ma ŋga nekka ŋgaaɗ iriɗ ki nazeɗ zeɗ.

² Hu li ma buu maŋ ma ŋgaamma daɓ wa ni, aŋ ɓorowoɗ iriɗ duk hindi, keŋ ma hindina aŋ ŋgal tlimiɗ ndaɗta duk gayra huɦoŋzina. Aŋ yow keŋ ma hindi ma hin cuki mbana, kaasi ki uŋgewna ŋguy ki kay yam ɦoŋzina na cutl, u keŋ ma hindi ma hin koŋ daganna aŋ cukuɗ kolo duk semeɗna. Ŋgew namma an hin hoŋosina ni kasiya.

³ Aŋ hin yow tlimiɗ taa na ew ni njunuɗ fun baraw maŋŋa.

⁴ Aŋ hin vaa ta duk mayra aŋ cukuɗ duk kura ŋgalaɗ kiyo, kura hin mba kay njaf suu Israelna ni ko ndaɗta na may.

⁵ «Gola, Bu Suuna, Yawe, ɓakŋi na, An tin ɦoŋzi ma Yerusalemma ni duk ɦoŋzi ma daŋŋa na gay zi ma vi suunana ŋguyuɗ yaɗ ki na halaŋ.

⁶ Cemi ni Yerusalem hin ci wayra u dlara an daɗta. Li dla cora su njaf suu may suu ɦawana, ŋgelen gaɗ manda su mbassa daŋga ŋguy kaɗta. Asi hinin dlara an daɗta kiyo, tuɗ ka u gaɗ manda ɗegeeɗi.

⁷ «Kay ndaɗta Bu Suuna, Yawe, di ana, Kay hurugi ma co namma li dla cora su njaf suu ŋguyugina, agi min ka a tuɗ u gaɗ mandaɗi, lagi dlara an dagirara kaɗi lay, agi li ka ko suu ŋguyugi wanna lira na jimiɗi lay.

⁸ Kay ndaɗta Bu Suuna, Yawe, di ana, An hin mba duurugi ni u tanda. An hin lagi dlara ti huna egegi ni ii njaf suu daŋŋa na gok gok.

⁹ An lagi egegi ni dlara an laɗ ka dew tuɗira. An ka hin a li dla ndaɗta na oloɗi lay. An li ni kay dla coogira agi laɗta.

¹⁰ Hu ɦoŋzi magina ni somira hin kom goryosiya. Gorra hin kom somoyosi may. An hin lagi dlara ti huuna egegiya, ugira hinda an hin njayasi ha ki aragelay halaŋ halaŋ duk njaf suu daŋŋa.

¹¹ «Kay ndaɗta, an Bu Suuna Yawe, Lo ma iirina, agi mbuɗun ziinda teteɗta ki njenjera u fuli magisina u sun magira cora halaŋ. Kay ndaɗta an hin dik zina ki halaŋ. An ka wagi hahawagiɗi, ka gol sa irin hahawɗi lay.

¹² Keŋ suu magisina ma hindina hin daɓ ki miɗna ko tuguɗi mbogomma ɗowba mayra hin ndi kasiya. Keŋ ma hindi ma hin mba wanna, ŋgew ma duuna hin casi ki may. U suu hin hin ndena an njayasi ha ki duk njaf suu daŋŋa ni u ŋgewina kay ceeresi dagan hu may.

¹³ An hin tak yaanda kiyo, takasi hurun ma ɓeŋi egesina kiyo. Asi hin wi ki ana an gasi ni Yawe. An ɓak u hurun ma yara ta ta hin li dla ndaɗta ki may.

¹⁴ «An mbuɗugi ɦoŋziigina ki ni ko ŋgoo bagira na. Suu ŋguy kay ziigina halaŋ hin panagiya. Suu tuɗ voɗta lay hin san ugi ni na lay.

¹⁵ Suu ŋguyugina halaŋ mbuɗ ŋgul suuna ni u agiya. Agi mbuɗ ki ii suuna ni va ma zolo cocona. Dlaagira mbuɗ ni dlara ndaana kay gegelay. Hu li ma an kaagi ɓakŋa kagina u hurun ma ɓeŋ kina an waɗagi ni u njewɗek mayra cora. Di ni an Yawe.

¹⁶ «An hin lasagi u mayra a daɓagi kira. Mayra hin lagi ni su mburu mayra sana munugi u ndaɗta. An cagi ni u mayra, ɓalakagi tlegeyegi suu agi ŋgayasi a tirana kiyo.

¹⁷ An sunugi mayra u vabakgi suu cona ay kagiya. Asi cagi gor kem magisina kiyo. An cukugi suu duuna kagi lay. Di ni an, Yawe.»