EZEKIYEL 47 - Boy Lonana

Mbo ma ɓaɗ kal ay ki hu Ziŋ Lonara

¹ Sa namma tuɗun ha fun Ziŋ Lonara. An gol na ni mbona ɓaɗ ay ga u vun Ziŋ Lonara ii ma u maɗiinana na, kay biɗii zira mini ni ii u maɗiina na, mbona ɓaɗ ga bik njufna keŋ givin ma togolla ii dali na ɗow may.

² Nam kalan ay ki bunsu hu vun ma mbayawna na. Hin ŋguyun kay zira ta ta tuɗun ha ki eg vun ma ii ŋgoona keŋ ma u maɗiinana na. An gola ni mbona ɓaɗ ay ga ii bik njuf na.

³ Sana kal ay ki hu vun ma ii u maɗiina nana u va ma ŋga lina komu. Nam ŋga lina ii meter kis kis vadl. Nam calaɗan ha ki kay mbo namma, mbona van ii ko kot sen na ga.

⁴ Ŋgoo dagan nam hin ŋga lina meter kis kis vadl olo, hin calaɗan ha ki kay mbo namma, mbo namma van ki vun givinu. Nam hin ŋga li ma daŋŋa meter kis kis vadl olo, calaɗan ha ki kay mbo namma, mbo namma van ki ni u furunu.

⁵ Nam hin ŋga lina hu meter kis kis vadl olo. Namma ni mbo ŋgolna an ka ndak a calaɗam ki oloɗi, kay mbona tli ki cocoo. A calaɗ mbo nammara ni lus ni lusiya. Mbo namma sa ka ndak a calaɗambi.

⁶ Sa namma dan ana, «Aŋ wi ɗaŋ su goŋ sanna?» Nam tuɗun ay keŋ hiniŋŋa, hin hoŋon ay ki ii hiniŋŋa may.

⁷ Hu li ma nam hoŋon ay ki doŋ lumma ii hiŋŋa ni, an gola ni ŋgusugina hu li namma cocoo, keŋ hiŋŋa lay, hiŋŋa lay.

⁸ Nam dan ana, «Mbo namma ɓaɗ ni ii u maɗiina na, kal ha hu mbo lum ma Yurdanna, hin jak ha hu lumma Galakŋa na. Nam kal duk mbo namma wa ni, mbo namma hin mbuɗ ki jiviya.

⁹ Na ni tlesuu iiri suu poy kay ndaŋgara hin lak iiri duk mbo namma hu li ma nam ɓaɗ ha huna halaŋ. Kulufna hin zul duk mbo namma cocoo kay hu li ma mbo namma mba wa ni, lumma Galakŋa hin mbuɗ ki jiviya. Tlesuu iirina hin mbuɗ ki duk mbona halaŋ halaŋ.

¹⁰ Suu ciwna hin coli doŋ lumma cocoo, col ha En-Gedi day ta ta tuɗ tew En-Eglaimmi. Suu ciwna waa bay masina a soom tambira ni fun lumma hu mbas ndaɗta. Njaf kulufna hin zuli coco zeɗ zeɗ duk lum namma suu ay duk lumma Mediteranena.

¹¹ Na may ɦoora keŋ lumma Galakŋara ka mbuɗ jivi koɗɗi. Hiniɗ ndaɗta ni a ɗog vuvuna hura.

¹² Hu doŋ lumma keŋem jakŋi ŋgusugi suu tira wuli hu cocoo, baɗasi zeɗ zeɗ halaŋ. Humusi ka yak kiɗi. Asi vuɗ cocoo, vuɗusi ne ni hu tilna dew dew halaŋ. Kay ana mbo ma col ay hu Ziŋ Lonara ka si usi tew tew. Asi tasi vuɗusi may, lasi humusi ni a kumuna gaw may.»

Hakara vi suu Israelna u mbassa daŋga

¹³ Bu Suuna, Yawe, di ana, «Gola ni ii haka mayra agi hin a ɓorow mbas magira kogira duk tagi agi njaf suu doogo yam mbana. Na may Yosef hin fi ni sem mba' a sugiya.

¹⁴ Agi suu hiniŋŋa gegelay ni fi lina ni ko ndal wayamma fira na may. Kay an suu tan ki tli kon kolo ana an a ɦal mbas ndaɗta maŋ somoyogiya, mbas ndaɗta hin ka ni a joogina.

¹⁵ Gola ni ii haka mbas ndaɗta. Hu keŋ ma ii mbayawna col ha fun lumma Mediteranena hu voɗta Hetlonda a tuɗ hu Sedadta na.

¹⁶ Hamat, Berota, Sibraim, duk ɦoŋ mbassa Damassa u mbassa Hamatta na. Hasser, Tikon ta ka ii mbassa Hauranda.

¹⁷ Ii hakara col ha fun lumma Mediteranena tuɗ ta ta hu Hassar-Enon, mbassa Damassa ii ma mbayawna na u mbassa Hamatta, ni ii ma mbayawna.

¹⁸ Ii ma maɗiina nana ni agi ŋga duk ɦoŋ Hauran u Damas duk ɦoŋ Galaad u ndaŋgara vi suu Israelna, mbo lum ma Yurdanna ni a ii hakara ta ta tuɗ tew lumma Galakŋa ii u maɗiinana. Ni keŋ ma ay u maɗiinana li ni na.

¹⁹ Keŋ ma ii dalina col ha ii hakara u Tamar tuɗ hu galaŋga ta ta Meriba-Kades, tuɗ ha fun lum ma Egiptena hin jak ta ta fun lumma Mediteranena ni ii haka mayra dali nara.

²⁰ Ii u fiɗigina na ni lumma Mediteranena ni a ii hakara gaw. Col ha dali day ta ta Lebo-Hamat ki ii mbayaw na. Gola ni ii hakara u fiɗiginara.

²¹ «Agi ɓorow mbas ndaɗta dukugi agi njaf suu doogo yam mbana, suu Israelna.

²² Agi ɓorowoɗ ni u paɗ dewna, gegelay ni hin fi joomma. Magi lay, maŋ suu may suu poy kolona suu cuki dukugina lay. Ni suu may suu vuɗ goryosi ki ni dukugi layna. Asi hin ki ni a suu ki dukugi agi suu Israelna. Asi ndak a paɗ dewna ni ko agi na may, a fi joosinara duk suu Israelnara may.

²³ Dee suu may suu ŋgayagi asina ka cuki dukusina asi hin fi ii ɓorow masina ni dukusi may. Di ni Bu Suuna Yawe.»