EZEKIYEL 44 - Boy Lonana

Gaɗta kay vun ma kal kalafi hu Ziŋ Lonara

¹ Sa namma tuɗun ay ki fun vun Ziŋ Lonara bunsu ii u maɗiina na, vun namma ki dugiya.

² Yawe dan ana, «Vun namma hin dugira ni a faɗta, sa ka malam ki oloɗi. Sa ka kal hu vun nammaɗi kay an Yawe ma suu Israelna goɓomma kalni hu vun namma.

³ Na may mulna, kay nammi mulna, hin kak hu vun namma kay ti funa fokonda. Nam kal ay hu ni ii vun ma keŋ zira ŋgolla na. Nam hin hoŋ ki bunsu ni hu voɗ ndaɗta lay.»

Sa ma ndaki a kal hu Ziŋ Lonarana

⁴ Sa namma tuɗ kalan ha hu vun ma ii mbayaw nana, tuɗun ha ki ta ta eg biɗii Ziŋ Lonara. An wi ki ana bibiŋilla vi Yawera ay ki kalafi hu Ziŋ Yawera. An girif kaŋgaa, kuluɓ irin ki duk ndaŋgara.

⁵ Yawe dan ana, «Goŋ sanna, tin humuŋ ha jiviya. Gol u iriŋu, hum ki u humuŋ lay. Kay dlara an min a daŋga ki kay Ziŋ Yawera halaŋga u dlara hin a li huruɗta lay. Aŋ vi huruŋ jivi kay dlara an min a daŋga kay vun Ziŋ Yawena wanda u vun ma kal ki kiɗikŋa halaŋ lay.

⁶ «Aŋ tuɗ di suu Israelna suu yasi eŋŋa ana, Bu Suuna Yawe di ana agi suu Israelna sun magira agi laɗ u min magirara cemi ni ndak wa.

⁷ Agi cukugi koyogi suu ɗiwisi bay cawra kalafi hu Ziinda mbuɗungi Ziinda ki njenjera. Agi ɦangi tiinna, mbulna u busuna kiyo ana, galam manda u agira ɓalak kiyo. Ni u dla coogira agi laɗ zeɗ zeɗta.

⁸ Agi min ka a li u gaɗta an dagira kay tlegeyen suu teteɗnaraɗi lay. Agi hin cuk koyogina a asi li u gaɗ ndaɗta hu Ziŋ Lonara ni asi na ɗow.

⁹ Kay ndaɗta Bu Suuna, Yawe, di ana, koy ma ɗiwim bay caw lay, hurum bay caw layna ka kal hu ziinda oloɗi. Koy ma ka cuki ki dukugi agi suu Israelna lay ka kalɗi.

Gaɗta kay njaf suu vi Levina

¹⁰ «Kay suu vi Levi suu noyon kina, ɦal ŋgorsi ki manu u suu daŋ suu Israel lay, mbuɗ irisi a goɓ fuli magi suu ɦawana, suu asina halaŋ hin fi warak ma kay dlaasira co ndaɗta may.

¹¹ Asi ndak a li sunda ni hu Ziŋ Lonara gol vun Ziŋ Lonara may, li sunda kalafi hu Ziŋ Lonara may, juɓ u yoori suu asi mbaarasi ay a li ɓivunna, ŋgaɗ yoori suu li ɓivun ma kay suuna belna, u ɓivun ma zeɗ zeɗna. Asi mba lakŋi a sun suu may suu mbayna halaŋ.

¹² Asi ni suu gijaŋŋa a goɓ fuli magi suu ɦawana jew suu Israelna ni asiya. Kay ndaɗta asi cuk suuna halaŋ hu dlara cora ni asiya. Kay ndaɗta an Bu Suuna, Yawe, tli kon kolo suu tan ana asi hin fi ɓak ma cona kay dlaasi ndaɗta.

¹³ Asi ka ndak a ɦuɗ tasi ay egen tok a li sunda ko muli su li ɓivunnana oloɗi, ka tin tasi eg tlegeyen suu teteɗna oloɗi lay, eg tlesuu ki saɓaki teteɗnaɗi lay. Asi zii dla coosira asi laɗta, u suluk masi ma asi lamma ni asiya.

¹⁴ An hin ɦasi kosi ni sunda huu Ziŋ Lonara ɦawaa.

Gaɗta kay muli suu li ɓivunna

¹⁵ «Muli suu li ɓivunna suu hu njaf Levina, suu goryoŋ Sadokŋa ni suu may suu li sunda u gaɗta hu Ziŋ Lonara ɗegeena, hu li ma suu Israelna hinin an Bu Suuna ki lay, asi hol ni suu ndak a mbay a li sunda fokonna, ŋgal mbulna u busu ma ɓivunna may. Di ni Bu Suuna, Yawe.

¹⁶ Asi hol ni suu hin cuk kalafi hu ziinda, ɦuɗ tasi eg tabulla tiniɗ a li sun mandara may. Asi li u gaɗta an ɦasira kayamba jivi may.

¹⁷ A cuk ha kalafi hu vun zira goora ni asi cuk baraw dlemba egesiya. Asi ka ndak a cuk baraw ma cili u tlimiɗ timigiina egesi hu li ma asi ka li sunda ki taraŋ tunaɗi lay, hu Ziŋ Lonaraɗi lay.

¹⁸ Asi ndak a kuluɓ jumba kasiya, njun u furusi ki u tlakara may. Asi ka cuk baraw ma zamalla egesiɗi.

¹⁹ Hu li ma asi a cuk ay ki hu vunna kiɗikka ni asi fok baraw ma asi li sunda u namma ha kiyo. Cukum ha hu zira kurufu hu Ziŋ Lonara. Asi cuk baraw ma daŋŋa ay egesiya, ni asi ka paɗ vunusi kay suuna oloɗi.

²⁰ «Asi ka wel yasi kiɗi. Asi ka hin tlimiɗ yasi ɦawa naɗi, may cawaɗ ki jivi tew tew.

²¹ Mul ma li ɓivunna a kal hu Ziŋ Lonara kurufura ni nam ka ci sumbi.

²² Asi ka ɗum boyogi suu njufuyusi miɗ kinaɗi, ka ɗum boyogi suu joki hin njufuyusi kinaɗi lay. Asi ɗummi gorɓii suu bay buu u sa njuf tuna, ni gorɓii suu Israelna may. Asi ndak a ɗum caŋ ndarasi mul ma li ɓivunna ma miɗ kina kama.

²³ «Asi haɗan suu mansina kay tlesuu vi Lonna u suu ɦawana, haɗasi tlegesuu teteɗna u tlegesuu njenjena.

²⁴ Li ni dla ndi duk suu ta wa ni asi ni suu gi ii dlara, li ni ko gaɗ manda dira na. Asi golon gaɗ manda u neenda jiviya, saa kay buu ma luuna, gol buu ma vi Lonana jivi teteɗ may.

²⁵ «Asi ka kal vi sa ma miɗina a mbuɗ tasi ki njenjeɗi. Na may lini buŋ ɗowba, suŋ ɗowba, gooŋŋa ɗowba, gooŋga tama ɗowba, wayaŋ ɗowba, wayaŋga tama ɗowba, ma ka ki keŋ vi sa daŋgina ni mul ma li ɓivunna ndak a mbuɗ tam njenjera.

²⁶ Hu li ma nam li tam ki teteɗ wa ni asi ndum buuna kiɗisiya.

²⁷ Ŋgoo dagan nam kal hu zira goora vo hu Ziŋ Lonara, li ɓivun ma bulum coomba kina. Di ni Bu Suuna, Yawe.

²⁸ Jo ma suu Israelna ɦam maŋ muli suu li ɓivunnana ni sunda li ɓivunna maŋ Bu Suunara gaw. Asi ka fi va ma jo ma daŋ duk suu Israelnaɗi. Joosina ni an Bu Suuna u tanda gaw.

²⁹ Asi ni suu hin ti tlesuu ŋgaɗasi a li ɓivunnana, tlesuu li ɓivun ma bulum cora kina, ɓivun ma taɓ dukka, tlesuu mbaarasi ay a li ɓivunna vi suu Israelna halaŋŋi masiya.

³⁰ Yam tlesuu jivi suu asi ɦasi ay ki maŋ Lonana halaŋŋi masiya. Yam wa ma ne ki fok jewna, yam tlesuu daŋŋa halaŋ, suu agi yowosi ay ki duk tlegeyegina halaŋŋi maŋ muli suu li ɓivunna, yam fuɗ magira jivi ɦayra agi ɦaɗ ki maŋ muli suu li ɓivunna kay a paɗvun ma heɓpa li kay ziigiya.

³¹ Muli suu li ɓivunna ka kom va ma miɗɗina ni, kom ɦaa va ma vabak vam viiɗi lay, li ni lay ɗowba vabak lay asi kombi.