EZEKIYEL 41 - Boy Lonana

¹ Sana hin kalan ha ki kalafi hu zira ŋgolla hu Ziŋ Lonara. Nam ŋgaɗu. Gulumun ma keŋ li ma tuɗ ha kalafina bubuum meter hindi.

² Vun ma kal ha huu vona hayam ki meter vadl. Gu ma bali keŋ vunnana halaŋ bubuummi meter mba' u nus. Huu zira taɗta fiyekeɗ ni meter dok-mba', hayaɗ ni meter doogo may.

³ Nam kal ha kalafi duk na day. Nam ŋga vun ma ha kurufu dukŋa fiyekem meter dew, hayami meter hindi may. Gu ma caki funna halaŋ bubuummi meter hindi u nus.

⁴ Nam hin ŋga huu zira taɗta fiyekeɗ ni meter doogo, hayaɗ ni meter doogo lay. Nam hin dan ana ni Li ma ki Saɓaki Teteɗna.

Zira ŋgolla u tlesuu hu Ziŋ Lonarana

⁵ Sana ŋga goŋga vo kurufu hu Ziŋ Lonara. Bubu goŋga ni meter hindi. Zigini suu daŋŋa mini ŋguy ki kay Ziŋ Lonara na cutl, hayasi ni meter mba' mba' bel.

⁶ Zi ndaɗta ni zira mini kay ndaraɗta kolora. Iriɗ mini ha kolo na zeɗ zeɗ hindi. Huruɗ ma kaay vo hu kurufuna na zeɗ zeɗ dok-hindi, col ha u kaŋga ta ta tuɗ hu zira kayam kolora u ndaɗta. Bubu gulumun ma kay Ziŋ Lonara dagaa ki dagan may, ni kay ana ka duk ɦoŋ zira dlaɓ ko tasi hu Ziŋ Lonaraɗi, col ki ni kay taɗu.

⁷ Voɗta duk ɦoŋ Ziŋ Lonara u zira ja ki kolo kay taɗ hindira ki ŋguy minda u gulumunna gijaŋŋa ha hu zira u gara, jak ha hu zira dukka tuɗ faɗ ha ki hu zira do ha kayam kolora.

⁸ An wi ana ŋguy ki kay Ziŋ Lonara na halaŋŋi, zira mini keŋeɗta halaŋ fiyekeɗ tuɗ kolo ni meter hindi.

⁹ Zi ndaɗta ii goŋga ha ki ii ŋgoo nara bubuuɗ ni meter mba u nus. Voɗta tuɗta hini ki duk ɦoŋosi u Ziŋ Lonara may.

¹⁰ Huu zigini suu hiniŋŋa halaŋŋi meter doogo doogo ki ŋguy kay Ziŋ Lonara halaŋ.

¹¹ Zigini suu mini asina vunusi cooy ii li ma suna jak tuɗta huna ni mba' mba', vun dew ii mbayaw may, dew ii ma dalina may. Bubu gulumun ma ay ki caki ii voɗ ndaɗta halaŋŋi meter mba' u nus ay ki ŋguy kayam halaŋ.

¹² Zira ŋgolla ka mini ii u fiɗigina na fiyekeɗ ni meter dok-fiɗi yam vadl, hayaɗ ni meter dok-hindi yam vadl may. Goŋoɗ ma mini u gana bubuuɗ ni meter mba' u nus.

¹³ Sa namma hin ŋga Ziŋ Lonara, fiyekeɗ ni meter dok-vadl, fiyek li ma hin ki ɦawana u u zi mayra mini u fiɗigina nara u gulumun ma ŋguy kasina lay li ni meter dok-vadl may.

¹⁴ Hu li ma fun Ziŋ Lonara ii u maɗiina nana, u voɗta hiniɗ ki keŋga hayam li ni meter dok-vadl may.

¹⁵ Sana hin ŋga fiyek zira ŋgolla ay mini ŋgoo Ziŋ Lonara daganda u voɗta jak keŋga halaŋ asi li ni meter dok-vadl. Vun goŋga kal kalafira, huu zira ŋgolla u huu zi mayra ha ki ŋgay u dokonara.

Huu Ziŋ Lonara ii kurufura

¹⁶ Gu ma fun zirana u ma ii zirana halaŋ tam ki guluɗi jiviya. Voɗta ɗiŋ kolora ki mini jivi kay zigini suu kolo kay tasi hindina halaŋ. Tle asina halaŋ mini ni u guna col ha kaŋga day ta ta tew ha ki kolo eg ii zira. Ii zira lay ki dugi u gu ma ceɗina.

¹⁷ Col ha pay goŋga hu Ziŋ Lonara tuɗ ha kurufuna ha hu vun ma kalla ta ta tew zi mayra ha ki ŋgay doko dayra ni, asi ndal pay goŋga ki ni ndaliya.

¹⁸ Ndalaɗ ki u foto suu Serubimgina u hum manawra. Hum manawra kolo kay foto Serubimgina. Serubim dew mi fokommi mba mba.

¹⁹ Vogom ma dewna ka vok sa warna na pereɗi eg manawna, vogom ma hiniŋŋa ko vok dlona na pereɗi eg manaw ma hiŋŋa may. Foto namma ŋguf ki pay Ziŋ Lonara na cutl.

²⁰ Foto Serubimgina u foto manawra ŋguf ki pay Ziŋ Lonara na cutl, col ha u ga day ta ta ɦeɓ ha ki kolo kay vun ma kalla.

²¹ Vun zi mayra ŋgolla hayam lay fiyekem lay ŋgaay ni fun tam dew. Ha fun Li ma ki Saɓaki Teteɗna na ni aŋ wi vana ko ndal,

²² givin ma togolla ma mini u gunana na, fiyekem meter dew u nus, hayammi meter dew may. Guna ki caki keŋemu, keŋem halaŋ ki u guna. Nam dan ana, tabul ndaɗta tiniɗ ni fok Yawe.

²³ Huu zi mayra ŋgolla vunuɗ taɓi huu tammi mba', vun Li ma ki Saɓaki Teteɗna ni na lay.

²⁴ Vun namma u dlamba jakka ni liim ma malam kina kaa, mal keŋ gulu may, keŋ njuf may.

²⁵ Asi li foto Serubim u foto manawna ki eg cokoromma, ko ndal foto ma asi ndalam ki pay goŋgana na may. Ki ii ma bunsuna ni gu ma ceɗina ki ɓali huwa.

²⁶ Kolo kay vun zira ni ii zira kaa, mini u foto manawna huwa eg goŋga lay ni foto namma ka huwa.