EZEKIYEL 40 - Boy Lonana

Ziŋ Lonara wilira

¹ Hu basara dok-mba' yam vadla ŋgoo yow mamira ha ki hu mbassa daŋga, hu gijaŋŋa vi basa ndaɗta, buuna doogo hu til namma, basara doogo yam fiɗi dagan ɓalak mayra ɦoŋzina ɓalak kira, hu buu nammana gawna, Yawe mbay kanu, tuɗun ha ki hu li namma.

² Hu wiin ndaɗta ni nam tuɗun ha ki ni hu mbassa vi suu Israelna. Nam colon ki kolo kay ɦinira fiyekka hu li namma keŋ ma dalina na ni zina ka mini hu ko ndal ɦoŋzi ma ŋgolna na.

³ Nam tuɗun ha huwa, an gola ni sana coli huwa tam ko ndal kawi ma tlawna na. Nam coli u zew baraw dlemba dereŋga komu, tokolora ŋgara kawi kom may. Nam col ki vun grekŋa.

⁴ Sa namma dan ana, Goŋ sanna, gol ki u ii taŋga, hum ki u hum taŋga may. Tin saaraŋ kay tlesuu an min a takaŋsina wanna, mbaaraŋ ay ki tani ni kay a takaŋ tle asinara. Aŋ hin tuɗ di suu Israelna ki kay tlesuu aŋ wasi asina halaŋ halaŋ.

Huu taraŋga u vun grekŋa

⁵ Gola ni gulumun ma gi kay Ziŋ Lonarana, ko sana kawi ni tokolo mayra ŋgara fiyekeɗ meter hindi. Nam ŋga hay gulumunna u wulumba kolora. Hayammi meter hindi, fiyekem kolo ni meter hindi lay.

⁶ Nam mbay hu vun grek ma ii u maɗiina nana, nam ɗiŋ ha koloo, ŋga u vunna ta veki kaŋgara ni ndaɗ li ni meter hindi.

⁷ Hu vun ma kal ha vo hi zira vi suu juɓ u lina ni fiyekem meter hindi, hayammi meter hindi lay. Gulumun ma ki caki dukŋa bubuummi meter mba u nus, li ma a tuɗ ha vo kurufu hu Ziŋ Lonara duk ɦoŋga ki ni ii meter hindi.

⁸ Nam ŋga huu zira hu voɗta tuɗ ha kurufura ni ndaɗ ni meter hindi.

⁹ Garak ma coli duk zira na ni meter fiɗi, ii ma ki ɓal ŋgoona u mbal ma vam kolona hu may.

¹⁰ Vun ma ii u maɗiina nana ni fun tam dew meter hindi hindi, vun namma jakŋi ŋgaay fun tam dew. Mbal ma coli duk keŋemma halaŋŋi fun tam dew.

¹¹ Nam ŋga fiyek li ma vunna a hin mal ay ki huna ni, hayam li ii meter vadl. Hayam mayra suuna a jak hura li halaŋŋi meter karkiya u nus.

¹² Vun li may ma asi juɓ u lina huna hayam ŋgaay fun tam na dew, fiyekem meter hindi, hayammi meter hindi lay. Irim vo ni ki kaay zeɗ zeɗ dukum ki caki ii nus meterra vo kurufuwa.

¹³ Sana ŋga duk ɦoŋ gulumunna u Ziŋ Lonara hu kurufura, duk hoŋosi ki ni meter doogo yam mba' u nus.

¹⁴ Nam hin ŋga hay zira ni ndaɗ li ni meter doogo. Huu taraŋga kay Ziŋ Lonara ki ŋguy u gu nduŋga halaŋ may.

¹⁵ Col ha hu vun grek ma kal ha vo kurufuna ii ŋgoo na, ta ta tuɗ tew eg luɓu goŋga ha ki ii ma hiniŋŋa ni li meter dok-mba' yam vadl.

¹⁶ Ii zira cooyra ki u kawi ma bay bayna cili huwa, ii zira col ha ni eg gulumun ma ha ii ŋgoona, hin co ii gulumun ma ki caki kurufuna, hin tuɗ co ii goŋga taɗta ni na lay. Ndaɗ tuɗ ha hu kurufu, ta ta mba waɗ ki hu vun goŋga lay. Pay goŋga ma hu vo kurufuna ndalam ki ko ndal hum manawra na.

Li ma fun zira ŋgollana

¹⁷ Sa namma tuɗun ay ki huu taraŋga hu Ziŋ Lonara, huu taraŋga ki mbuya, goŋŋina ki ŋguyra kaɗ na dok-hindi.

¹⁸ Li ma ay mbuy fun vun ma zeɗ zeɗ kurufuna halaŋŋi ma ha ki ii ŋgoona mbuy ŋgolo suumu.

¹⁹ Sana ŋga huu taraŋga col ha fun vun ma jewna na tuɗ tew eg goŋga ha vo kurufura na ni li meter dok-vadl. Nam ŋga keŋ ma u maɗiinana u keŋ ma mbayawna may.

Vun ma ii mbayawna

²⁰ Nam ŋga fiyek vunna u hayam halaŋ, col ay mbayaw na a mba ki fun vun ma kiɗikŋa na.

²¹ Vunna hu li namma halaŋŋi karkiya, vun keŋ hiŋŋa hindi may, keŋ ma hiŋŋa hindi may. Goŋga u huruɗ ma kurufuna ni fun tasi dew u vun goŋga u maɗiinara may. Vunna halaŋ fiyekemmi meter dok-mba' yam vadl, hayammi meter doogo yam mba' u nus may.

²² Huu zira, ii zira, u manawra ndali pay goŋgara halaŋŋi fun tasi dew u huu zira ha hu vun ma hiŋŋara, a ɗiŋ ha kolo hu zira ni aŋ ŋga seŋ tuɗta yaŋ kiɗisiya.

²³ Ay hu vun ma kurufu hu kaanana ii mbayaw na vun ma tuɗ ha kurufu huu taraŋgana kaa, ni ko ndal vun ma ay ii u maɗiinana na may. Sa namma hin ŋgaasi duk ɦoŋosi ndaɗta ni ndaɗ li ni meter dok-vadl.

Vun ma ii dalina

²⁴ Ŋgoo dagan sa namma tuɗun ki hu ii ma dalina na. An gola ni vun grekŋa ka huwa ii dali na gay. Nam ŋgaam vunumu, fiyekemu u guumu, halaŋŋi fun tasi u vun ma daŋŋa dew dew.

²⁵ Vunna halaŋ ka u ii zira keŋemu ni ko ndal ii zira ay ki hu lii daŋŋa fok jew wandara na may. Fiyek vun zira li halaŋŋi meter dok-mba' yam vadl. Hayaɗ ni meter doogo yam mba' u nus may.

²⁶ A ɗiŋ ha kolo hu zira ni aŋ ŋga seŋ tuɗta yaŋ kiɗisiya. Ŋgoo goŋga ma ka ii kurufuna ki ndali u manawna keŋ li ma suuna tuɗ huna ko ay hu zigini suu hiniŋara na may.

²⁷ Ay hu vun ma kurufu hu kaana na ni voɗta tuɗ ha hu taraŋga nara kaa. Sana ŋga fiyek li ma ka duk ɦoŋ ndaɗtana ii dali na ni nammi meter dok-vadl.

Taraŋga u vun goŋga

²⁸ Nam kalan ha vo kurufu hu vun grek ma dalina na, nam ŋga vun namma, nammi ko ndaryam suu hiniŋa na may.

²⁹ Vun goŋga u gu ma keŋeɗna u gu ma coli dukŋa halaŋŋi fun tasi dew u suu hiniŋŋa may. Vuna halaŋ ka u ii zira kaay keŋem bel bel.

³⁰ Fiyekem halaŋŋi meter dok-mba' yam vadl, hayammi meter doogo yam mba' u nus may.

³¹ Zira ŋgolla ka mini keŋ li namma huu goŋga vo kurufura ki ndali u foto manawna. A ɗiŋ ha kolo hu zi ndaɗta ni aŋ ŋga seŋ tuɗta ni kalavandi.

Vun ma ii u maɗiina nana

³² Nam tuɗun ha hu vun ma ii u maɗiina nana kurufu huu kaana. Nam ŋga vunna ni nam fun tammi dew u vun ma ay ki jewna na may.

³³ Vun zi ma kal ha vona, gulumun ma ki caki dukŋa u huu zira lay ŋgaasi ni fun tasi dew ko vun ma daŋŋa zeɗ zeɗ wanna na may. Keŋ vunna u huu zira ni i zira ka cooy hu may. Fiyek vunna taɓ halaŋŋi meter dok-mba' yam vadl. Hayam taɓ halaŋŋi meter doogo yam mba' u nus may.

³⁴ Huu zira ka ni keŋ li ma ay ki ii kiɗikŋa, huruɗ ma kurufuna ki ndali u foto manawna, keŋ li ma suuna jak tuɗta huna jak. A ɗiŋ ha kolo hu zi ndaɗta ni aŋ ŋga seŋ tuɗta kalavandi.

Vun ma ii mbayawna hu keŋ ma goona

³⁵ Nam tuɗun ha ki hu vun ma ii mbayaw nana. Nam ŋga vunna ni fun tam dew u ma ay ki fok jewna.

³⁶ Vun zira u mbal ma dukŋa, keŋeɗ halaŋ u ii zira cooyra lay, fiyekeɗ ni meter dok-mba' yam vadl, hayaɗ ni meter doogo yam mba' u nus may.

³⁷ Huu zira ka ni keŋ li ma ay ki ii kiɗikŋa na, huruɗ ma kurufuna ki ndalira u foto manawna. A ɗiŋ ha kolo hu zi ndaɗta ni aŋ ŋga seŋ tuɗta kalavandi.

Zira daŋga ka mini eg vun ma ii mbayaw nana

³⁸ Zira hiniŋga ka mini eg vun ma ii mbayawna na. Asi mbus ta yoori suu ŋgaɗasi a li ɓivun ma ŋgalam kina ni hu zi ndaɗta.

³⁹ Hu zira ŋgol ndaɗta tabulla ka kalafi hu fiɗi, mba' keŋ hiŋŋa may, mba' keŋ ma hiniŋŋa may. Kay tabuli asina asi ŋgaɗ yoori suu li ɓivun ma ŋgalam ki ŋgalina u ɓivun ma bulum cora kina ni kasiya.

⁴⁰ Ki bunsu fun zira ŋgol ndaɗta ni tabulla ka hu fiɗi olo, mba' keŋ vun ma mbayawna may, mba' ii ma hiŋŋa may.

⁴¹ Tabulina kalafi ni fiɗi, ki bunsu ni fiɗi may. Tabuli suu asi ŋgaɗ tlena kasina halaŋŋi kalavandi.

⁴² Tabulla daŋga fiɗi olo ceɗ ni ɦinira ni a li ɓivun ma ŋgalam ki ŋgalina. Fiyekeɗ ni meterra hin fok ew, hayaɗ ni nus meterra may. Tabul ndaɗta asi cuk tlesuu sunda asi a ŋgaɗ tlesuu li ɓivunna ni kaɗu.

⁴³ Vun tabulla ki gi ŋgoŋ ŋgoŋŋa ndalira u tlena na cutl. Tabul ndaɗta asi cuk tliw ma ŋgaɗam a li ɓivunna ni kaɗu.

⁴⁴ Hu vun ma mbayaw nana ni zira ka mini keŋ kurufu huwa ii ma dalina na, ta hiŋga ay mini ii ma dalina na vunuɗ ay ii mbayaw na may.

⁴⁵ Sa namma dan ana, zi mayra vunuɗ ii dali nara ni maŋ muli suu li ɓivunna, suu mba li sunda hu Ziŋ Lonarana.

⁴⁶ Zi mayra vunuɗ ii mbayaw nara ni maŋ muli suu li ɓivunna suu ka li sunda hu givin ma togollana may. Nam hin di hu ana duk njaf suu vi Levina halaŋŋi, goryoŋ Sadokŋa hin cuk kalafi hu Ziŋ Lonara a sununda ni asi doy hol.

Huu Ziŋ Lonara kurufura

⁴⁷ Sa namma ŋga fiyek Ziŋ Lonara ii hu kurufuna, nammi fun tam dew. Fiyekemmi meter dok-vadl, hayammi meter dok-vadl lay. Givin ma togolla mini ni fun Ziŋ Lonara na gay.

⁴⁸ Nam tuɗun ha fun Ziŋ Lonara gu ma kali hu vunnana jak fiyekemmi meter mba' u nus, bubuum u li ma kal ha vona ni meter kiɗisiya. Vunumba kolora ni meter dew u nus.

⁴⁹ Vun ma kal kalafina fiyekemmi meter doogo, hayammi meter karkiya may. A ɗiŋ ha kolo hura ni aŋ ŋga seŋ tuɗta doogo. Guna ki ɦadali keŋ ii hiŋŋa may, hiŋŋa may.