EZEKIYEL 4 - Boy Lonana

Ɓak ma kaam kay zi ma Yerusalemma

¹ «Hum haa, goŋ sanna. Tli birikka na dew gaɗ ga fokoŋu. Tli foto ɦoŋzi ma Yerusalemma kolo kaɗu.

² Tin foto suu baarasi a duunana vun kaana may. Li gulumunna a bow ki gara may. Min zira fiyekka vun grekŋa ta juɓ u ɦoŋzi ma Yerusalemmara may. Ŋguy zi mbutluɓ ma vi suu duunana ki kay zina na cutl. Cuk tlesuu to gulumunna kina ga na ca ca may.

³ Tli kawi ma beɗina cakam ki duk ɦoŋogi u ɦoŋzi ma Yerusalemma. Ŋgaras iriŋ ha golla kay ɦoŋzi namma na ŋgaras. Nammi zi ma yam ki ŋguy u suu duunana. Aŋŋi sa ma ŋguy yam zi namma na gaw. Ni dla mayra ne yam suu Israelna kira.

⁴ «Aŋ buu ni kay bikiŋ ma guluna a tli dla cora vi suu Israelna kira. Hu li ma aŋ ka buuri nana ni dla cora vi suu Israelna halaŋ tok ay ki kaŋu. Aŋ ka zii ni nekka vi suu hu Israelna.

⁵ An ŋgaaŋ buuna ha kay basara vi suu Israelna hu li ma asi ka li dla corana. Ko ndaɗta na hu buuna 390, ni aŋ ka zii nek cora suu Israelna laɗta.

⁶ Aŋ daɓ buu namma kiyo, ŋgoo dagani, aŋ hin buu kay bikiŋ ma njufna kay cora vi suu hu Yudana a yaŋga mbara olo, li buuna dok-fiɗi, buuna dew ni kay basara dew may.

⁷ Aŋ ŋgaras iriŋ ha ni kay zi ma Yerusalemma na ŋgaras a suu duu suu ŋguyusina u koŋ koori kaŋ koloo, aŋ hin dasi dlara kasiya.

⁸ Gola an njunuŋ u zewna. Aŋ ka ndak a pereɗ iriŋ ii hiŋŋa naɗi lay ta ta daɓ buu maŋ ma yoo namma ki tuwa.

⁹ «Yow wa blena u wa ma daŋŋa zeɗ zeɗ u liɗta zeɗ zeɗ, cukusi kolo uŋ hu doyna. Aŋ hin a yi funa funuŋ hu buu nammara. Ni tiiŋ ma hu buu ma 390.

¹⁰ Tiiŋ ma aŋ tamma hu buu na dew ni aŋ ti ni nus kelewna. Aŋ ti ni na tew tew daɓ buu ma ŋgaam namma.

¹¹ Yona ni hu buuna dew ni aŋ ci yona litir dew dew may, tew ki hu buu ma ŋgaam namma.

¹² Aŋ li tiiŋ ma aŋ tamma ni ko ndal komnjoɗina na. Aŋ zalammi kay kura ŋgalaɗ ni u soɗ suu warnara. Li dla ndaɗta ni irisi na halaŋ.»

¹³ Yawe di ana, «Ko ndaɗta na may suu Israelna hin tuɗ ti ti ma njenjena ha ki duk njaf suu daŋŋa suu an hin njayasi ha ki dukusina.»

¹⁴ An hoŋ dira ana, «Ҥii, Bu Suuna, Yawe, an fuɗ dlara njenjera ki na halaŋ halaŋ. An kom va ma miɗi ka ɦoyɗi, kom va ma vabak vam vii ka ɦoyɗi lay, ay u goo tan day ta ta cemi, tliw ma njenje kal ka funun tuɗi.»

¹⁵ Nam hoŋon dira ana, «Jiviya cemi an ɦaŋ soɗ mbutlina aŋ zal u asiya, hin soɗ suu warna kiyo.»

¹⁶ Nam dan ana, «Goŋ sanna, an hin daɓ fu ma hu Yerusalemma kiyo. Suuna hin fi tiisi ma ewna ni u ndaana, fi yo ma cira ma ewna ni u ndaana lay.

¹⁷ Asi hin ka fi fu ma tira oloɗi, ka fi yo ma ciraɗi lay. Suuna hin yoo tasi cocoo. Asi hin cim ki ko dla coosira asi laɗta.»