EZEKIYEL 34 - Boy Lonana

Dlara jok vun Lona kay suu taa yoorina suu Israelna

¹ Boy Yawena mbay egen dan ana,

² «Goŋ sanna di dlara jok vun Lona kay suu ŋgolo suu Israel suu taa yoorina. Bu Suuna, Yawe, di ana, hahawra kay suu Israel suu taa yoorina, asi suu taa tasira ɗowna. A jivira ni suuna taa ginni yoorina na ɗowɗi su?

³ Agi kom mbulna. Agi baa tagi u barawna cili u tlimiɗ timigiina may. Lagi ɓivunna ni u yoori suu ɗoorina, na may u yoori suu hin halaŋŋa agi ka min a taarasiɗi lay.

⁴ Agi gol yoori suu duk maŋina kaɗi. Suu tasi tasina agi lasi kumu kaɗi. Suu dagina agi njunusi mbilisi kaɗi. Agi koɗ yam suu ki njay dew dewna ka eg tasiɗi, hal mayra viɗ kira kaɗi lay. Agi ti kay yoorina ni u saɓakŋa.

⁵ Yoorina njay ki dew dew ni ko coogira. Asi hin ki ni a ti ma vi vabakgi suu ŋgoo bagina. Asi njay ki na dew dew.

⁶ Yoori mansina njay ha ki kolo kay ɦinira na dew dew, ha ki kolo kay lii mbuyna aragelay, yoori mansina njay ha ki hu mbassa daŋga na zeɗ zeɗ. Sa ma tuɗ a halasi ay kaɗi lay. Sa ma ɦal tam a halasi kaɗi.

⁷ Kay ndaɗta agi suu taa yoorina humugi boy ma vi Yawena haa.

⁸ Bu Suuna Yawe di ana, an suu tan u iiri manda ana, ni kayra yoori mansina suuna ɦurumusi kira, yoori mansina mbuɗ ki ni a ti ma vi vabakgi suu ŋgoo bagina, ni kay sa ma taarasi kaɗira. Suu man suu taa yoorina ka caa yasi kay yoori mansinaɗi. Suu taa yoorina gol ni hayasi doy hol, ka min a golon yoori mansinaɗi.

⁹ Kay ndaɗta agi suu taa yoorina humugi boy ma vi Yawena haa.

¹⁰ Bu Suuna, Yawe, di ana, an hin mbay kay suu taa yoorina asina. An hin mba hal yoori mansina, hin ɓaɗasi sina ki hu duk kosiya. An hin doorosi ki kay sun masira taa yoorina. Asi ka ndak a taa tasira hol holla oloɗi. An hin ɓaɗasi yoori mansina ay ki funusiya. Asi ka hin fasi a komba oloɗi.

Sa ma taa yoorina jivina

¹¹ «Kay ndaɗta Bu Suuna, Yawe, di ana, an hin mba hal yoori mansina, golosi ni u tanda.

¹² Ko ndal sa ma taa yoorina gol yoori mamsina jivi hu li ma asi njay kina na hu li ma nam coli dukusina, an may ni hin gol yoori mansina, tokosi ay ki hu li ma asi ay ki njay huna duk li ma kuɗna gi lina ndufun cocona.

¹³ An hin koɗosi ay ki duk suuna, suu ay ki hu mbassa daŋga zeɗ zeɗna an hin tokosi yasi ay ki halaŋ halaŋ, hin mbaarasi ay ki kay ndaŋga masira. An hin taarasi kolo kay ɦinira vi suu Israelna kaŋga hu ɦuɗugumba lay, hu li ma cuk zina lay.

¹⁴ An hin taarasi kay haɗ ma jivi cocona, liisi ma lakka hin li ni kay ɦini mayra kolo day hu mbassa vi suu Israelna. Hu li namma asi hin buu ni hu li ma jivina, taa hu li ma haɗ ma vi mbulna cocona, kay ɦinira vi suu Israelna.

¹⁵ An u tanda hin taa yoori mansina ni an lay, hin mba buurusi ga ni an lay. Di ni Bu Suuna, Yawe.

¹⁶ Yoo ma viɗ kina an hin halam aya, ma tuɗ ki dayna an hin koɗom irim ay may. Ma gayam ki kusina an hin jakamu, ma tuguɗiira an hin ɦam saɓakŋa. Na may yoori suu ɗoori cocona u suu saɓak cocona, an hin baasi kiyo. An hin taa yoori mansina ni u ɗegeera gasira.

Lona mba njun kay suu mamsina

¹⁷ «Bu Suuna Yawe di ana, lini kagi agi yoori mansina ni, an hin kaɓakŋa duk ɦoŋ yoorina u yoorina. Duk ɦoŋ gamlagina u ŋgekgina.

¹⁸ Agi ti hu li ma haɗ ma jivina na ni ndakagi kaɗi su? Ma hin bay ti tuna agi hin tayam ki ga u segi ni kay mege? Agi ci mbo ma ɗilina na ni ka jiviɗi su? Mbo ma hin bay sa cam tuna agi hin doɓom irim ki u segi ni kay mege?

¹⁹ Yoori mansina ti ni haɗ ma agi tayam ki ga u segina, ci ni mbo ma agi doɓom irim ki u segina may.

²⁰ Kay ndaɗta Bu Suuna, Yawe, di ana, an hin mba ka ii ɓakŋa ki duk ɦoŋ timiira ɗoorira u timiira iɗira.

²¹ Kay ana agi suu ɗoorina ka daɓ suu iɗina. Agi dakasi u mekegiya ta ta dikisi ha ki kay haɗna.

²² An hin mba njun kay timigii mansina. Agi ka hin fasi a ɦurumusi kira oloɗi. An hin ka ii ɓakŋa duk ɦoŋ timigiina u timigiina may.

²³ An hin tin sa ma a taaran yoori mansinana ni na dew daŋ. Nam hin taarasiya, hin li ni saan ma sunda David. Nam hin taarasi ni namu. Nam hin li ni a sa ma taa yoorina.

²⁴ An, Yawe, hinni a Loosina. Saan ma sunda David hinni a mul masina may. Di boy namma ni an Yawe daŋ may.

²⁵ An hin vi galamba heɓpa u yoori mansina. An hin ci vabakgi suu co suu ka hu mbas ndaɗtana kiyo. Asi hin lakŋi u heɓpa ŋgoo bagi hu fulla, hin buu sen masina jivi duk gura may.

²⁶ Hu mbas ndaɗta u ɦini mayra ŋguy kay mbas ndaɗtara halaŋ, an hin paɗ vunun ki kay li namma. An hin si mbo lona u voɗom lay, hin li ni mbo lo ma vunna ki paɗi kamma.

²⁷ Ŋgusugi suu hu senenana hin vuɗ jivi lay. Ndaŋgara hin jiv tlena coco lay. Suu mansina hin lak hu mbas masira ni u heɓpa. Hu li ma an kususi jugŋa ki kelesina, asi hin wi ki ana anni Yawe. Ni hu li ma an ɓaɗasi ay ki hu duk ko suu may suu lasasina.

²⁸ Njaf suu daŋŋa ka ndak a ɦurumusi tlegeyesi ki oloɗi. Vabakgi suu kay mbas ndaɗta ka vasi oloɗi lay. Asi hin lakŋi u heɓpa. Sa ma dlakasi ŋgususi ki ka oloɗi.

²⁹ An hin jivisi tlena hu sene masina cocoo, mayra ka a casi a viɗisi ki ɦoŋzina oloɗi lay. Njaf suu daŋ suu mba a lasi dlara zolo egesi ka oloɗi.

³⁰ Asi hin wi ki ana anni Yawe, Loosina. An ka u asiya. Asi ni suu mansina suu Israelna. Di ni Bu Suuna Yawe.

³¹ «Agi ni yoori mansina. Yoori suu ka taa hu sene mannana. Agi ni suu warna. Anni Loogina may. Di ni Bu Suuna Yawe.»