EZEKIYEL 32 - Boy Lonana

Yoora kay mulna Faraw u mbas mamba Egiptera

¹ Hu basara doogo yam mbara, hu til ma doogo yam mbana, hu buu ma jewna ni Boy Yawena mbay egen dan ana,

² «Goŋ sanna, gi soolla yoora kay Faraw mul ma Egiptena ki ana, Aŋ tok yam njaf suuna ay maŋ gor dlona, aŋŋi ko ndal dragoŋ ma duk mbo lum ŋgolnana na. Aŋ mun mbo lum maŋŋa ay kiyo, Aŋ doɓ ii mbona ki u seŋ wa. Aŋ mbuɗ mbona ki zozoɗta.

³ Bu Suuna, Yawe, di ana, An hin gun bay manna ki fokoŋŋi hu li ma suuna ka tok ki cocona. Asi hin taɗaŋ ay ki u bay manna.

⁴ An hin gikiŋ ay ki doŋo. An hin gaŋ ha ki bagi hu senena. Layagi suu pii kolona hin mol kay ɦaaraŋu. Yoori suu kay ndaŋgarana halaŋ hin hoɓ ki u aŋu.

⁵ An hin cukuŋ tliwiŋ ki kolo kay ɦinira, ɦuɗugumba hin oy ki u sokoŋu.

⁶ An hin laɓ yam ndaŋgara aŋ gi hura ni u busuɗuŋ ma cuɗ kina, ay kolo kay ɦinira nam cuɗ ay mba oy ɦuɗugumba kiyo.

⁷ Hu li ma musukuŋ daɓ wa ni an hin kuluɓ huulona ndufunda, ciciwra mbuɗ ki ndufunda, an hin kuluɓ ɗugulla ki ii faɗta, tilna ka li kiɗik mamba oloɗi lay.

⁸ Tlesuu ɓo kiɗikka ay kolo huulona halaŋ an mbuɗusi ki ndufunda kay boy maŋŋa. An hin gi ndufunda ŋgolla hu mbas maŋga. Di ni Bu Suuna, Yawe.

⁹ «Suu daŋŋa hurusi hin mbuɗ ki ndaana cocoo, hu li ma an tuɗ dasi dla puk maŋga kaŋgara. Ni hu li ma an tuɗ ɓaaraŋ dlaŋ ha ki hu mbassa aŋ waɗ ka dewɗi layra.

¹⁰ Dlara an laŋga egeŋ wanda hin ɓik vun dik suu daŋŋa bolow cocoo. Hu li ma an tli ŋgew manna kolona, mulina halaŋ dlak ndaana. Hu buu ma aŋ puk gana ni asi hin mbuɗ ki ndaa coco kay iiri masira may.

¹¹ «Kay Bu Suuna, Yawe, di ana, Ŋgew ma vi mul ma Babilonna hin kal huruŋu.

¹² An hin cukuŋ suu maŋsina kaŋga coco fok suu duuna. Asi vaa tasi ay ni suu dlasi cona sak sak, asi to tlegesuu a li saɓakŋa hu mbassa Egiptera ki halaŋ halaŋ. Suu bolow coco suu hu Egiptena hin daɓ kiyo.

¹³ An hin baasi yoori masi suu kosi suu ka cuki doŋ lummana kiyo. Sem sa war lay, yoo lay ka tuɗ fun mbo lumma a ɓalakam oloɗi lay.

¹⁴ An hin daɓ lum ma Egiptena kiyo, lumma ɓaɗ ko ndal mbulna ɓaɗta na. Di ni Bu Suuna, Yawe.

¹⁵ «Hu li ma an mbuɗ mbassa Egiptera ki ŋgoo bagira, hu li ma an ci tlesuu hu mbas ndaɗta ki halaŋŋa, ni suuna hin wi ki ana anni Yawe.»

¹⁶ Ni soolla yoora, suuna hin gaɗu, ko boyogi suu vi njaf suunana halaŋ gi sool ndaɗta a yoo kay mbassa Egiptera u suu maɗ suu zuli cocona. Di ni Bu Suuna Yawe.

Lina vi suu miɗina

¹⁷ Hu basara doogo yam mbara, hu til ma doogo yam mbana, hu buuna doogo yam vadl ni Boy Yawena mbay egen dan ana,

¹⁸ «Goŋ sanna, yoo taŋ kay suu zuli coco suu Egiptena, cukusi ni ga hu zul ŋgolla. Asi u njaf suu daŋŋa lay halaŋ. Sesi tii vasi duk suuna coco lay ni. Asi cukŋi hu zul ŋgolla uɗ ka doɗira u suu ha ki cuki fokosi hu jewna.

¹⁹ Joɓosiya, na ni agi ndak a fi jivira su ndaryagi suu daŋŋa halaŋ su? Cukugi ga hu ussa vi suu bay caw ɗiwisina.

²⁰ «Duk suu may suu cokosi casi ki u ŋgewnana, cemi ni ŋgew namma mbuɗ wa kay Egipte caɗ suu maɗ suu bolow coco ɦayna ki wa.

²¹ Ga hu zul suu miɗina suu duu suu miɗ ha jewna suu sesi tii cocona sawalla kolo ana, asi cuk ay dukuygi wa, suu ɗiwisi bay cawra suu casi ay u ŋgewnana cuk ay uygi wa, asi dlaɓ u aygi hu zulla dewra.

²² «Ha hu li namma ni mul ma Asirina u suu mam suu duuna halaŋ ka huwa ni suu may suu casi ha fun duuna u ŋgewnana.

²³ Ususi ha ni hu li ma zu zul a suu us suu miɗina halaŋŋa, ŋguy kay us mulna, asi ni suu casi ha fun duunana halaŋ, asi ni suu ay jew cuk ndaana ha huu suu kolo iirina cocona.

²⁴ «Ha hu li namma ni Elam u suu mam suu duuna ŋguyum ka laki hu may, asi ni suu casi ha fun duunana, asi cuk ga hu lina vi suu miɗina bay ɗiwisi cawra. Asi ni suu ay jew cuk ndaana ha huu suu kolo iirina cocona. Asi cuk hu zulla u zolo masi namma.

²⁵ Elam usum ka ni duk suu casi ha u ŋgewnana, suu duu mamsina ususi ŋguy ki kay mamba na cutl. Suu ɗiwisi bay caw asina halaŋ casi ha ni u ŋgewna. Asi ni suu ay jew cuk ndaana ha huu suu kolo iirina cocona. Asi cuk hu zulla u zolo masi namma hu lina vi suu miɗina.

²⁶ «Ha hu li namma ni Mesek u Tubal ka huwa, us suu mam suu duuna ŋguy ki kay mamba na cutl, ni suu ɗiwisi bay cawra suu casi ha fun duunana. Asi ni suu ay jew cuk ndaana ha huu suu kolo iirina cocona.

²⁷ Asi pi suu ŋgolo masisina ka ko asgaa suu ay jewna pi suu ŋgolonara naɗi. Asi cuk hu lina vi suu miɗina ni u suu masi suu njunusina dew ŋgew valaŋ masina cuki u yasiya, mbari masina kuluɓi kolo kay maɗasi may. Asi ni suu ay jew cuk ndaana ha huu suu kolo iirina cocona.

²⁸ Agi suu Egiptena may ni hin miɗ kiyo, usugi hin li ni duk suu ɗiwisi bay cawra suu casi ha fun duunana.

²⁹ «Suu Edomma ka hu lay, muli masisina u suu ŋgolo suu fokosina u suu duu suu saɓakŋa coco ɦayna, may cemi ni asi ka buuri hu lina vi suu miɗina dlaɓi u suu ɗiwisi bay cawra suu casi ha fun duunana dew.

³⁰ «Suu ŋgolo suu ay hu mbassa mbayawra ka hu lay, suu Sidonna ka hu lay, asi ni suu ay jew suuna li ndaana ko saɓak masina cocona. Cemi ni asi ka oloɗi. Asi cuk ga hu lina vi suu miɗina u suu ɗiwisi bay cawra dew, asi dlaɓ hu zulla u suu casi ha fun duunana dew. Asi cuk hu zulla u zolo masi namma halaŋ.

³¹ «Faraw hin wasiya, hu li ma nam wasi wa na ni nam hin heɓ hurum kay miɗ mamma may. Faraw u suu mam suu duuna halaŋ hin casi ki u ŋgewna. Di ni Bu Suuna, Yawe.

³² An hin Faraw mbuɗ suu iiri kay ndaŋgarna ki ndaana cocoo, may cemi ni nam u suu mam suu duuna halaŋ hin pasi ni duk suu ɗiwisi bay cawra, suu casi ha fun duunana may. Di ni an Bu Suuna, Yawe.»