EZEKIYEL 31 - Boy Lonana

Ndal Boyna kay gu sedrena

¹ Hu basara doogo yam dewra, hu til ma hindina, hu buu ma jewna ni Boy Yawena mbay egen dan ana,

² «Goŋ sanna, tuɗ di Faraw, mul ma Egiptena, u suu mam suu bolow cocona ana, aŋ tli taŋŋi u gege? Aŋ sa ma ŋgol cocona.

³ Aŋ tli taŋŋi u ŋgus sedrena, ɗuffi jivi coco ɦay, um ŋgusna coco layna, ma wuli kolo fiyek cocoo, yam tew ha ki kolo duk ɗugulla na su?

⁴ Mbo lona si kam wulum ki jiviya. Mbo ma ay ga hu zulla duk ndaŋgara na ɓaɗ ay um lay ka wulumu. Yona ŋguy kay sariyamu, hin jok law ha ki u ŋgusugi suu daŋŋa may.

⁵ Kay mbo may ma law umma, nam wul fiyek suu ndaryam ŋgusugi suu daŋŋa bel bel. Go gor kom dlaa dlaa seey coco lay.

⁶ Layagi suu pii kolona halaŋ min ziisi ni humumu. Tle baki suu bagina etl goryosi ni um gaa, suuna bolow cocoo min ziisi ni u ŋgusumu.

⁷ Nam wuli ŋgolla na ni jivi cocoo kay go gor kom ma dlaa dlaana sarayam se ta ta tew ay duk mbo ŋgolna,

⁸ Sedre ma hu sene ma vi Lonna ka ŋga u nambi lay. Gu ma yam ana Siprena ka ŋga u go gor kombi lay. Go gor ko gu ma seey ko nam na kaɗi. Gu ma hu sene ma vi Lonna ma jivi ko nam na kaɗi.

⁹ An lam ki jivira ni u go gor kom ma coco dlaa dlaana. Guguni suu hu sene ma vi Lonna mbuɗ vam mboora.

Mul ma Egiptena hin kus ki ko gu sedrena na

¹⁰ «Kay ndaɗta Bu Suuna, Yawe, di ana, aŋ wuli kolo fiyek cocoo, yaŋ tuɗ tew ay ki ta ta duk ɗugulla. Aŋ ŋga taŋ coco ɦay lay.

¹¹ An hiniŋ ki duk ko njaf suuna wa. Asi hin lasaŋ ko huruŋ ma co namma na may.

¹² «Suu daŋ suu dlasi cona kaam ki wa, noyom ki lay. Go gor kom cuki ga kay ɦinira wa, go gor kom kus ha ki ga hu ɦuɗugumba zeɗ zeɗ halaŋ, cuk ha ki doŋ lumma lay. Suuna halaŋ sa ka kak u ŋgusum oloɗi, noyom ki wa.

¹³ Layagi suu pii kolona mba lak kay kom ma ki kaay gana. Tle bagi suu bagina li ziisi ga u go gor komu.

¹⁴ «Ŋgusugi suu doŋ lummana halaŋ ma wul ŋgol ko nam na ka oloɗi. Kay ana gu ma wul ki kolo fiyek coco a ŋga tam kay ndaryamma oloɗi. Kay ana asi halaŋ hin so kiyo. Hu mbassa kaŋga ɦuɗugumba lay asi hin miɗ ki ko ndal suu warna na may, eg suu ki ga hu zullana.

¹⁵ «Bu Suuna, Yawe, di ana, hu buu ma gu ŋgol ma yam sedrena kal kaŋga hu lina vi suu miɗinana ni, an ɦeɓ zul ŋgolla mbona ana ndaɗ li hahawra kamu. An doo mbo lumma ka nam ɓaɗ oloɗi, mbo ma ŋgolna an doorom ha ki bel bel kay boy mamma. An so guguni suu hu Libanna ki halaŋ halaŋŋi kay dla sedre namma.

¹⁶ An mbuɗ njaf suu daŋŋa halaŋ ki ndaana ko bow mamba nam bow gara, hu li ma an gam ha ki hu lina vi suu miɗina u suu cuki ga hu lina vi suu miɗina ni. Ŋgusugi suu hu sene ma vi Lonna gijaŋ sa sukul masina hu mbassa ga zuzulla, gu ma suuna minim cocona, gu ma jivi ma hu Libanna halaŋ cuki ga duk mbo ŋgolna.

¹⁷ Guguni asina halaŋ cuk ki ga hu lina vi suu miɗina u gu sedre namma dew hu li ma ci suuna ki u ŋgew valaŋŋa. Suu ay laki u ŋgusumma njay ki kay yam mbassa zeɗ zeɗ halaŋ.

¹⁸ Gu ma ŋga u aŋŋa ni marage, sa ma tew u ŋgol maŋga ni gege? Duk guguni suu hu sene ma Edena halaŋ ma ŋga u aŋ kaɗi. Asi kalaŋ ki ga hu zul ŋgolla hu lina vi suu miɗina u guguni suu daŋŋa halaŋ. Aŋ hin buu ni duk suu ɗiwisi bay cawra u suu casi ha ki u ŋgewnana. Gola Faraw u suu mamsina halaŋ hin miɗ ni na. Di ni Bu Suuna, Yawe.»