EZEKIYEL 30 - Boy Lonana

Buu ma Bu Suuna hin kaɓakŋa kay suu Egiptenana

¹ Boy Yawena mbay egen dan ana,

² «Goŋ sanna, tuɗ di dlara ha kiyo. Aŋ tuɗ di ana Bu Suuna, Yawe, di ana, Tiirigiya, tii hu buu ma hahaw namma.

³ Kay buuna hin tok. Buu ma vi Yawena hin tok. Ni buu ma ɗugulla kuluɓ ki kolo cocona. Ni li ma vi njaf suu ɦawanana.

⁴ Ŋgew valaŋŋa hin mba kay suu Egiptena, ndaa ŋgolna hin ndi kay mbassa Etiyopira. Hu li ma maɗna ka ci coco hu Egiptena suuna hin ɦurumusi bege masira kiyo, u zigini masi suu gi gana asi hin hawaɗasi kiyo.

⁵ Suu duu suu asi yowosi ay hu mbassa daŋga a njun usina, Etiyopi, Put, Lud u ŋgayagi suu Egiptena u Libi u suu Israel suu ki zina hu Egiptena halaŋ hin casi ki u suu duu asina ni bel bel.

⁶ Yawe di na. Suu njun u suu may suu Egiptena halaŋ hin casi kiyo. Ŋga tara asi ŋga tasi kay saɓakasira hin daɓ kiyo. Col ha Migdol ta ta Syene ni hin casi kiyo. Di ni Bu Suuna Yawe.

⁷ Mbassa Egiptera hin mbuɗ ki ni ŋgoo bagira ko mbassa daŋga na may. Ҥoŋzi ma ŋgolo ma Egiptena hin ɓalak ki ni ko ɦoŋzi ma daŋ ma ɓalak kina na may.

⁸ Hu li ma an gi kura maŋ mbassa Egiptera, ci suu njun kaɗna ki wa ni, asi hin wi ki ana anni Yawe.

⁹ Hu buu namma gaw ni, suu vun sunda hin ful u lum kawina a tuɗ di boy ma vi suu Egiptena ha ki maŋ suu Etiyopinara. Asi suu laki u heɓpa asina hin mbuɗ ki ndaana cocoo, na daŋ may dla ndaɗta hin liya.»

¹⁰ «Bu Suuna, Yawe, di ana, An hin seŋ vun suu Egiptena u bege masira ndaɗta, sunusi Nabukodonosor mul ma Babilonna ay kasiya.

¹¹ Nam u suu mamsina ni suu dlasi cona. Suu ci maɗna ɦayna. Asi mbay ni a ɓalak mbas ndaɗta kira. Asi hin duu u suu Egiptena. Asi hin oy yam mbassa ki coco u maɗ suu asi casina.

¹² Mbo lum ma Nilna an hin soom kiyo. An hin gus mbas ndaɗta ki ko suu dlasi cona. Njaf suu daŋŋa hin yow tlesuu hu mbas ndaɗtana ki halaŋ halaŋ. An, Yawe, di ni an daŋ may.

¹³ Bu Suuna, Yawe, di ana, An hin ɓalak fulina masina an toosi loosi suu bay gasina suu ka hu ɦoŋzi ma Memfisna kiyo. Mul ma Egiptena ka li oloɗi lay. An hin gi ndaa ma ŋgolna hu mbassa Egiptera.

¹⁴ An hin ɦurum mbassa dalira kiyo. An hin gi ɦoŋzi ma Soanna ki kura. An hin ka ɓakŋa kay ɦoŋzi ma Nona may.

¹⁵ «An hin tok yaanda ni kay Sin, ɦoŋzi ma ŋgol ma saɓak coco hu Egiptena. An hin daɓ begera vi suu Nona kiyo.

¹⁶ An hin gi mbassa Egiptera ki kura, ɦoŋzi ma Sinna hin las cocoo. Gulumun ma ŋguy kay Nona hin bow kiyo. Suu duuna hin cuk ay hu ɦoŋzina ni faaliya.

¹⁷ Gorzoŋii suu hu ɦoŋzi ma On u Pi-Besetna suu duuna hin casi kiyo. Boyogina asi hin yowosi ki balna may.

¹⁸ Hu ɦoŋzi ma Tapanesna ni lina ka fo oloɗi. Hu li ma an ka kus saɓak ma vi suu Egiptena kina, ŋga taasira ka li oloɗi. Ɗugulla ndufun cocora hin kuluɓ ki kay ɦoŋziisina. Suu hu ɦoŋzi nammana asi hin yowosi ki balna.

¹⁹ An hin kaɓakŋa kay mbassa Egiptera, suuna hin wi ki ana anni Yawe.»

Mul ma Babilonna ko Lona ni a vaam ma sunda

²⁰ Hu basara doogo yam dewra, hu til ma jewna, hu buu ma kiɗisiyana, ni Boy Yawena mbay egen dan ana,

²¹ «Goŋ sanna, an kus ko Faraw, mul ma Egiptena, ki wa. Sa ka jakamma oloɗi. Sa ka hoorom va kayambi lay. Sa ka njunummaɗi lay. Sa ka lamma doktor a kom fi saɓakŋa a vi ŋgew ma duuna oloɗi.

²² Kay ndaɗta Bu Suuna, Yawe, di ana, an mbay duu u Faraw, mul ma Egiptena. An hin kusum kom ki u dlamba jakka, kom ma saɓakŋa coco ɦayna. Kom namma cemmi kus ki wa. Ŋgew ma kawi komma ndi ki ga wa.

²³ An hin njay suu Egiptena ha ki duk njaf suu daŋŋa. Asi hin njay ha ki hu mbassa daŋga.

²⁴ Ŋgoo dagan an hin ɦal saɓakŋa maŋ mul ma Babilonna. An hin ɦam ŋgew man ma duuna hu duk komu. An hin kus bik Faraw kiyo. Nam hin yoora, oy tam zamba ko sa ma dagi coco tok a miɗnana na.

²⁵ An hin so u ko mul ma Babilonna na may ko Faraw hin cuk um kaŋga may. Hu li ma an ɦal ŋgew manna ko mul ma Babilonna asi hin wi ki ana anni Yawe, ni hu li ma nam ka duu u suu Egiptenana.

²⁶ An hin njay suu Egiptena ki duk njaf suu daŋŋa. An tuɗusi ki hu mbassa daŋga zeɗ zeɗ. Asi hin wi ki ana anni Yawe.»