EZEKIYEL 26 - Boy Lonana

Di dlara jok vun Lona kay mbassa Tirra

¹ Hu basara doogo yam dewra hu til ma jewna buuna dewna ni Boy Yawena mbay egen dan ana,

² «Goŋ sanna, suu Tirna san ki u Yerusalem ana, Ha ha vun grek ma vi suu asinana hawaɗ ki wa. Jew ni suu paara tuɗ huruɗ cocoo. Cemi wanda asi mbay ki ni varaygi may ɗaŋ. Aygi varak ɦiz ki may.

³ Na may Bu Suuna, Yawe, di ana, agi suu Tirna an mbay kagi wa may. An cukugi njaf suu daŋŋa kagiya, ko ndal mbo lum ŋgolna ka bilna kolora na.

⁴ Suu asina hin to gulumun ma ŋguy kay suu Tirna kiyo. Asi hin toosi ziisi ma fiyekŋa ki lay. An hin tok kami tle asina ha ki na bel bel, hin cuki ga ni ɦinira u taɗta doy hol.

⁵ Mbas masira hin ki duk lumma Mediteranena ni a li ma suu ciwna waa bay masina ki huna. Kay an dasiya, di ni Bu Suuna Yawe. Mbas ndaɗta njaf suu daŋŋa hin ɦurumuɗ kiyo.

⁶ Ҥoŋzi ma cuki keŋ Tir ma ay njuni uɗna halaŋ hin to kiyo, ci suu huna ki u ŋgewna. Ni asi hin wi ki ana anni Yawe.

⁷ «Bu Suuna, Yawe, di ana, An hin mbaa mul ma ay mbayawna Nabukodonosor, mul ma saɓak suu mulina halaŋŋa, ay kagiya. Nam hin mbay ni u kulumina u pupus ma kulumina lay. Suu duuna ay dlaɓi um bolow cocoo.

⁸ Hu duu namma asi hin cagi goryogi kiyo. Asi hin ŋguyugi yam ziigi ki u tlesuu duuna. Asi hin cakagi gulumunna ay ki irigi ko ndal mbarina na.

⁹ Asi toogi gulumun magina ki u guusi ma to tlena. Asi vekegi u zigini magi suu fiyekŋa ki u ɓalaŋŋa.

¹⁰ Gugum kulumi masi suu bolow cocona hin dugugi ni na kundul. Sem kulumi suu pupusna suu soora geŋeɗ gulumunna ki na jik jik hu li ma asi a cuk ay vun grekŋana. Asi hin cuk ha vona ko ndal suuna a cuk hu ɦoŋzi ma asi gam kura ki jew hurum ŋgalam kina ɦawa na.

¹¹ Asi hin tuɗ ki hu voɗta hu ɦoŋziiginara dew dew bel u kulumi masisina. Asi hin cagi suu magisina ki u ŋgew valaŋŋa. Vaagira mini kolo ta agi li saɓakŋa uɗta hin bow ki kaŋgaa.

¹² Asi hin yowogi bege magira ki a joosina, asi hin ɦurumugi tlegeyegi suu paara kiyo. Asi hin toogi gulumun ma ŋguy kagina kiyo, toogi zigini magi suu jivina ki may. Asi hin cukugi ɦini magira ceɗira u gu ma min zina u gugum zina halaŋ ha ki duk lumma Mediteranena.

¹³ An hin seŋegi sool magira agi gaɗ ŋguk ŋguk hu ɦoŋzinara u diŋ magi ma agi buumma kiyo. Va hin ka li dew oloɗi.

¹⁴ Ҥini magira min zina hin ki cuki ni u taɗta. Mbas magira hin ki ni a li ma suu ciwna so bay masina ki huna. Ҥoŋziigina ka a hoŋ min kolo oloɗi. Di boy namma ni an Yawe u tanda. Di ni Bu Suuna Yawe.

Yoora kay ɦoŋzi ma Tirna

¹⁵ «Bu Suuna, Yawe, di suu Tirna, hu li ma suuna hum dla ndi magira gara, u oyra suu dak ay fun duunana oyra, ci maɗ ma suuna ka cagi cocona, daara agi cuki kaɗta geŋeɗ ka ki cocoɗi su?

¹⁶ Muli suu ŋguy fun lumma Mediteranena halaŋ hin dlam masira mulla ki tani lak ki gaa. Asi fok barawi masi suu ŋgolona kiyo, cuk barawi suu cona ki tasiya, lak ki ga duk ndaŋgara. Asi dlak ndaana cocoo, yoo tasi coco kagi agi suu Tirna.

¹⁷ Asi gi soolla yoora u segi di ana, Yakkay, ɦoŋzi ma dlam ŋgol coco namma bulum ki wa. Lum kawi masi suu jaŋ duk mbo ŋgolnana ba ki wa. Muli suu ŋgolo suu maliyaŋ lumma Mediteranena halaŋ mbuɗ ki ndaana. Ndaa namma ha ki ni kay suu ŋguy fun lumma Mediteranena namma halaŋ.

¹⁸ Hu li ma asi ndi ki gana suu cuki kay daara ko asi nana halaŋ mbuɗ ki ndaa coco ko bara asi ba ki ndaɗta.

¹⁹ «Na daŋ may, Bu Suuna, Yawe, di ana, hu li ma an lagi ɦoŋziigina ki a zi ma ɓalak kinana, nam mbuɗ ki ni a zi ma sa ka cuk hurum oloɗina. Hu li ma an hin mal vun zul ŋgolla ay ki kuluɓuŋ mbona ay ki kaŋŋa.

²⁰ An hin kalaŋ ga ko taŋ u suu ka ga hu zullana, eg suu ay fok jew day dayna. An hin cukuŋ ziiŋŋa ha ni ga hu zul ŋgolla. Ni ɓalak mayra dindinda. Aŋ hin kak ko taŋŋi u suu ka hu zullana. Aŋ ka hoŋ ay ki kolo zina u taŋga Tirra oloɗi.

²¹ An laŋ dlaaŋga ni a dlara li ta suuna ndaana dindinda. Sa ka waŋ oloɗi. Suuna hin halaŋ lay, ni ka faŋ oloɗi. Di ni Bu Suuna, Yawe.»