EZEKIYEL 20 - Boy Lonana

Minda vi Lonara u maŋira vi sa warna

¹ Hu basara kiɗisiyara, hu til ma vadlna, hu buurum ma doogona, ni suu ŋgolo suu Israelna suu ta ɦiw mbay a joɓ Yawe, asi mba lak ga fokomu.

² Boy Yawena mbay egen dan ana,

³ «Goŋ sanna, di suu ŋgolo suu Israelna ana, aŋ dasi ana Bu Suuna, Yawe, di ana, Agi mbay gasi ni a joɓonda su? An suu tan u iiri manda, an ka hin tan a agi joɓonɗi. Di ni Bu Suuna Yawe.

⁴ Na ni aŋ ka a kaasi ɓakŋa kasiɗi su, goŋ sanna? Na daŋ may kaasi ɓakŋa kasiya, takasi dla cora somoyosi laɗta.

⁵ «Aŋ dasi ana, Bu Suuna, Yawe, di ana, hu buu ma an man suu Israelna kina ni an suu tanu, tli kon kolo fok njaf suu vi Yakobma, an tak tan ki irisiya, ay hu mbassa Egiptera, an suu tan tli kon kolo dasi ana. Anni Yawe, Loogina.

⁶ Hu buu namma ni an suu tan tli kon kolo dasi ana an hin cukusi ay ki hu mbassa Egiptera. Tinisi irisi hu mbassa an goloɗ ay ki min a cukusi hura, ni mbas mayra law gi mbiira u mbul yumma, mbassa seɗ tii ki su ndaryaɗ mbassa halaŋga.

⁷ An dasi ki ana gegelay ni hin dla co mamba ka kom cemi wanda kiyo, mbuɗugi tagi ki njenje u fuli suu Egiptenaɗi. An ni Yawe, Loogina.

⁸ Na may asi hin hoŋ li yara u an na ɗow, ka min a humun vununɗi. Sa min ka a cuk fuli mam suu ay kom asina kiɗi. Asi hin fuli vi suu Egiptena ka kiɗi. An hin di ana an mba kuluɓ yaanda kasiya. An hin takasi yaanda ay ki ni hu mbassa Egiptera gaw.

⁹ Na may an hin li ka naɗi ni kay sen anu. Kay ana asi ka mbuɗ ki lalas ii njaf suu ɦawana suu asi cuki dukusi wannaɗi. An tak tan ki irisiya, ki duk njaf suu daŋŋa halaŋ. An cukusi ay ki hu mbassa Egiptera.

¹⁰ «An cukusi ay ki hu mbassa Egiptera, an tuɗusi ki ŋgoo bagi hu fulla.

¹¹ An ɦasi gaɗ manda takasi neenda ki halaŋ. Ne mayra sana a kak iiri uɗta lini nam li uɗu.

¹² An ɦasi Buu ma vi Lonna ni a va ma tak minda duk ɦoŋ tan u asira, kay a suuna wi ki ana manasi ki ni an Yawe daŋ may.

¹³ Na may suu Israelna hin mbuɗ ki yara u an ay ki ŋgoo bagi hu fulla. Asi ka tuɗ u gaɗ mandaɗi. Asi hinin neenda sana a kak iiri uɗta kiyo. Asi ɓalak Buu ma vi Lonna kiyo. An ɓak tan ana, an kuluɓ yaanda kasi ŋgoo bagi hu fulla daɓasi kiyo.

¹⁴ Na may ni an hin li ka naɗi, ni kay sen anu, kay ana asi ka mbuɗ ki lalas ii njaf suu ɦawana suu an cukusi ay ki dukusi wannaɗi.

¹⁵ An hin suu tan fokosi tli kon kolo ŋgoo bagi hu fulla olo ana, an ka ndak a cukusi hu ndaŋgara law gi mbiira u mbul yumma oloɗi, mbassa seɗ tii ki su ndaryaɗna bella.

¹⁶ Kay asi li ka u neendaɗi, asi tuɗ ka ko gaɗ manda dira naɗi. Asi mbuɗ Buu ma vi Lonna ki lalassa, hurusi ki tini ni kay fuli masisina.

¹⁷ Na may an wasi hahawasiya. An ka min a baasi kiɗi. An ka daɓasi ki ŋgoo bagi hu fulla gawɗi.

Suu Israelna hin ŋgella ŋgel vun Lonara ka tuɗi

¹⁸ «An dasi goryosi ŋgoo bagi hu fulla ana, tuɗugi u gaɗta vi somoyogira oloɗi. Lagi u dlaasira asi laɗtaɗi. Mbuɗugi tagi ki njenje u fuli masisinaɗi.

¹⁹ Anni Yawe, Loogina, poyogi ni u gaɗ manda. Golongi ni neenda, li uɗu.

²⁰ Lagi buu ma vi Lonna ki teteɗ. Nammi va ma tak minda duk hoŋ tan u agira kina. Kay a suuna wi ki ana anni Yawe, Loogina.

²¹ Na may asi gorra hin mbuɗ yara u anu. Asi ka tuɗ u gaɗ mandaɗi, asi ka li u neendaɗi lay, ka saa kaɗɗi lay. Sa kak iirina ni sa ma li u neendana. Asi mbuɗ Buu ma vi Lonna ki lalasi. An ɓak tan ana, an kuluɓ yaanda kasiya, an min takasi yaanda ki ŋgoo bagi hu fulla.

²² Na may an hin li ka naɗi ni kay sen anu, kay ana asi ka mbuɗ ki lalas duk njaf suu ɦawanaɗi, ii suu may suu an cukusi ay ki dukusinaɗi lay.

²³ Olo, an suu tan tli kon kolo ay fokosi ŋgoo bagi hu fulla ana, an hin njayasi ki duk njaf suuna, ki hu mbassa daŋga zeɗ zeɗ.

²⁴ Kay asi li ka u neendaɗi. Asi noyon gaɗ manda kiyo. Asi mbuɗ Buu ma vi Lonna ki lalasi. Asi tuɗ ni u fuli suu vi somoyosina.

²⁵ Na ɗaŋŋi an ɦasi gaɗ mayra ka lasi jiviɗira ni u tanda, takasi ni ne mayra asi ka lak iiriɗira.

²⁶ An hinisi asi mbuɗ tasi ki njenjera u ɓivun masina. Asi ŋgaɗ goryosi suu njufiina suu vuɗ fok jewna ki maŋ fulina, ŋgalasi kiyo. An li na ni a hin kaasi ɓakŋa kasira. Asi hin wi ki ana anni Yawe.

Lona hin doo fuli suu vi suu Israelnana kiyo

²⁷ «Kay ndaɗta goŋ sanna tuɗ di suu Israelna, aŋ dasi ana, Bu Suuna, Yawe, di ana, somoyogi panan ay coco u dlaasira gunira.

²⁸ «An cukusi hu mbassa, an suu tan tli kon kolo ana an a ɦasirara. Asi hal ni ɦini mayra kolo dayra u ŋgus mayna ɗufi cocona, li ɓivun masina ni huwa. Asi li ni ɓivun ma ɓalak huuna na ɗow. Asi tin mbul ma his jivina ni huwa, vo sum veŋ masina ni hu may.

²⁹ An joɓosi ana li ma kolo day ma agi tuɗ hurum namma ni manage? Asi yi li namma ana li ma mbuy kolo dayna ta ta cemi.

³⁰ «Kay ndaɗta aŋ di suu Israelna ana, Bu Suuna, Yawe, di ana, agi mbuɗ tagi ki njenjera u lira agi li dlara vi somoyogira. Agi lagi dlara gawlaŋga u ɓivun masi ma cona.

³¹ Hu li ma agi mbaa tlegeyegi ayna, hu li ma agi ŋgal goryogi kina, agi mbuɗ tagi ki njenjera u fuli magi asina ta ta cemi. An may ni hin hin tan a agi mbay joɓon gasi may su agi suu Israelna? An suu tan u iiri manda di ni Bu Suuna, Yawe, an ka ndak a hin tan a agi joɓonɗi.

³² «Dlara agi saaraɗ hurugi wandara ka hin li naɗi, kay agi di ana, Ami min li ko njaf suu daŋŋa lira na may, ko ndal dee suu daŋŋa hu mbassa daŋga goɓ gugunina u ɦinira na may.

³³ An suu tan u iiri manda. Di ni Bu Suuna, Yawe. An ti kagi u saɓakŋa u yara lay.

³⁴ An cukugi ha ki duk njaf suuna halaŋ. An tokogi ha ki hu mbassa agi njay ay ki hura. An li dla ndaɗta ni u bik kon ma saɓakŋa u saɓak manna u hurun ma yara lay.

³⁵ An tuɗugi ha ki ŋgoo bagi hu mbassa vi njaf suu daŋŋara, ha hu li namma an hin col ki fokogi a kaagi ii ɓak maginara.

³⁶ An hin kaagi ɓakŋa kagi ni ko ndal an kaam ay kay somoyogi ŋgoo bagi hu mbassa Egiptera na may. Di ni Bu Suuna Yawe.

³⁷ An hin cukugi ga u saɓak tokolo manda. An hin ndumugi ko ndal sa ma taa yoorina ndum yoori mamsinara na.

³⁸ Suu may suu duu u anu, halan a yara dukugina, an hin dikisi kiyo. An dikisi ki hu mbassa asi ka huruɗ cemi wandara, duk suu asina ni sa dew lay ka hoŋ ay hu mbassa vi suu Israelnaraɗi. Ni agi hin wi ki ana anni Yawe.

³⁹ «Bu Suuna, Yawe, di ana, agi suu Israelna gegelay ni tuɗ tokol fuli mamsina, ŋgoo dagan ni aygi hin wi tuwa, lini agi hin ka humun vununɗi kala. Ni agi ka hin a mbuɗun sen ma teteɗna ki lalas u ɓivun magina u tlesuu agi ɦasi maŋ fulinana oloɗi.

⁴⁰ Bu Suuna Yawe di ana, agi suu Israelna hin sunungi ni kay ɦini manda teteɗta, ɦinira wuli kolo fiyek coco ɦayra. Ha hu li namma ni an hin vi tlesuu agi ɦansinana, ɦal magi ta ɦawara jivira u tlege suu agi ɦansina ki manna halaŋ.

⁴¹ Hu li namma ni an hin vagi ɓivun magi ma lam u mbul ma his jivina. Hu li ma an taaragi ay ki hu mbassa daŋga zeɗ zeɗ ta agi ay ki njay hura mba tokogi ki kel tagina, an hin tak teteɗ manda ki maŋ njaf suu daŋŋa ni u agiya.

⁴² Agi hin wi ki ana anni Yawe, ni hu li ma an mbaaragi ay ki kay ndaŋgara Israella, hu mbas mayra an suu tan tli kon kolo di ana an ɦaɗ maŋ somoyogiyara.

⁴³ Ha hu li namma ni humugi hin gagi kay poy magira cora ay fok jewra u dlara agi laɗ mbuɗ tagi ki njenjera u ndaɗta. Hurugi hin haɗ coco kay dlaagira agi laɗ co ndaɗta.

⁴⁴ Agi hin wi ki ana anni Yawe. An lagi dlara egegi na ni kay senu, ni ka kay dlaagira cora ɦawaɗi lay agi suu Israelna. Di ni Bu Suuna, Yawe.»