EZEKIYEL 2 - Boy Lonana

Lona sun Ezekiyel eg suu Israelna

¹ Del ndaɗta dan ana, «Goŋ sanna col ki koloo an ka ɓakaŋ haa.»

² Hu li ma del ndaɗta ɓakan nana ni, ŋgus taa mba kal hurunu. Ndaɗ mba colon ki koloo. An hin hum ana ni sana ka ɓakan ay may.

³ Nam dan ana, «Goŋ sanna, an sunuŋ eg suu Israelna, eg suu may suu li gonokka, suu li gonokka u anna, asi u somoyosi lay ta ta cemi.

⁴ Suu may suu yasi eŋŋa hurusi sooy coco lay. An min sunuŋ egesiya, aŋ tuɗ dasi ana, gola Bu Suuna, Yawe, ɓak ay na.

⁵ Lini asi humuŋ lay, ka humuŋgi lay, ni suu hurusi cona, asi hin wi ki ana sa ma jok vun Lona ka dukusiya.

⁶ Aŋ hum haa, goŋ sanna, li ndaa kosiɗi. Li ndaa ko boy masinaɗi lay. Aŋŋi ɦeɓi duk dlara ci wayra, duk tlesuu siina lay. Aŋŋi kaki kay huɗura, li ndaa ko boy masinaɗi. Dlak ndaa ko irisiɗi lay kay asi ni suu gonokka.

⁷ Aŋ tuɗ dasi ni boy manna. Lini asi hum lay, ka humbi lay. Asi ni suu gonokka.

⁸ «Goŋ sanna, hum dlara an daŋga hara, li gonok duk koɗɗi, li ko njaf suu co asina naɗi, mal vunuŋ ha kiyo, ti tlesuu an min a ɦaŋsina hana.»

⁹ An gola ni ko sana maɗ ay egen na u magaara ɗuɗi komu.

¹⁰ Mba ganda ga fokonu, huruɗ ki ɓiiri keŋ na jak, ɓiiri huruɗ ni yoora, zamba u tiina may.