EZEKIYEL 19 - Boy Lonana

Soolla tiina

¹ «Aŋu, aŋ gi soolla tii kay muli suu Israelnara.

² Aŋ di ana, Suŋŋi dlo tamara, ndaɗ ka buuri ga duk gi dlona, buuri duk gor dlona, ndaɗ ka ɦal tina maŋ goryoɗu.

³ Ndaɗ wul maa ki dukusi dew, nam mbuɗ ki dlo ma njoloona, nam haɗ yal ma kom tliw mamma, nam kommi sa warna.

⁴ Njaf suuna bolowo humum dlam ha kiyo. Asi vam ki hu zul masira. Asi tuɗum ki u ɓalaŋŋa njuniya, tuɗum ki hu mbassa Egiptera.

⁵ Hu li ma do dlora wi ana gooroɗ ma ndaɗ tin saaraɗ kamma ka oloɗi ni, ndaɗ varak ma daŋŋa duk goryoɗu, mbuɗum a dlo ma njoloona olo.

⁶ Nam ka kuɗuk duk ndaryam suu daŋŋa, mbuɗ ki dlo ma njoloona. Nam haɗ yal ma kom tliw mamma. Nam kommi sa warna.

⁷ Nam toosi ziisira mulla kiyo, nam hawaɗ ɦoŋzi ma goona ki lay. Mbassa u suu cuki huruɗna mbuɗ ki ndaana halaŋ halaŋ ko bayra nam a bay ayra.

⁸ Njaf suu ŋguy kamma halaŋ taɓ tasi mba ŋguyum duu u namu. Asi gunun bay masina ki fokomu, asi vam hu bay masina wa.

⁹ Asi njun dlo namma u galina, tuɗum ki hu mbassa Babilonda, maŋ mul ma Babilonna. Asi gam ki ga hu zulla kay ana sa ka humum delem kay ɦinira vi suu Israelna oloɗi.

Gugutluna u vuɗumu

¹⁰ «Suŋŋi ko ndal gugutlu ma pi fun mbonana na. Ndaɗ vuɗ coco lay, humuɗ ɗufi jivi coco ɦay lay. Kay ana mbona uɗ ŋgol cocoo.

¹¹ Gogor kom wul ki saɓak cocoo, mbuɗ ki ko ndal tokolora vi mulnara na. Guuɗ wul kolo ta ta tew ɗugulla. Sana ay day ni waɗ yaɗ ha kiyo.

¹² Na may asi paɗaɗ kiyo, gaɗ ki ga u huu ma yara, babaa ma ay u maɗiinana sooɗ vuɗuɗ ma yaki gana kiyo. Gogor koɗ ma sii cocona so kiyo, kura ŋgalam ki lay.

¹³ Cemi ni ndaɗ ki pii ni ŋgoo bagi hu fulla, ni hu mbas mayra mbo ka huɗira ta laara huruɗ cocora.

¹⁴ Na may kura col ay eg guuɗ ma ŋgolna, ŋgalaɗ gogor koɗ u vuɗuɗ ki halaŋ. Koɗ ma jivi ma ka a tokolora mulla ka oloɗi.» Ni soolla hahawra, gaɗ ni hu li ma yoora.